Klei Aê Diê Blŭ: Klei Bi Hriêng 27:23-27
Êlan kliăng: “Brei ih thâo kral si biăp ih jing, brei ih răng kriê bi jăk êmô ih” (Klei Bi Hriêng 27:23)
Klei êmuh ksiêm mĭn: Ya klei trăn Klei Bi Hriêng anei mtô kơ tlâo bruă brei sĭt suôr kriê dlăng leh anăn răng kriê klei Aê Diê jao? Ti êpul biăp Aê Diê jao kơ grăp čô drei kriê dlăng? Si drei kriê dlăng leh anăn răng kriê?
Trăn Klei Bi Hriêng 27:23-27 mtô kơ klei kriăng leh anăn ai tiê sĭt suôr. Rup pô mgăt biăp kriê dlăng êpul biăp pô ƀuh sa klei bhiăn yuôm bhăn: Tơdah drei thâo răng, sĭt suôr kriê dlăng ya mnơ̆ng Aê Diê jao, Ñu srăng brei kơ drei klei mkăp čiăng êdi. Klei anei bi êdah hlăm tlâo mta phŭn.
Tal sa, brei anak thâo răng, thâo kral ya mnơ̆ng mâo jao kơ anak. Mtao Salômôn mtă: “Brei ih thâo kral si biăp ih jing, brei ih răng kriê bi jăk êmô ih” (êlan 23). Hlăm ênuk Klei Aê Diê Blŭ, êpul biăp leh anăn bê jing phŭn hdĭp kơ gŏ sang. Phung răng brei ksiêm dlăng nanao, kriê dlăng leh anăn răng mgang êpul pô; tơdah ngă ngơi mang, diñu srăng luč phŭn hdĭp. Klei bhiăn anei ăt ba yua hlăm klei hdĭp mngăt. Aê Diê jao kơ drei lu bruă klam msĕ si klei hdĭp mngăt ai tiê, gŏ sang, bruă knuă, bruă jao, hruê mmông leh anăn ngăn dŏ. Phung đăo kơ Krist brei mđing uêñ leh anăn kriê dlăng dŭm klei anăn hŏng klei thâo răng. Klei sĭt suôr mphŭn mơ̆ng bruă mđing kơ ya klei Aê Diê jao.
Tal dua, ngăn drăp leh anăn klei dưi amâo dôk lă lar ôh (êlan 24). Đuôn mtao bi êdah klei dưi, kơhưm ăt msĕ mơh mâo mmông srăng amâo lŏ dôk kyua thŭn khua ôh, wưng ênuk ăt bi mlih mơh. Kyua anăn, phung ƀuôn sang Aê Diê đăm duah ôh klei êđăp ênang pô hlăm mnơ̆ng dhơ̆ng, ƀiădah brei đăo knang kơ Aê Diê leh anăn kriê dlăng thâo mĭn ya mnơ̆ng Ñu brei.
Tal tlâo, phung kreh kriăng lŏ mâo mă boh tŭ jăk mơ̆ng bruă pô ngă (êlan 25-27). Tơdah pô kiă biăp kriê dlăng êpul biăp hŏng klei kriăng, êpul srăng mkăp ao hơô, mnơ̆ng ƀơ̆ng leh anăn klei čiăng kơ gŏ sang. Klei anei mtô kơ klei kreh kriăng leh anăn sĭt suôr khăng atăt kơ klei mkăp hơĭt kjăp. Hlăm klei hdĭp mngăt ăt msĕ snăn mơh, klei đĭ kyar amâo hriê mtam ôh, ƀiădah mơ̆ng bruă điêt grăp hruê: wah lač, dlăng, hriăm Klei Aê Diê Blŭ, gưt asăp hlue ngă leh anăn ngă bruă sĭt suôr. Tơdah drei kriê dlăng jăk dŭm bruă Aê Diê jao, amâo djŏ knŏng hjăn pô mâo klei jăk mơak ôh ƀiădah phung riêng gah ăt mâo klei tŭ dưn mơh: “Ih srăng mâo êa ksâo bê djăp kơ mnơ̆ng ih ƀơ̆ng huă, wăt kơ phung mnuih hlăm sang ih, leh anăn kơ phung dĭng buăl mniê ih” (êlan 27).
Grăp čô drei mâo Aê Diê jao bruă kriê dlăng sa êpul biăp, anăn jing gŏ sang, Phung Sang Aê Diê, êpul điêt, êpul bruă… Brei ngă sa čô kriê dlăng sĭt suôr kơ Aê Diê, kreh kriăng leh anăn jih ai tiê kriê dlăng êpul biăp Aê Diê jao. Aê Diê srăng mkăp kơ ya klei čiăng kơ drei mă bruă leh anăn ba klei tŭ dưn kơ bruă Aê Diê, Phung Sang Aê Diê bi mđĭ ai leh anăn mđĭ kyar.
Si drei dôk kriê dlăng ngăn drăp Aê Diê jao kơ pô?
Wah lač: Ơ Khua Yang, akâo kơ Ih đru kâo sĭt suôr kriê dlăng djăp mta klei Ih jao leh anăn đăo knang nanao kơ klei Ih mkăp. Akâo kơ Ih đru kâo đăo knang kluôm ênŭm hlăm Ih leh anăn jing boh tâo kjăp êđăp ênang lă lar kơ kâo. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
