I Kôrintô 8:1-13
“Dôm tơmam sa ưh kơ đei tơgŭm bơ̆n lui kơ ‘Bok Kei-Dei kơjăp ôh. Păng mă tơmam đe sơmah dah đe pơm kiơ kiơ, dah bơ̆n kơ̆m kơ sa, sư kư̆m ưh kơ pơm kơ bơ̆n lui rơdu ôh. Mă bơ̆n pơm kư̆ kă sa tôm-tĕch tơmam đe sơmah dah đe ‘buh sa pơm kiơ kiơ, sư kư̆m ưh kơ gơh pơm kơ bơ̆n lui rai kơjăp hloh mơ̆n.”
(I Kôrintô 8:8)
Nơ̆r jet tơchĕng pơwao:
– Pôl jơ̆ng ‘bang bơtho thoi yơ gah tơdrong sa dah ưh kơ tơmam đe soi sơmah kơ yang?
– Lu bơ̆n pơhrăm iŏk tơdrong kiơ gah chăl arih lui yom kăl kơ đei?
– Lu bơ̆n yua iŏk ‘bai pơhrăm thoi yơ wă tơiung đon lui dih băl?
Lăm jơhngơ̆m bơngai lui pơlei Kôrintô, arih mơdro ‘nhĕm, tơ anih kơkuh kơ rup yang păng anih tơ kơ chơ tih lu ‘nhĕm đêl soi sơmah kơ yang, lu bơngai hlôh băt ngeh kơ minh ‘nu Kră Yang ‘Bok Kei-Dei, na rup yang ưh kơ sĭ rup yang tơpă ôh, ưh kơ gơh pơm kơnê̆ kơ tơmam sa (trong 4) thoi noh na lu sư răt iŏk tơmam sa đơ̆ng anih soi sơmah dah đơ̆ng kơ chơ, dah đei krao wơ̆n đơ̆ng rŏng kơ soi sơmah, lu sư oei sa đĕch tơmam noh. Mă khan lei ră, lu bơngai lui tam mă hlôh ‘nao weh đơ̆ng anih soi sơmah kơ rup yang na lăng tơdrong noh na achăng lê̆ hloi bơih mă đêl juăt kơ pơm sơ̆, thoi noh, sa tơmam soi sơmah kơ yang pơm kơ lu sư ‘blŏk ming dơ̆ng năr phĕt noh sơ̆. Kơplah wă sa, sư khan sư pơm yoch bơih. (trong 7). Kơplah lu sư ‘bôh lu bơngai đei đon lui kơjăp ‘biơ̆ sa tơmam đe soi sơmah kơ yang, pơm kơ lu sư ‘bôh glăi (trong 9-11). ‘Bok Pôl tơblang rơđah khan: “Dôm tơmam sa ưh kơ đei tơgŭm bơ̆n lui kơ ‘Bok Kei-Dei kơjăp ôh. Păng mă tơmam đe sơmah dah đe pơm kiơ kiơ, dah bơ̆n kơ̆m kơ sa, sư kư̆m ưh kơ pơm kơ bơ̆n lui rơdu ôh. Mă bơ̆n pơm kư̆ kă sa tôm-tĕch tơmam đe sơmah dah đe ‘buh sa pơm kiơ kiơ, sư kư̆m ưh kơ gơh pơm kơ bơ̆n lui rai kơjăp hloh mơ̆n.” (Trong 8). Mă khan lei ră, kiơ̆ jơhngơ̆m “Đe khan: Bơngai lui gơh pơm tôm tơdrong kư̆m bưh, ưh kơ đei kơ̆m ôh. Trŏ mơ̆n, mă-lei kư̆m đei tơdrong ưh kơ pơyua kơ bôl buăl dah ‘Bok Kei-Dei ôh. Bơ̆n kư̆m kuă pơm thoi noh kơnh pơmat kơdih đĕch.” (I Kôrintô 6:12) kiơ̆ kơ tơdrong hlôh băt gah tơmam đe soi sơmah ưh kơ ‘mê̆ ‘mach ôh ưh kơ trŏ bơ̆n yua đơ̆ng tơdrong noh wă pơm lu tơdrong pơm kơ đe ‘bôh bơ̆n pơm glăi ôh. Dah tơdrong sŏng sa lu bơ̆n pơm kơ bơngai lui ưh tam mă hlôh gah tơdrong pơm kơ đe hlôh hơwơ̆l, lei na lu bơ̆n “Pơm kơ Yŏng bơ̆n Yêsu Krist ưh kơ lăp đon kơ iĕm” (trong 12).
Nơ̆r Kră Yang bơtho gah tơmam sa đe soi sơmah kơ yang ăn kơ lu bơ̆n pơhrăm iŏk gah tơdrong arih lui yom kăl kơ đei noh bơih tơdrong arih ‘mêm băl ling lang bơ̆n lăng tơdrong lơi yua bơngai nai hloh kơ bơ̆n. Lăp đon kơ tơdrong hlôh wao mălei ưh kơ đei tơdrong ‘mêm gô ba bơ̆n tơdrong pơang. Kră Yang ăn kơ bơ̆n rơngei, mălei ‘nĕ kơ pơm hloh kơ ai arih kư̆ kă pơrăm đon lui lu ‘nhŏng oh bơ̆n. Kră Yang dan lu bơ̆n lăm anih tơpôl đon lui wă tơiung đon lui dih băl, thoi noh athei hiơ̆k kơ bơngai nai lei tơdrong yoch noh yua kơ inh, na ning mônh inh ưh pă layơ wă sa dôm tơmam đe sơmah kơ yang kơnê̆ dơ̆ng bơih. (trong 13).
Lu bơ̆n juăt kơ wă ‘maih hloh kơ bơngai nai, ‘maih arih kiơ̆ kơdih, ling lang tơ’bôh khan bơ̆ñ trŏ ngăl mă ưh kơ kăl lăng nơ̆r pơma, tơdrong jang lu bơ̆n hăm pơm kơ đe hlôh glăi ưh, mă loi lu bơngai ‘nao lui. Athei pơ’lơ̆ng lu bơ̆n pơm glăi hăm Kră Yang mă bơ̆n ưh kơ băt! Kơplah Bơngai Lui arih băt mơnat dih băl, hiơ̆k bơngơ̆t dih băl na đon lui rim ‘nu gô tơiung dih băl, na Bơngai Lui rai wơ̆ tŏk păng Anăn Kră Yang đei pơư pơang.
Ơ Kră Yang, inh bơnê kơ Ih đei bơtho kơ inh gah tơdrong sa tơmam đe soi sơmah kơ yang. Apinh Ih tơgŭm inh hlôh trŏ păng đei tơdrong arih tơ iung băl tơplih kơ pơm kiơ̆ kơdih bơ̆n wă dah arih kư̆ kă pơm kơ bơngai nai hlôh glăi. Krao khan yua Anăn Kră Yang Yêsu Krist, Amen.
Lu bơ̆n oei yua jơnăr rơngei Kră Yang ăn wă arih păng pơm kơmĭl ăn kơ bơngai nai thoi yơ?
Đŏk Sơ̆p hla bơar ‘Bok Kei-Dei lăm pêng sơnăm: II Kôrintô 6
Kênh Youtube BHKTHN:
