Yausuas 7:1-5
Nqe cim:
“Cia siab rau tus TSWV kom kawg koj lub siab lub ntsws. Tsis txhob cia siab rau koj tej kev txawj ntse” (Pajlug 3:5)
Lus nug ws xav:
– Yausuas thiab cov Yixalayees tau raug yuam kev loj li cas?
– Vim li cas Vajtswv haivneeg yuav swb rog ntawm lub nroog A-is uas me me?
– Zaj kawm no ceebtoom peb ua neej li cas kom pheej txais tau Vajtswv coj kev txhua hnub?
Tom qab tej txujci hla tus Dej Yaladees thiab kovyeej lub nroog Yelikaus, Vajlugkub sau tseg hais tias: “Tus TSWV nrog nraim Yausuas, ua rau nws lub koob lub npe nrov ncha moo lug mus thoob lub tebchaws” (Yausuas 6:27). Lub sijhawm no Vajtswv haivneeg mus tua lub nroog A-is, uas yog ib lub nroog me me xwb. Tiamsis thaum no, Yausuas thiab cov Yixalayees tau ua ib qho yuam kev loj heev. Nqe xubthawj ntawm tshooj no pib lo lus “tiamsis”. Thaum ntawd yog lub sijhawm uas tsimnyog cov Yixalayees yuav tsum mloog Vajtswv lus txuas ntxiv vim Nws twb ua txujci pab lawv thiab pub lawv muaj koobmeej, tiamsis lawv rov poob rau kev txhaum, vim Akhas tau nyiag tej khoom uas Vajtswv tau samhwm muab rhuav pov tseg ntawm lub nroog Yelikaus. Raws li Vajtswv tau samhwm txij tiam thaum Mauxes nyob los hais tias lub nroog thiab txhua yam uas nyob hauv lub nroog yuav tsum muab rhuav pov tseg, tsuas yog tshwj nyiaj, kub, tooj dag, hlau thiaj li muab cais tawm ua yam khoom dawbhuv coj los tso rau hauv tus Tswv lub txhab xwb (Yausuas 6:18–19). Vim li ntawd, tus Tswv thiaj li chim heev rau cov neeg Yixalayees.
Tsis paub txog txoj kev txhaum uas Vajtswv haiv neeg tau ua, kuj tsis tos mloog saib Vajtswv yuav hais li cas ib yam li yav tas los, Yausuas cimciv txiav txim siab txib neeg mus soj lub nroog A-is, thiab coj peb txhiab leej tubrog mus tua lub nroog ntawd. Yausuas mloog raws li cov tub soj tebchaws tej lus uas hais tias lub nroog ntawd yeej yoojyim txeeb tau heev, cov neeg nyob hauv lub nroog no tsis coob, tsis tas yuav coj tagnrho cov tubrog mus tua. Qhov no yog ib qho yuam kev txuas ntxiv uas Yausuas tau ua. Thaum Yausuas cia li ua raws li cov tub soj tebchaws hais, vamkhom nws pab tub rog thiab nws tus kheej txoj kev txawj ntse los hloov qhov uas thov Vajtswv tus dej siab, lawv thiaj raug cov neeg A-is raws khiav thiab tua lawv tuag peb caug rau leej tubrog. Cov neeg Yixayees lub siab poob nthav thiab ntshai kawg nkaus, ntshai npaum li cov vajntxwv ntawm lwm haivneeg ntshai cov Yixayees thaum hnov hais tias lawv hla dhau tus Dej Yauladees lawm (Yausuas 5:1).
Cov Yixalayees tau Vajtswv pub kovyeej lub nroog Yelikaus uas muaj ntsayeej ruaj khov thiab muaj neeg coob, tej zaum Yausuas thiab cov neeg soj tebchaws thiaj pib khavtheeb thiab tso siab rau lawv tus kheej. Lawv pom hais tias yus tsis tsum ua raws tus Tswv kev taw qhia lawm, tshwjxeeb yog thaum yuav mus tua lub nroog me uas muaj neeg tsawg heev li lub nroog A-is. Yog cov ntseeg kuj rov cim civ txaus siab khavtheeb thaum uas tabtom tau Vajtswv tivthaiv, pub muaj kev kaj siab, vam meej, ces tej zaum peb kuj yuav ntsib tej teebmeem zoo ib yam li ntawd. Thaum peb tsis ceevfaj tej kev txhaum thiab tej kev sim siab hauv kev ua neej, tsis quavntsej txog kev sib raug zoo nrog Vajtswv, thiab tsis nrhiav Nws txoj kev coj txuas ntxiv los ntawm Nws Txojlus, ces peb yuav poob swb yoojyim. Zaj kawm no ceebtoom peb tsis txhob khavtheeb thiab tsis txhob tso siab rau peb lub dag zog. Thov Vajtswv pab kom peb paub vamkhom Nws hauv txhua txoj kev tawmtsam hauv lub neej, kub siab rau kev tuaj pehawm Vajtswv, kev thov Vajtswv, thiab kawm Nws Txojlus txhua hnub kom peb tau txais lub zog thiab Nws txoj kev coj mus li.
Thov Vajtswv,
Tus Tswv, thov pab kom nyuam yaus tsis txhob tso siab rau nyuam yaus tus kheej, tiamsis vamkhom Koj ib leeg xwb. Thov pub nyuam yaus kovyeej txhua txoj kev dag ntxias thiab kev sim siab, thiab ua raws li Koj Txojlus qhia txhua hnub. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Thaum peb ntsib ib qho teebmeem me me, feem ntau peb daws li cas?
Nyeem Vajluskub hauv peb lub xyoos: 2 Kauleethaus 8
Kênh Youtube BHKTHN:
