2 Petus 1:12-15
Nqe cim:
“Yog li ntawd, kuv xav kom nej nco tej ntawd cia, thaum dua kuv lawm nej thiaj yuav nco ntsoov mus li” (2 Petus 1:15)
Lus nug xav:
– Timthawj Petus qhia tshwm tus qhia Vajtswv Txojlus lub siab zoo li cas?
– Yam dabtsi txhawb timthawj Petus, thiab cov uas niaj hnub nim no qhia Vajtswv Txojlus kom tas siab rau yus lub luag haujlwm?
– Peb tau txais kev txhawb zog li cas txog tus qhia Vajtswv Txojlus lub siab?
Ua tus Cevlus saum Ntuj Ceebtsheej thiab kuj yog tus uas qhia Vajtswv Txojlus, timthawj Petus qhia nws lub siab hauv nqe Vajlugkub hnub no hais tias, yam uas nws ntshaw tshaj yog kom cov ntseeg uas nws qhia Vajtswv Txojlus rau lawd loj hlob hauv txoj kev ntseeg. Zoo ib yam li tus xibhwb cob qhia uas mob siab rau nws cov tub kawm, txawm cov ntseeg twb paub qhov tseeb lawd, tiamsis nws yog ib tug uas tshaj tawm thiab qhia Vajtswv Txojlus ces tes haujlwm uas nws ua yuav ua tsis so thiab pheej ntuas lawv txog Vajtswv Txojlus tseeb ntawd mus tas li.
Dhau los ntawm Petus lub siab no, peb pom peb yam uas txhawb nws, thiab kuj txhawb cov uas qhia Vajtswv Txojlus niaj hnub nimno kom lawv ua lawv tes haujlwm kawg siab kawg ntsws. Tim ib, Petus paub hais tias lub homphiaj ntawm txoj haujlwm qhia Vajtswv Txojlus yog siv Vajtswv Txojlus los qhuab ntuas, ceebtoom tsa cov ntseeg kom tsim dheev los “Thaum kuv tseem ua neej nyob no kuv xav hais tias tsimnyog kuv yuav tsum ntuas kom nej nco ntsoov tej ntawd” (nqe 13). Vim txoj haujlwm qhia Vajtswv Txojlus yog ib txoj haujlwm muaj nqis heev thiab yog ib lub luag haujlwm dawbhuv uas Vajtswv muab cob rau txhua tus uas Nws hu. Tim ob, Petus kuj paub hais tias txoj haujlwm no yog yam uas tsimnyog ua thiab yog yam uas nws yuav tsum ua mus tas nws sim neej. Tim peb, tus Tswv Yexus twb qhia Petus lawm hais tias tsis ntev nws yuav ncaim lub ntiajteb no mus (nqe 14). Thaum nws paub hais tias nws lub sijhawm tseemceeb tshuav tsis ntev lawm, nws yim huab siv zog ua haujlwm kawg siab kawg ntsws kom tiav raws li Vajtswv tau muab cob rau nws lawm, txawm nws mus nrog Tus Tswv nyob lawm los, kom cov ntseeg tseem nco ntsoov thiab ua raws li Vajtswv Txojlus uas lawv twb tau kawm lawm.
Dhau los ntawm timthawj Petus lub siab hauv nws tes haujlwm ua tus qhia Vajtswv Txojlus, txhawb peb zog kom npaj siab kawm Vajtswv Txojlus thiab kam cia yus zoo li ib tug tub kawm cia lwm tus cob qhia kom “Tus TSWV uas yog Vajtswv pub tswvyim rau kuv” (Yaxayas 50:4). Thaum uas tau Vajtswv hu peb los ua tes haujlwm qhia Vajtswv Txojlus, peb yuavtsum paub meej hais tias lub homphiaj ntawm tes haujlwm no yog pab kom peb cov kwvtij ntseeg paub Vajtswv thiab loj hlob sab ntsujplig. Yog li ntawd, txawm ntsib kev khwv los yog kev zoo siab, nyuaj siab hauv kev ua haujlwm, los peb yuavtsum sawv ruaj khov rau peb lub luag haujlwm. Lub neej ntiajteb muaj nrim, yuavtsum zeem paub yus lub sijhawm ib hnub luv zuj zus mus lawm, thiab Vajtswv siv ib tug rau ib ntu caijnyoog ntawm keeb kwm Pawg ntseeg. Yog peb tsis npaj txhij ua ces Nws yuav hu lwm tus los ua. Thov Vajtswv pub rau peb yog tus uas qhia Vajtswv Txojlus, ces peb tas siab tseb tawm txoj kev ntseeg tseeb, yog peb yog tus kawm Vajtswv Txojlus, thov kom peb tshaib nqhis Nws Txojlus kom peb sab ntsujplig loj hlob thiab tom qab ntawd Vajtswv yuav siv peb los qhia lwm tus thiab.
Thov Vajtswv,
Tus Tswv, thov pub rau nyuam yaus muaj lub siab ntshaw kawm paub Koj thiab kawm Koj Txojlus txhua hnub. Thov Koj qhia nyuam yaus, cob qhia nyuam yaus, thiab siv nyuam yaus los ua tus ncaj ncees qhia Koj Txojlus thiab mob siab rau tes haujlwm Koj cob. Thov pub nyuam yaus pab tau lwm tus kawm paub Koj Txojlus thiab loj hlob sawv ruaj khov rau hauv txoj kev ntseeg. Nyuam yaus tuav Tswv Yexus Khetos lub npe thov, Amees.
Peb tabtom xyaum coj raws li timthawj Petus tus qauv li cas?
Nyeem Vajluskub hauv peb lub xyoos: 2 Kauleethaus 11
Kênh Youtube BHKTHN:
