Tơdrong Pơđơ̆k 27:23-27
“Ih lăng băt kơnăl kơ triu ih sư thoi yơ, Păng bơwei lu khul rơmo ih mă ‘lơ̆ng.”
(Tơdrong Pơđơ̆k 27:23)
Nơ̆r jet tơchĕng pơwao:
- Lăm chăl Tơdrong Pơđơ̆k ‘nâu bơtho gah pêng tơdrong ayơ kăl kơ wei tơnăp păng bơwei dôm tơdrong kiơ Kră Yang ‘Bok Kei-Dei pơjao?
- Rim ‘nu kơ bơ̆n Kră Yang pơjao bơwei khul triu ayơ?
- Lu bơ̆n kăl kơ wei lăng păng bơwei thoi yơ?
Lăm chăl Tơdrong Pơđơ̆k 27:23-27 bơtho gah tơdrong pơnam păng jơhngơ̆m bơngai wei tơnăp. Rup pơma kơ bơngai wei triu sư tơ‘bôh tơdrong tơm gĭt kăl: Dah bơn pơ‘lơ̆ng, năp wei lăng dôm tơdrong kiơ ‘Bok Kei-Dei pơjao, Sư gô ăn kơ bơ̆n dôm tơdrong bơ̆n kăl wă. Roi tơdrong tơ kơpal dei tơ‘bôh đơ̆ng pêng tơdrong.
Mă mônh, ih athei pơ‘lơ̆ng, băt hơđăl dôm tơdrong kiơ đei pơjao kơ ih. Pơtao Sôlômôn bơtho pơlung: “Ih lăng băt kơnăl kơ triu ih sư thoi yơ, păng bơwei lu khul rơmo ih mă ‘lơ̆ng.” (trong 23). Lăm nơ̆r ‘Bok Kei-Dei khul triu păng bơbe noh tơmam tơm lăm tơdrong arih lăm hnam dơnŏ. Bơngai wei kăl kơ adrin chă lăng, bơwei păng wei lăng triu bơ̆n: Dah pơhơi phŏ lu sư ưh kơ arih. Tơdrong tơm kăl ‘nâu kư̆m yua iŏk tơdrong arih gah bơhngol. ‘Bok Kei-Dei pơjao kơ bơ̆n hiơ̆k lơ tơdrong thoi kơ tơdrong arih gah bơhngol, hnam dơnŏ, tơdrong jang, jơ năr păng tơmam. Bơngai lui kăl kơ hiơ̆k păng bơwei dôm tơdrong noh mă pơ‘lơ̆ng, Tơdrong tơnăp pơtơm đơ̆ng tơdrong lăng hiơ̆k kơ dôm tơdrong kiơ ‘Bok Kei-Dei pơjao.
Mă ‘bar, mŭk tơmam păng tơdrong pran ưh kơ đei oei ling lang ôh (trong 24). Môk pơtao tơ‘bôh tơdrong pran, anih jang phŏ kư̆m ưh pă oei đei yua kơ sơnăm rai kră, chăl arih kư̆m tơplih kơlih kơ thoi noh, kon pơlei Kră Yang ‘nĕ chă tơdrong hiôk hơđơ̆ng kơdih đơ̆ng tơmam, mălei athei lui gơnang kơ Kră Yang ‘Bok Kei-Dei păng wei gơh hơgei dôm tơdrong kiơ Kră Yang ăn.
Mă pêng, bơngai pơnam gô đei yua ‘lơ̆ng đơ̆ng tơdrong jang sư kơdih (trong 25-27). Tơdah bơngai wei triu sư mă pơnam, triu gô tơgŭm sư ao hrŭk, tơmam sa păng tơmam kăl wă kơ hnam dơnŏ. Tơdrong ‘nâu bơtho khan tơdrong pơnam păng tơnăp ngăl ba đei tơdrong kơjăp. Lăm tơdrong arih gah bơhngol kư̆m thoi ei, tơdrong wơ̆ lŏ ưh kơ hrei hrei đĕch ôh, mălei đơ̆ng dôm tơdrong iĕ rim năr: krao khan, đŏk, pơhrăm nơ̆r Kră Yang, chu pơm kiơ̆ păng bơ̆jang tơnăp. Dah bơ̆n wei ‘lơ̆ng dôm tơdrong ‘Bok Kei-Dei pơjao, ưh kơ sĭ bơ̆n kơdih đĕch đei pŭn hiôk na bơngai jum dăr kŭm đei yua: “Đak toh bơbe pơm tơmam sa kơ ih hăm lu bơngai lăm hnam, Ih păng kơ lu đam drŏ-kăn ih arih sa.” (trong 27).
Rim kơ bơ̆n Kră Yang pơjao wei khul triu, noh hnam dơnŏ, khul bơngai lui, anih akŭm, rim khul đei tơdrong jang…. Athei pơm bơngai wei lăng tơnăp kơ Kră Yang, pơnam păng đĭ jơhgơ̆m wei triu Kră Yang pơjao. Kră Yang gô ăn tơdrong lu bơ̆n kăl wă kơ bơ̆n bơ̆jang păng đei yua ăn kơ tơdrong jang Kră Yang, khul bơngai lui pơjing tơ iung păng wơ̆ pran.
Ơ Kră Yang, apinh Ih tơgŭm inh tơnăp wei lăng tôm tơdrong Ih pơjao păng ling lang gơnang kơ tơdrong Ih ăn. Apinh Ih ăn kơ inh lui kơ Ih jơ̆ tơmo inh kơ‘nơp linh lang. Krao khan yua anăn Kră Yang Yêsus Krist, Amen.
Lu bơ̆n oei bơwei dôm tơmam Kră Yang pơjao kơ ih thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Kôrintô 10
Kênh Youtube BHKTHN:
