Klei Aê Diê Blŭ: Y-Yôsuê 7:6-9
Êlan kliăng: “Hŏng klei kdjăt kâo lač,“Arăng suôt kâo leh kbưi mơ̆ng anăp ală Ih.” Ƀiădah Ih hmư̆ leh asăp kâo wah lač kơ Ih, tơdah kâo kwưh kơ Ih đru.” (Klei Mmuñ Hđăp 31:22)
Klei êmuh ksiêm mĭn: Ya klei Y-Yôsuê ngă ti anăp klei amâo dưi bi blah? Ksiêm dlăng kơ klei Y-Yôsuê wah lač? Tuôm hŏng klei amâo dưi, lông dlăng, si drei srăng ngă tơdah ka ƀuh klei Aê Diê bi mtlaih?
Leh găn klei bi blah amâo dưi ôh hŏng ƀuôn Ahi. Ai tiê phung ƀuôn sang Israel dlưh msĕ si êa đoh, leh anăn ai tiê Y-Yôsuê ăt bŏ hŏng luč klei čang hmăng leh anăn huĭ hyưt. Ñu hŏng phung khua mduôn, bi ala kơ jih jang Israel, nao buôn kkuh ti anăp hip Yêhôwa jih sa hruê sui tơl truh tlam mmăt. Diñu hiêk čhiăm ao leh anăn ƀui ƀruih lăn ti boh kŏ diñu, bi êdah klei ênguôt hnĭng prŏng snăk.
Hlăm klei ênguôt hnĭng, Y-Yôsuê êmuh Aê Diê tlâo klei. Tal sa, ya ngă Aê Diê ba phung ƀuôn sang Ñu găn êa krông Yurdan jao digơ̆ hlăm kngan phung ƀuôn sang Amôrit? Hlăk đưm dih Aê Diê ƀuăn Ih srăng ngă kơ phung roh wir rŏng êran đuê̆ ti anăp kâo (Klei Kbiă 23:27), ƀiădah ară anei, hlăk phung ƀuôn sang Kanaan leh anăn phung ƀuôn sang hlăm krĭng anei hmư̆ arăng mblah dưi hŏng Israel, ñu rŭng răng digơ̆ srăng ktang ksŭng blah leh anăn kwang dar phung ƀuôn sang Ñu (êlan 9). Tal tlâo, Aê Diê srăng ngă kơ Anăn prŏng Ñu amâo hmăi ôh tơdah arăng mdjiê phung ƀuôn sang Ñu? Y-Yôsuê đăo Aê Diê ăt jing Aê Diê pô myang leh anăn klei amâo tŭ jing diñu tuôm jing kyua Aê Diê brei truh. Kyua anăn, ñu akâo kơ Aê Diê kyua Anăn Aê Diê đru brei phung ƀuôn sang Israel.
Wăt tơdah jing sa čô khua gĭt gai khăp leh anăn huĭ mpŭ kơ Aê Diê, ƀiădah Y-Yôsuê ăt kăn dưi tlaih kơ klei soh. Ñu ăt kăn dưi ñĕ mơh kơ klei huĭ hyưt, đăo đing kơ klei răng mgang leh anăn klei khăp Aê Diê brei kơ pô hŏng phung ƀuôn sang, wăt tơdah ƀuh leh klei myang Aê Diê brei găn êa krông Yurdan leh anăn plah mă ƀuôn Yêrikô. Năng ai ñu akâo kơ Aê Diê lač kơ ya klei soh hlăm klei hdĭp pô leh anăn phung ƀuôn sang, snăn ñu lŏ êmuh Aê Diê. Ñu amâo thâo săng ôh êlan Aê Diê. Ñu amâo thâo săng ôh ya ngă msĕ si Aê Diê amâo djă pioh ôh klei bi mguôp hŏng phung ƀuôn sang Ñu, kyua hlăk anei ñu ka thâo ôh ya klei soh Y-Akan. Khădah snăn, hlăm klei rŭng răng klei hdĭp pô, ñu leh anăn phung khua mduôn ăt bi êdah klei đăo, tui duah Aê Diê, tuh êyuh ai tiê pô leh anăn akâo kơ klei Aê Diê pap. Kyua anăn, Aê Diê bŏ hŏng klei pap ktrâo leh kơ ñu klei msir mgaih klei truh.
Ăt srăng mâo mmông drei ƀuh pô dôk hlăm klei luč čang hmăng, amâo tŭ jing, leh anăn ăt mâo lu snăk klei êmuh ya ngă, ăt msĕ mơh đing kơ klei khăp Aê Diê. Hrô kơ kdŭn tluôn, brei nao kơ Aê Diê leh anăn tuh êyuh ai tiê pô, akâo klei Ñu pap brei. Êlâo hĭn, brei hưn ya klei soh pô leh anăn akâo kơ Aê Diê bi êdah ya klei soh pô ka ƀuh jih năng ai ngă kơ pô amâo tŭ jing, tuôm hŏng dleh dlan. Brei wah lač hŏng Aê Diê, Ñu amâo tuôm lui drei ôh.
Mâo mơ̆ tăp năng drei đing kơ klei khăp Aê Diê? Hlăk anăn ya klei drei ngă?
Wah lač: Ơ Khua Yang, akâo kơ Ih đru kâo hdơr nanao kơ klei myang, ya klei jăk siam Ih ngă leh leh anăn dôk ngă kơ kâo. Tơdah tuôm hŏng klei dleh dlan, akâo kơ Ih đru kâo đăo knang nanao kơ klei khăp Ih leh anăn tui duah klei bi mtlaih mơ̆ng Ih. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
