Klei Aê Diê Blŭ: II Y-Pêtrôs 1:12-15
Êlan kliăng: “Leh anăn kâo srăng răng čiăng kơ tơdah leh kâo đuĕ mơ̆ng diih, diih dưi hdơr nanao klei anei.” (II Y-Pêtrôs 1:15)
Klei êmuh ksiêm mĭn: Si Khua ƀĭng kna Y-Pêtrôs bi êdah ai tiê pô mtô klei đăo Aê Diê? Ya klei mtrŭt Khua ƀĭng kna Y-Pêtrôs, ăt msĕ mơh phung mtô klei đăo Aê Diê hruê anei sĭt suôr hŏng bruă klam? Si klei mđĭ ai drei kơ ai tiê pô mtô klei đăo Aê Diê?
Jĭng dĭng ktang Lăn Adiê, ăt jing pô mtô klei đăo Aê Diê, Khua ƀĭng kna Y-Pêtrôs bi êdah ai tiê ñu hlăm trăn Klei Aê Diê Blŭ hruê anei, ñu knŏng čang hmăng phung đăo kơ Krist mâo ñu mtô leh hriê kơ prŏng hlăm klei đăo. Hlăm bruă klam msĕ si sa čô mtô bi hriăm jih ai tiê, wăt tơdah phung đăo kơ Krist thâo leh klei kpă ênô, ƀiădah jing pô hiu hưn leh anăn mtô klei đăo Aê Diê snăn bruă klam jêñ jêñ leh anăn amâo mdei jing mñă kơ diñu kơ klei kpă ênô anăn nanao.
Mơ̆ng ai tiê anei, drei ƀuh klei mtrŭt Khua ƀĭng kna Y-Pêtrôs, leh anăn wăt pô mtô klei đăo hruê anei jih ai tiê hŏng bruă klam: Tal sa, ñu thâo klei kñăm bruă klam mtô klei đăo jing yua Klei Aê Diê Blŭ čiăng mtô mtă, bi mdih phung đăo mkăn, “Kâo mĭn jing djŏ êjai kâo dôk hlăm klei hdĭp anei hưn čiăng lŏ bi êrâo diih hŏng klei kâo lŏ mñă kơ diih” (êlan 13). Kyua mtô klei đăo Aê Diê jing sa bruă klam yuôm bhăn, sa klei yuôm bhăn snăk hŏng bruă klam Aê Diê jao kơ grăp čô. Tal dua, ñu ăt thâo săng bruă klam anăn jing klei sĭt nik, bruă djŏ klă brei ngă, mguôp hŏng jih klei hdĭp ñu. Tal tlâo, ñu mâo Khua Yang Yêsu brei thâo pô amâo sui ôh srăng djiê (êlan 14). Leh thâo hruê mmông pô adôk bhiâo, pô mtô klei đăo Aê Diê ƀrư̆ tuh êyuh ai tiê, gĭr bi leh bruă klam Aê Diê jao kơ pô čiăng leh ñu wĭt hŏng Aê Diê, phung đăo ăt hdơr nanao leh anăn hlue ngă Klei Aê Diê Blŭ hriăm leh.
Mơ̆ng ai tiê Khua ƀĭng kna Y-Pêtrôs hlăm bruă klam pô mtô klei đăo Aê Diê, drei klă sĭt mâo klei mđĭ ai čiăng hriăm Klei Aê Diê Blŭ, tŭ klei mtô msĕ si sa čô pô tui hriăm dưi hriăm mjuăt čiăng kơ Khua Yang “brei leh kơ kâo êlah phung hriăm leh” (Y- Êsai 50:4). Tơdah mâo Khua Yang iêô hlăm bruă mtô klei đăo, brei drei bi mklă klei kñăm bruă anei jing đru kơ ayŏng adei pô thâo kral Khua Yang leh anăn hriê kơ prŏng hlăm klei đăo. Kyua anăn, wăt tơdah tuôm hŏng dleh dlan amâodah mơak mñai hlăk êjai ngă bruă klam snăn drei kjăp ktang ai tiê pô hlăm bruă klam. Klei hdĭp mâo wưng kčah, brei thâo kral hruê mmông pô grăp hruê hrŏ hĕ ƀiă, leh anăn Khua Yang yua grăp čô hlăm wưng mơ̆ng hƀuê ênuk Phung Sang Aê Diê. Tơdah drei amâo mprăp ai tiê snăn Ñu srăng iêô pô mkăn. Akâo kơ Khua Yang đru drei jing pô mtô klei đăo Aê Diê, brei jih ai tiê jing mnuih rah mjeh klei đăo kpă ênô; jing pô hriăm klei đăo, brei êpa mhao tŭ mă Klei Aê Diê Blŭ čiăng hriê kơ prŏng hlăm klei hdĭp mngăt leh anăn lŏ dơ̆ng mâo Khua Yang yua mtô klei đăo kơ pô mkăn.
Si drei dôk tui hlue klei bi hmô ai tiê Khua ƀĭng kna Y-Pêtrôs?
Wah lač: Ơ Khua Yang, akâo kơ Ih đru kâo mâo ai tiê êpa mhao hriăm kơ Khua Yang leh anăn Klei Aê Diê Blŭ. Akâo kơ Khua Yang mtô kâo leh anăn mơak yua kâo jing pô mtô klei đăo Aê Diê hŏng sa ai tiê sĭt suôr, bi mguôp hŏng bruă klam, čiăng đru kơ phung ayŏng amai adei mkăn hriăm Klei Aê Diê Blŭ leh anăn hriê kơ prŏng hlăm klei đăo. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
