Jôsuê 6:17-27
“Thoi noh Jôsuê wei-lăng tơdrong arih Rahap bơngai drŏ-kăn đi, hăm đĭ-đăng lu bơngai lăm hnam dơnŏ ‘bă sư, lu sư oei hơdai hăm lu bơngai Isơrael, truh tơ dang ei, yua kơ sư đei ôn bre bơngai chop lăng, mă Jôsuê wơh năm chop lăng pơlei Jêrikô.” (Jôsuê 6:25)
Nơ̆r jet tơchĕng pơwao:
– Kră Yang khan kơ kon pơlei Isơrael athei pơm thoi yơ tôm tơmam lăm pơlei Jêrikô?
– Đơ̆ng tơdrong noh bơ̆n băt kiơ gah Kră Yang?
– Bơ̆n kăl kơ pơm kiơ kơplah băt tơdrong Kră Yang wă phak păng ăn tơdrong arih?
Đơ̆ng rŏng kơ blah pơrăm pơlei Jêrikô, Kră Yang ‘Bok Kei-Dei pơkă khan kơ kon pơlei Isơrael athei pơrăm đĭ tôm tơmam lăm pơlei Jêrikô đơ̆ng bơngai truh tơ sem dơrong (trong 17). Tơdrong kơnê̆ dêh tơpă, tơdrong yoch kơkuh kơ rup yang đơ̆ng kon pơlei Kanaan gô pơrăm yua kơ ‘bơm kơnê̆ truh kơ kon pơlei Kră Yang, nhen thoi tơdrong jĭ ŭng thư, dah ưh kơ kăt tŭk lê̆ sư gô rai lanh. Lu tơdrong yoch krưp đơ̆ng kon pơlei Kanaan Kră Yang đei tơ’blŏk đơ̆ng sơ̆ noh tơdrong yoch krưp dêh, pơm pơyô̆ krưp dêh oei sa kư̆ kă (Lêwi 18), ‘buh soh kon hơ’lơ̆p bơ̆n kơdih pơyơ̆r kơ yang Malŏk (Bơtho khôi juăt 12:29-31). Kră Yang tơbăt lê̆ adrol bơih gô phak lu sư yua kơ tơdrong yoch lu sư (Lêwi 18:27). Kư̆m đei khan tơbăt kơ kon pơlei ‘nĕ kơ pơm dôm tơdrong yoch krưp thoi kon pơlei ‘nâu, dah ưh kơ chu kư̆m gô phak mơ̆n. Kơplah ‘noh sơ̆, Kră Yang kư̆m đei pơkă mưh layơ kon pơlei Sư mơ̆t tơ dêh lu sư wă iŏk oei lei na lu sư gô pơrăm đĭ lu kon pơlei mă oei tơ dêh noh. Dah ưh, lu kon pơlei ‘nâu gô pơhlŭ lu sư achăng lê̆ Kră Yang an achăng lê̆ Kră Yang păng đơ̆ng noh lu sư pŭ iŏk tơdrong ‘Bok Kei-Dei hil mĭl păng ‘bônh kơ jah pơrăm (Bơtho khôi juăt 7:1-5). ‘Bok Kei-Dei jơ̆ Tơ’ngla ưh kơ mơnat kơ kon pơlei ayơ ôh, mă khan kon pơlei Sư. Lu sư athei băt lu sư jơ̆ kon pơlei ‘lơ̆ng rơgoh gah Kră Yang, minh kon pơlei gah Kră Yang ‘Bok Kei-Dei.
Mă khan lei ră, lăm pơlei Jêrikô đei yă Rahap, mă khan minh ‘nu bơngai đei tơdrong arih so hlôi kơnê̆ dêh, mălei sư hăm đĭ bơngai lăm hnam ‘bă sư, dôm tơmam gah sư, ưh kơ đei pơrăm. Đei dŏng păng sư arih hơđơ̆ng lăm kon pơlei Isơrael. Đơ̆ng sư lui kơ Kră Yang sư pơ̆n nuih bre bơngai Isơrael chop lăng na sư ưh kơ lôch hơdai hăm bơngai mă ưh kơ lui (Hêbrơ 11:31).
Tơdrong phak tơ’bôh tơdrong ‘lơ̆ng Kră Yang, păng Kră Yang wă kơ lu kon pơlei gah sư kư̆m athei ‘lơ̆ng rơgoh. Păng tơdrong phak ‘nâu kư̆m pơma kơ tơdrong pơrăm ling lang tơ anăp ning mônh ‘măn kơ lu bơngai yoch sơngah kuă lui kơ Kră Yang. Kră Yang Sư ‘Bok Kei-Dei ‘lơ̆ng tơpăt tơpă, kư̆m Tơ’ngla ‘mêm mơnat, Tơ’ngla sek tơlang păng kư̆m Tơ’ngla ăn tơdrong arih. Bơnê kơ Kră Yang đei ăn kơ bơ̆n băt tơdrong wă pơrăm lu bơngai sơngah kơ Kon Sư. Tơ’ngla chu lôch kơ kon bơngai yoch, păng ăn tơdrong arih kơ lu đe bu mă lui sơng iŏk ‘Bok Krist, bơ̆n gô arih pha ‘biơ̆ kơ lu bơngai ala teh, pơrăm lê̆ dôm tơdrong yoch lăm tơdrong arih, tơ’bôh đon lui đơng tơdrong ră roi kơ bơngai gah tơdrong hơmet tơdrong arih kơ bơngai bu tơbral, lui sơng iŏk Kră Yang păng phak lu đe bu mă arăng kơ̆l kuă kơ lui.
Ơ Kră Yang, inh bơnê kơ Ih yua kơ tơdrŏng pơklaih đei ăn kơ inh mă inh ưh kơ trŏ kơ Ih ‘mêm. Inh apinh chă tơdrong ‘lơ̆ng tơpăt Ih wă kiơ̆ Ih ưh kơ trŏ kiơ̆ teh đak âu. Apinh Ih tơgŭm inh tơ’bôh jơhngơ̆m băt bơnê đơ̆ng ră roi Tơdrong ‘Nao ‘Lơ̆ng kơ lơ bơngai. Krao khan yua anăn Kră Yang Yêsu Krist, Amen.
Bơ̆n tam đei ră roi kơ đe bu gah tơdrong Kră Yang wă phak sek tơlang păng ăn tơdrong arih ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Kôrintô 7
Kênh Youtube BHKTHN:
