Pajlug 27:23-27
Nqe cim:
“Saib koj tej yaj tej nyuj kom zoo” (Pajlug 27:23)
Lus nug xav:
– Nqe pajlug no qhia txog peb seem twg uas peb yuav tsum saib xyuas ncaj ncees tej uas Vajtswv muab cob rau peb?
– Peb txhua tus, tau Vajtswv muab pab yaj twg rau peb saib xyuas?
– Peb yuav tsum tswj hwm thiab saib xyuas lawv li cas?
Ntu Pajlug 27:23-27 qhia txog kev nquag thiab txoj kev saib xyuas ncaj ncees. Daim duab ntawm tus yug yaj uas mob siab saib xyuas nws pab yaj qhia peb txog ib tug cai tseemceeb uas hais tias: Thaum peb ua tib zoo, ncaj ncees saib xyuas tej uas Vajtswv muab cob rau peb, Nws yuav pub txhua yam uas peb cheem tsum rau peb. Zaj qhia no qhia tshwm los ntawm peb seem hauv qab no.
Tim ib, koj yuav tsum ua tib zoo saib thiab paub meej txog tej uas Vajtswv muab cob rau koj. Vajntxwv Xalumoos ntuas tias: “Saib koj tej yaj tej nyuj kom zoo” (nqe 23). Nyob rau tiam Vajlugkub, pab yaj thiab pab tshis yog tsev neeg txoj kev noj kev haus yug txojsia. Tus yug yaj yuav tsum niaj hnub saib xyuas, tu thiab tiv thaiv nws pab yaj, yog tsis quavntsej, yuav poob yam uas yug tau lawv txojsia. Tus cai no kuj siv rau peb lub neej sab ntsuj plig thiab. Vajtswv muab ntau tes haujlwm cob rau peb xws li lub neej sab ntsujplig, tsev neeg, haujlwm, sijhawm thiab tej cuabtam. Cov ntseeg yuav tsum ua tib zoo saib xyuas txhua yam no. Kev ua ncaj ncees yog ua tib zoo saib xyuas tej uas Vajtswv muab cob rau yus lawm.
Tim ob, khoom qhov txhia chaw thiab meejmom hwjchim tsis nyob mus ibtxhis (nqe 24). Lub kausmom vajntxwv yog qhia txog lub hwjchim thiab lub meejmom, tiamsis yeej muaj ib hnub yuav ploj mus vim hnub nyoog laus zuj zus thiab lub sijhawm caijnyoog hloov pauv. Vim li ntawd, Vajtswv cov menyuam yuav tsum tsis txhob tso siab rau tej khoom ntiajteb no, tiamsis yuav tsum tso siab rau Vajtswv thiab ua tib zoo saib xyuas tej uas Nws pub rau peb.
Tim peb, tus neeg nquag ua haujlwm yuav tau txais nqe zog zoo ntawm nws tes haujlwm (nqe 25–27). Thaum tus yug yaj mob siab saib xyuas nws pab yaj, pab yaj yuav muab ris tsho hnav, zaub mov noj thiab txhua yam uas tsevneeg cheem tsum rau tsevneeg. Qhov no qhia hais tias txoj kev nquag thiab ncaj ncees yuav tau txais txhua yam cheemtsum txaus txhua lub sijhawm tsis tu ncua. Hauv peb lub neej sab ntsujplig kuj zoo ib yam li ntawd, kev loj hlob tsis los tamsim ntawd, tiamsis los ntawm tej yam me me uas peb ua txhua hnub, xws li thov Vajtswv, nyeem thiab kawm Vajtswv Txojlus, mloog lus thiab ncaj ncees rau siab ua haujlwm. Thaum peb saib xyuas tau tej uas Vajtswv muab cob rau peb no zoo lawm, tsis yog peb tus kheej tau koob hmoov xwb, tiamsis kuj muaj nqis rau cov neeg uas nyob ib ncig ntawm peb thiab. “Dua li tej tshis uas seem cia tso kua mis yug koj thiab koj tsevneeg, thiab koj tej ntxhais qhev kom muaj noj muaj haus tsis tu” (nqe 27).
Peb txhua tus puavleej tau Vajtswv cob ib pab yaj rau peb saib xyuas, xws li tsevneeg, Pawg ntseeg, thiab txhua pab hauv Pawg ntseeg, niam tsev, txiv tsev, tub ntxhais, menyuam… Cia li ua tus saib xyuas ncaj ncees rau Vajtswv, nquag thiab rau siab tu pab yaj uas Vajtswv cob rau peb. Vajtswv yuav pub txhua yam uas peb cheem tsum rau peb kom peb ua tau Nws tes haujlwm tawg paj txi txiv thiab txhim kho Pawg ntseeg loj hlob.
Thov Vajtswv,
Tus Tswv, thov pab kom nyuam yaus ua tus saib xyuas ncaj ncees rau txhua yam uas Koj tau muab cob rau nyuam yaus thiab thov pab kom nyuam yaus tso siab plhuav rau tej uas Koj pub. Thov pab nyuam yaus ntseeg ruaj rau ntawm Koj, rau qhov Koj yog lub Pob Zeb ruaj khov ib txhis tiv thaiv nyuam yaus. Nyuam yaus tuav Tswv Yexus Khetos lub npe thov, Amees.
Peb saib xyuas tej khoom qhov txhia chaw uas Vajtswv muab cob lawm li cas?
Nyeem Vajluskub hauv peb lub xyoos: 2 Kauleethaus 10
Kênh Youtube BHKTHN:
