Jôsuê 7:1-5
Gơnang bĕ kơ Kră Yang hăm đĭ jơhngơ̆m, ‘Nĕ kơ gơnang kơ đon hlôh wao ih”
(Tơdrong Pơđơ̆k 3:5)
Nơ̆r jet tơchĕng pơwao:
– ‘Bok Jôsuê păng kon pơlei Isơrael pơm yoch tih tơdrong kiơ?
– Yua kơ kiơ kon pơlei Kră Yang tơblah jei pơlei Ahi
– ‘Bai pơhrăm tơ’blŏk kơ lu bơ̆n kăl kơ arih thoi yơ wă kơ đei Kră Yang chông anhăk?
Đơ̆ng rŏng kơ đei tơdrong mơsêh tŏk hlôi kơ đak krong Jôđăn păng đei mơsêh blah pơlei Jêrikô jei kon pơlei Kră Yang. Nơ̆r Kră Yang đei chih: “Sư khan dơ̆ng kơ kon pơlei: Năm bĕ! Dăr tăp kơ pơlei hơdai păng lu bơngai chĕp khêl đao năm adrol kơ Hom Kră Yang.” (Jôsuê 6:27). Jơ ‘nâu kon pơlei Kră Yang năm blah pơlei Ahi, pơlei iĕ đĕch, mă-lei lăm âu ‘bok Jôsuê păng kon pơlei Isơrael đei pơm glăi tih tơpă, nơ̆r blŭng a lăm Hla bơar bơ̆n lăng ‘nâu pơma hăm nơ̆r “trŏ kơ” wă khan “mă-lei”’noh bơih trŏ kơ kon pơlei Isơrael pơtrơp chu mơ̆ng nơ̆r Kră Yang đơ̆ng rŏng kơ Kră Yang pơm tơdrong mơsêh păng pơư anăn lu sư, mă-lei lu sư pơm yoch yua kơ Akan đei iŏk tơmam tơmam gĭt lăm pơlei Jêrikô. Kiơ̆ kơ Nơ̆r Kră Yang khan iŏk đơ̆ng chăl ‘bok Môis sơ̆, pơlei Jêrikô ‘nâu păng dôm tơmam lăm pơlei âu gô pơrăm đĭ wă pơyơ̆r kơ Kră Yang, ‘nguaih kơ hu, maih, đĭ-đăng tơmam păng mam kong, bơsei gô ‘măn lê̆ pha ăn kơ Kră Yang ‘Bok Kei-Dei păng tah tơmơ̆t lăm hnam mong tơmam (Jôsuê 6:18-19).Kơlih kơ thoi noh na Kră Yang ‘Bok Kei-Dei iung hil mĭl kơ lu bơngai Isơrael.
Ưh kơ băt tơdrong yoch kon pơlei đei pơm yoch, ưh kơ chang gô mơ̆ng nơ̆r Kră Yang tơtă nhen thoi adrol ki, ‘bok Jôsuê kơdih sư wơh bơngai năm chop lăng, đơ̆ng chông anhăk pêng rơbâu ‘nu linh năm tơblah pơlei Ahi.’Bok Jôsuê mơ̆ng đơ̆ng nơ̆r lu bơngai khan pơlei ‘nâu iĕ ioch đĕch bơ̆n blah gô jei bơ̆n, bơngai lăm pơlei tŏ sĕt đĕch, ưh kơ kăl kơ chông ba kon pơlei, păng noh bơih tơdrong glăi mă ‘bar đơ̆ng Jôsuê.
Kơplah Jôsuê pơm kiơ̆ đơ̆ng nơ̆r lu bơngai năm chop lăng, gơnang kơ tơdrong pran kon pơlei kơdih păng tơdrong hơgei kơdih, ưh kơ krao khan apinh Kră Yang, tuch luch sư, lu sư pŭ iŏk tơdrong lu bơngai Ahi druh blah lu sư.păng pơlôch pêng jĭt rơbâu ‘nu. Jơhngơ̆m lu hli tơrơ thoi đak ro,ưh kơ phara kiơ kơ jơhngơ̆m lu pơtao dêh tơmoi tơrơ kơplah sư kơtơ̆ng kon pơlei Isơrael yak hlôi kơ đak krong Jôrđăn (Jôsuê 5:1). Kră Yang đei ăn kơ lu sư blah pơlei Jêrikô jei lu sư, dur hơ’bơ̆l kơjăp păng kon pơlei lơ lap lơ lang, rŏ lăng đei pơm ‘bok Jôsuê păng lu bơngai năm chop lăng noh jơhngơ̆m lu sư pơang,lu sư khan ưh kơ kăl kơ pơm kiơ̆ kơ nơ̆r Kră Yang bơtho tơ’bôh bơih, mă loi sư kơplah lu sư tơblah pơlei Ahi pơlei iĕ păng bơngai kơtuei wă jê̆ jei lu sư bơih. Dah Bơngai Lui dai pơang ưh kơ lăp đon kơ tơdrong Kră Yang bơwei, ăn hiôk hơđơ̆ng, kĕ jei, lei na kư̆m tơ’bơ̆p tơdrong anat thoi noh mơ̆n.Kơplah lu bơ̆n lăng pơhơi tơdrong yoch păng tơdrong pơhlŭ tơ ala teh âu, ưh kơ hiôk tơdrong tơ’bưh hăm Kră Yang ‘Bok Kei-Dei, ưh pă wă chơchă tơdrong Kră Yang chông anhăk đơ̆ng nơ̆r Sư na pơm kiơ̆, lei na gô ‘bônh kơ hiong răm. ‘Bai pơhrăm ‘nâu tơ’blŏk ăn kơ bơ̆n ‘nĕ kơ pơang, ‘nĕ kơ gơnang kơ jơhngơ̆m pran bơ̆n kơdih. Apinh Kră Yang ăn kơ lu bơ̆n ling-lang gơnang kơ Kră Yang lăm rim tơdrong tơblah lăm chăl arih bơ̆n, hưch hanh pơnam lăm tơdrong akŭm kơkuh, krao khan păng pơhrăm nơ̆r Kră Yang rim năr wă kơ đei jơhngơ̆m pran păng Kră Yang chông anhăk.
Ơ Kră Yang, lăm chăl arih pơmat tat âu, apinh Ih ‘nĕ ăn kơ inh gơnang kơ kĕ pran inh kơdih, huay kơ pơang na gơnang kơ Kră Yang ling-lang wă kơ lăm chăl arih inh kiơ̆ Ih âu, inh tơblah hăm tơdrong pơhlŭ, tơblah hăm tơdrong pơlong jei inh. Krao Khan yua anăn Kră Yang Yêsu Krist, Amen!
Bơ̆n tŏk-bŏk dơ̆ng ‘bơ̆t tơdrong pơmat tat nhen thoi đei tơdrong truh tih,bơ̆n ngăl pơm kiơ wă hơmet pơkkeh tơdrong noh?
Đŏk Sơ̆p Hla bơar Nơ̆r ‘Bok Kei-Dei lăm pêng sơnăm: II Kôrintô 8
Kênh Youtube BHKTHN:
