Jôsuê 7:5-9
“Lăm năr chhŭr nuih inh khan thoi âu: Đe tơweh inh ataih boih đơ̆ng anăp Ih. Mă-lei Ih mơ̆ng nơ̆r inh krao apinh. Kơplah inh krao Ih dŏng pơklaih.” (Hơriso 31:22)
Nơ̆r jet tơchĕng pơwao:
- ‘Bok Jôsuê pơm kiơ ‘bơ̆t tơblah thuơ kơ đe?
- Pơma roi gah nơ̆r krao khan ‘bok Jôsuê?
- Tơ’bơp tơdrong thuơ răm, tơdrong pơlong, bơ̆n gô pơm kiơ kơplah tam mă tơdrong Kră Yang dŏng pơklaih?
Đơ̆ng rŏng kơ thuơ răm tơdrong tơplah tơdêh Ahi, jơhngơ̆m lu sư hli tơrơ thoi đak ro, păng jơhngơ̆m ‘bok Jôsuê kư̆m bĕnh tơdrong thuơ răm păng hli tơrơ. Sư hăm lu kră wei lăng, tang măt kơ đĭ đăng kon pơlei Isơrael, drap tơ teh kŭp kơl ‘bơ̆p anăp Hom pơgơ̆p Kră Yang truh tơ kơsơ̆ măng lu sư hek sư kơdih păng chup ‘mui teh klă ‘bĕnh kơ kơ̆l lu sư kơdih, tơ ‘bôl tơdrong sơ‘ngon tih dêh.
Lăm tơdrong ơh sơ‘ngon, ‘bok Jôsuê krao apinh Kră Yang pêng tơdrong. Mă mônh, yua kơ kiơ Kră Yang chông kon pơlei tŏk găn đak krong Jôrđăn mă wă pơjao lu sư kơ kon pơlei Amôrit? Mă ‘bar, sư athei pơma lơ hơ kơplah kon pơlei Ysơrael kơ dâu klĕnh ôn yua kơ bơngai yăt druh? Sơ̆ ki Kră Yang đei pơkă inh gô pơm kơ bơngai ayăt kơ inh kơdâu weh ‘bơ̆t anăp inh (LĐ Êyiptơ 23:27), mălei dang ei, kơplah kon pơlei Kanaan păng kon pơlei lăm dêh ‘nâu kơtơ̆ng Isơrael blah thuơ kơ đe, sư hli tơtăm lu sư gô pơ̆n ‘nuih tơblah păng dăr jum dăr kon pơlei (trong 9). Mă pêng, Kră Yang gô pơm thoi yơ kơ anăn tih hloh Sư ưh kơ đei ‘bơm Sư kơplah đe pơrăm kon pơlei Sư? Sư lui ngeh Kră Yang bơih ‘Bok Kei-Dei mơsêh păng tơdrong mă lu sư thuơ răm noh đơ̆ng Kră Yang lăp đon ăn truh kơlih kơ thoi noh, sư apinh Kră Yang yua kơ anăn Ih na dŏng tơgŭm kon pơlei Isơrael.
Mă khan minh ‘nu bơngai pơgơ̆r ‘mêm păng hli yom kơ Kră Yang, mălei ‘bok Jôsuê kư̆m ưh kơweh ôh đơ̆ng tơdrong glăi. Sư kư̆m ưh kơweh đơ̆ng tơdrong hli tơtăm, ưh kơ ngeh tơdrong bơwei lăng păng tơdrong ‘mêm Kră Yang ‘măn kơ sư păng kon pơlei, mă khan đei ‘bôh bơih tơdrong mơsêh Kră Yang ăn tŏk hlôi kơ đak krong Jôrđăn păng tơgar iŏk pơlei Jêrikô. Mă trŏ, sư athei krao khan aping Kră Yang tơ‘bôh dôm tơdrong arih ưh kơ trŏ lăm sư păng kon pơlei, na tă kơ apinh jet Kră Yang. Sư ưh kơ hlôh trong Kră Yang wă. Sư ưh kơ hlôh yua kơ đơ̆ng kiơ Kră Yang ưh kơ wei răk tơdrong Sư pơkă hăm kon pơlei Sư, yua kơ jơ noh sư ưh kơ tam băt ôh tơdrong yoch ‘bok Akan. Mă khan lei ră, lăm tơdrong arih sư ưh kơ hơđơ̆ng, sư păng lu kră wei lăng pơm tơ‘bôh tơdrong lui, chă Kră Yang đĭ jơhngơ̆m păng krao apinh tơdrong mơnat đơ̆ng Kră Yang kơlih kơ thoi noh, ‘Bok Kei-Dei ‘bĕnh tơdrong mơnat đei tơ‘bôh kơ sư trong wă hơmet tơdrong anat noh.
Kư̆m lei-lăi phŏ phŏ bơ̆n bơ̆n ‘bôh bơ̆n kơdih ưh pă hơmĕng, thuơ răm, păng kư̆m tơlĕch rơ‘bâu nơ̆r apinh jet yua kơ kiơ, kư̆m thoi ưh kơ ngeh tơdrong ‘mêm Kră Yang. Tơplih kơ tơdrong achăng lê̆, năm bĕ tơ Kră Yang păng đĭ jơhngơ̆m krao apinh tơdrong mơnat Kră Yang. Adroh hloh, athei roi tơbral dôm tơdrong yoch bơ̆n păng apinh Kră Yang tơbăt kơ bơ̆n dôm tơdrong glăi ayơ mă bơ̆n ưh kơ băt phŏ gô pơm kơ bơ̆n jing thuơ răm, tơ‘bơp tơdrong pơmat. Krao khan bĕ kơ Kră Yang, Sư ưh kơ layơ achăng bơ̆n.
Ơ Kră Yang, apinh Ih ăn kơ inh ling lang chih răk dôm tơdrong mơsêh dôm tơdrong ‘lơ̆ng Ih oei đei păng pơm bơih kơ inh, kơplah tơ‘bơ̆p tơdrong pơmat, apinh Ih ăn kơ inh ling lang lui gơnang kơ tơdrong ‘mêm Ih păng chă tơdrong dŏng pơklaih đơ̆ng Ih. Krao khan yua anăn Kră Yang Yêsu Krist, Amen.
Hăm đei layơ bơ̆n ưh kơ ngeh tơdrong ‘mêm Kră Yang? Kơplah noh bơ̆n pơm kiơ?
Đŏk Sơ̆p Hla bơar ‘Bok Kei-Dei lăm pêng sơnăm: II Kôrintô 9
Kênh Youtube BHKTHN:
