Mathiơ 5:7
“Pŭn dêh lu bơngai mă băt mơnat kơ đe, ‘Bok Kei-Dei kư̆m mơnat kơ lu sư mơ̆n.” (Mathiơ 5:7)
Nơ̆r jet tơchĕng pơwao:
– ‘Mêm mơnat wă khan kiơ?
– Yua kơ kiơ Kră Yang Yêsu pơma hơđăl jơhngơ̆m băt mơnat thoi minh tơdrong ưh kơ gơh kơ lê̆ đơ̆ng lăm kon pơlei lăm dêh char ‘bok Kei-Dei?
– Bơ̆n oei pơm kiơ̆ tơdrong ‘nâu thoi yơ?
Tơdrong pŭn dêh mă 5 lăm tơhngam tơdrong pŭn dêh pơih blŭng a ‘bai Kră Yang Yêsu bơtho kơpal kông noh “Mơnat ”, lăm nơ̆r Grĕk “wă khan” tơgŭm lu bơngai đei tơdrong sơ’ngon, dŏng tơgŭm lu bơngai đei tơdrong pơmat. Bơngai tơblang sơ̆p hla bơar William Barlay đei chih lăm sơ̆p hla bơar Mathiơ khan: “Mơnat ưh kơsĭ khan ‘brơ̆k mơnat dah mơnat dah mơnat hăm bơngai đei tơdrong pơmat kiơ̆ kơ tơblang pơma hmă, mơnat kiơ̆ kơ nơ̆r Hêbrơ păng Aram noh “Chesedh” noh dan bơ̆n kơdih ‘bơ̆t anih bơngai noh ding truh bơ̆n lăng tơdrong noh lei lăi thoi bơngai noh, tơchĕng thoi bơngai noh tơchĕng, păng đĭ jơhngơ̆m mơn ‘brơ̆k thoi bơngai noh ‘mơ̆i”.
Kră Yang Yêsu đei roi rơđah kơ nơ̆r “Mơnat” lăm tơdrong pơtih gia bơngai Samari pơm ‘lơ̆ng. Đang kơ sư roi tơdrong pơtih gia, Kră Yang Yêsu đei apĭnh Thây bơtho tơdrong juăt đe Juđê: “Na Yêsu jet ‘bok thây noh: “Lăm pêng ‘nu bơngai noh, ih lăng bơngai ayơ bôl buăl păng bơngai mă jĭ kơ lu bơngai tơtông teh noh?” Na ‘bok thây ei khan: “Bơngai mă băt mơnat kơ bơngai jĭ noh yơh.” Yêsu khan kơ sư dơ̆ng: “Ih băt thoi noh boih na ih pơm kiơ̆ hloi bĕ.” (Luka 10: 36-37). Bơngai Samari ưh kơ sĭ ‘brơ̆k mơnat đĕch ôh, na dan kơdih akâu lăm tơdrong bơngai đe, pơm pơmat bơngai noh, băt tơdrong bơngai ‘nâu kăl wă păng pơm tơwih hăm tôm tơdrong sư kĕ pơm.
Kră Yang Yêsu pơm hơđăl kơ jơhngơ̆m mơnat yua kơ ‘nâu ưh kơ trŏ wă pơma ‘bơm lăm chăl arih noh sơ̆. Hăm bơngai Rôm, mơnat wă khan lei lăI hăm rơdu, păng lăm tôm tơdrong phak lu sư ưh kơ đei hlôh jơhngơ̆m ‘mêm mơnat, hăm lu bơngai Juđê, lu sư ‘mêm kơ lu bơngai bu mă ‘mêm kơ lu sư đĕch, păng mơnat kơ bơngai bu mă mơnat kơ lu sư. Kră Yang Yêsu đei pơma kơ đei jơhngơ̆m thoi ‘nâu kơplah Sư khan: “ Păng iĕm kư̆m kơtơ̆ng boih tơdrong đe bơtho sơ̆ thoi âu: ‘Athei ‘mêm kơ bôl juăt, areh kơ bơngai pơm kơnê̆ kơ bơ̆n. Mă-lei gah Inh bơtho iĕm thoi âu: Iĕm athei ‘mêm mơnat kơ lu bơngai mă pơm kơnê̆ kơ iĕm, krao khan apinh ‘Bok Kei-Dei tơgŭm sư,” (Mathiơ 5:43-44).
Lăm sơ̆p hla boar ‘Bok Kei-Dei, tơdrong mơnat ăn đĕch păng tơdrong mơnat bre sư ngăl năm hơdai (I Timôthê 1:2). Mă-lei oei đei tơdrong phara tŏ sĕt. tơdrong mơnat ăn đĕch noh pơm tơwih hăm tơdrong yoch, na tơdrong mơnat noh pơm tơwih hăm đei pơm tơdrong yoch. Tơdrong mơnat ăn đĕch đei tơ’bôh kơ bơngai mă ưh kơ hơ nhŏ trŏ kơ wă đei, păng mơnat noh tơdrong ‘mêm mơnat hăm bơngai mă pơmat dêh.
Lơ wơ̆t bơ̆n iŏk tơdrong mơnat đơ̆ng ‘Bok Kei-Dei kơplah Sư mơnat ăn tơdrong yoch păng hơmet ming bơ̆n, păng bơ̆n đêl iŏk tơdrong mơnat đơ̆ng ‘nhŏng mai oh lăm khul bơngai lui (Philip 2:1-2), thoi noh bơ̆n kư̆m kăl kơ mơn ‘brơk păng mơnat kơ lu bơngai mă pơmat dêh. Kră Yang ‘Bok Kei-Dei bơih Tơ’ngla lăng ‘bôh đơ̆ng lăm jơhngơ̆m rim ‘nu bơ̆n păng tơdrong mă Sư ‘maih lăng ‘bôh ưh kơ sĭ lăp pơm tơ’bôh mơnat đĕch na đĭ jơhngơ̆m mơnat yua kơ Kră Yang bơ̆n bơih Tơ’ngla băt mơnat (Luka 6:36).
Ơ Kră Yang, inh bơnê kơ Ih yua kơ đei mơnat kơ inh păng mơnat kơ dôm tơdrong inh dah inh tơkan tơ Ih. Apĭnh tơgŭm kơ inh ling lang đei tơdrong ‘mêm Ih, wă kơ inh gơh pơm tơ’bôh jơhngơ̆m mơnat hăm lu ‘nhŏng oh đei tơdrong pơmat oei jum dăr kơ nhôn, krao khan yua anăn Kră Yang Yêsu Krist, Amen.
Bơ̆n hăm mơn băt Kră Yang mơnat kơ bơ̆n păng tơ’bôh jơhngơ̆m mơnat kơ lu bơngai nai ưh?
Đŏk sơ̆p hla bơar nơ̆r ‘Bok Kei-Dei lăm pêng sơnăm: Êsêkiên 41
Kênh Youtube BHKTHN:
