Klei Aê Diê Blŭ: Y-Mathiơ 5:7
Êlan kliăng: “Jăk mơak yơh phung thâo pap, kyuadah Aê Diê srăng pap kơ diñu.” (Y-Mathiơ 5:7)
Klei êmuh ksiêm mĭn: Si mblang klei thâo pap jing? Ya ngă Khua Yang Yêsu kñăm, klei thâo pap jing sa mta knuih amâo dưi kƀah ôh kơ phung ƀuôn sang Ƀuôn Ala Mtao Adiê? Si drei dôk hdĭp tui si knuih anei?
Klei jăk mơak tal êma hlăm sapăn klei jăk mơak kčưm dơ̆ng kơ Klei Mtô Ti Dlông Čư̆ mơ̆ng Khua Yang Yêsu jing “Thâo pap”, hlăm boh blŭ Grek mblang jing “đru phung knap mñai, dŏng mtlaih phung năng pap”. Pô mblang Klei Aê Diê Blŭ William Barclay čih leh hlăm hdruôm hră mblang Y-Mathiơ snei: “Thâo pap amâo djŏ ôh knŏng čiăng lač kơ klei mgei ai tiê pap kơ phung knap mñai, hlue si klei mblang yang đar. Thâo pap tui si klei blŭ Hêbrơ leh anăn klei blŭ Aram jing ‘Chesedh’ jing klei thâo dưm drei pô hlăm anôk mnuih anăn jing, tơl kơ drei dlăng ƀuh jih jang mnơ̆ng msĕ si pô anăn, bi mĭn msĕ hŏng klei mĭn pô anăn, leh anăn thâo săng msĕ hŏng klei pô anăn thâo săng”.
Khua Yang Yêsu bi klă leh klei mblang kơ boh hră “thâo pap” hlăm klei bi hriêng kơ sa čô Samari jăk. Leh yăl dliê klei bi hriêng, Khua Yang êmuh phung khua mtô klei bhiăn: “Hlei hlăm phung tlâo čô anăn ih mĭn jing pô riêng gah kơ êkei tuôm hŏng phung knĕ anăn?” Khua klei bhiăn lŏ wĭt lač, “Pô bi êdah leh klei pap kơ gơ̆ yơh.” (Y-Luk 10:36-37). Sa čô Samari anăn amâo knŏng mgei ai tiê ôh, ƀiădah wăt dưm ñu pô hlăm anôk pô dôk găn klei truh msĕ mơh, thâo kral klei gơ̆ dôk čiăng, leh anăn wĭt ngă kơ klei gơ̆ čiăng hŏng jih hnơ̆ng ñu dưi ngă.
Khua Yang Yêsu kñăm kơ klei thâo pap, kyuadah knuih thâo pap amâo mâo yap yuôm ôh hlăm ênuk anăn. Hŏng phung Rôm, klei pap yap msĕ si klei awăt êdu, leh anăn hlăm klei diñu bi blah plah mă čar mkăn, amâo tuôm mâo klei mĭn ai tiê thâo pap ôh. Bi hŏng phung Israel, diñu knŏng khăp kơ hlei pô khăp kơ diñu, leh anăn knŏng pap kơ hlei pô thâo pap kơ diñu đuč. Khua Yang Yêsu ƀuah kơ klei mĭn anei tơdah Ñu lač: “Diih hmư̆ leh arăng lač đưm, ‘Brei ih khăp kơ pô riêng gah ih leh anăn bi êmut kơ pô roh ih.’ Ƀiădah Kâo lač kơ diih, khăp bĕ kơ phung roh diih, leh anăn wah lač brei kơ phung ngă jhat kơ diih,” (Y-Mathiơ 5:43-44).
Hlăm Klei Aê Diê Blŭ, klei pap leh anăn klei thâo pap nao hrăm mbĭt (I Y-Timôthê 1:2), ƀiădah ăt mâo mơh klei mdê ƀiă. Klei pap jing klei wĭt lač kơ klei soh, bi klei thâo pap jing klei wĭt lač kơ boh jhat mơ̆ng klei soh. Klei pap bi êdah kơ mnuih amâo mâo klei năng dưi mă tŭ ôh, bi klei thâo pap jing klei khăp kơ mnuih dôk hlăm klei knap mñai.
Drei lu blư̆ mă tŭ klei pap mơ̆ng Aê Diê tơdah Ñu pap brei kơ klei soh drei leh anăn lŏ bi mrâo drei, leh anăn ăt tuôm mă tŭ klei thâo pap mơ̆ng ayŏng amai adei hlăm Phung Sang Aê Diê (Philip 2:1-2), kyuanăn brei drei mâo klei thâo săng brei leh anăn thâo pap kơ phung knap mñai msĕ mơh. Aê Diê jing Pô ƀuh jih hlăm ai tiê grăp čô mnuih, leh anăn klei ñu čiăng ƀuh amâo djŏ knŏng bruă ngă klei pap ôh, ƀiădah wăt ai tiê thâo pap mơh, kyuadah Khua Yang drei jing Pô Thâo Pap (Y-Luk 6:36).
Si ngă drei thâo kral mơ̆ Khua Yang pap kơ drei leh anăn drei bi êdah ai tiê thâo pap kơ mnuih mkăn mơ̆?
Wah lač: Ơ Khua Yang, bi mni lač jăk kơ Khua Yang kyua pap brei leh kơ kâo leh anăn wăt pap brei jih jang klei soh kâo grăp blư̆ kâo êran nao kơ Ih. Akâo Khua Yang brei kâo mâo nanao klei khăp Khua Yang, čiăng kơ kâo bi êdah ai tiê thâo pap kơ ayŏng amai adei dôk găn klei knap mñai jŭm dar kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 41
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
