Klei Aê Diê Blŭ: II Klei Yăl Dliê 30:6-9
Êlan kliăng: “Kyuadah Yêhôwa Aê Diê diih jing jăk leh anăn thâo pap, leh anăn Ñu amâo srăng wir ƀô̆ Ñu mơ̆ng diih ôh, tơdah diih lŏ wĭt kơ Ñu” (II Klei Yăl Dliê 30:9b)
Klei êmuh ksiêm mĭn: Ya bruă Mtao Hêsêkia čih hră iêo jak brei phung ƀuôn sang ngă? Ti anôk ñu kna ñu iêo jak snăn? Ti klei bi knăl brei ƀuh drei dôk wir ƀô̆ mơ̆ng Khua Yang?
Hlăm hră iêô jak phung ƀuôn sang hdơr mpŭ kơ Knăm Klei Găn, Mtao Hêsêkia mtă brei digơ̆ lŏ wĭt kơ Aê Diê Y‑Abraham, Aê Diê Y‑Isăk leh anăn Israel, čiăng lač Aê Diê jing Pô sĭt suôr djă pioh kjăp klei Ñu ƀuăn kơ jih jang ênuk găp djuê Israel. Đăm ngă klei bi kdơ̆ng hŏng Aê Diê msĕ si phung aê leh anăn ayŏng adei digơ̆ ôh. Brei digơ̆ dlăng kơ boh jhat mơ̆ng klei lui wir Aê Diê kyuanăn mâo lu đa đa phung Israel leh anăn phung Yuđa arăng mă jing mnă. Kăn ngă klei khăng kŏ msĕ si phung aê digơ̆ rei kyuadah phung Israel jing phung khăng kŏ mơ̆ng đưm (Klei Kbiă 32:9). Čiăng tlaih mơ̆ng klei bi rai, brei digơ̆ “yơr” kngan digơ̆ pô kơ Aê Diê, jing sa klei ngă bi êdah klei ƀuăn dôk sĭt suôr (II Bruă Mtao 10:15; Y‑Êsêkiêl 17:18), čiăng djă ti kngan jăk Aê Diê leh anăn nao kơ Sang kkuh mpŭ čiăng kkuh mpŭ kơ Ñu.
Mtao Hêsêkia brei thâo tơdah digơ̆ “lŏ wĭt” kơ Aê Diê, Aê Diê srăng “lŏ wir phă” digơ̆ jing phung ăt dôk mơ̆ng čar Israel tĭng dưr, digơ̆ srăng tlaih mơ̆ng klei Aê Diê ngêñ, phung găp djuê digơ̆ arăng mă jing mnă leh srăng “lŏ wĭt” (êlan 9). Mơ̆ng boh blŭ “lŏ wĭt” anei, hdruôm hră Klei Yăl Dliê brei ƀuh klei lŏ wĭt kơ Aê Diê jing klei yuôm bhăn snăk čiăng bi ruĕ klei knap mñai. Anôk digơ̆ kna čiăng digơ̆ jhŏng lŏ wĭt kơ Aê Diê jing klei jăk leh anăn klei thâo pap Aê Diê. Aê Diê amâo srăng wir ƀô̆ mơ̆ng digơ̆ ôh tơdah digơ̆ lŏ wĭt kơ Ñu. Tơdah amâo lŏ wĭt kơ Aê Diê ôh, digơ̆ srăng tuôm hŏng klei knap mñai msĕ si phung aê digơ̆ tuôm leh. Hră mtao mơĭt brei ƀuh Aê Diê jing Pô phat kđi leh anăn brei ƀuh Ñu ăt jing Pô jăk leh anăn bŏ hŏng klei thâo pap mơh, Ñu srăng pap brei klei soh digơ̆ tơdah digơ̆ lŏ wĭt kơ Ñu.
Bi mni lač jăk kơ Aê Diê, phung đăo kơ Krist ăt jing phung lŏ wĭt kơ Aê Diê mơh. Hrô kơ klei mă tŭ klei Aê Diê ngêñ kyua klei drei ngă leh (Y‑Êsêkiêl 7:8), snăn Yang Krist klam brei leh klei soh drei čiăng kơ Aê Diê Pô jăk leh anăn bŏ hŏng klei thâo pap – pap brei klei soh drei. Ƀiădah lĕ, mâo lu blư̆ drei ăt “wir ƀô̆ mơ̆ng” Khua Yang mơh čiăng dlăng phă rup yang lăn ala anei, prăk mah amâodah klei hơ̆k mơak lăn ala. Klei bi knăl kơ klei wir ƀô̆ mơ̆ng Khua Yang jing klei amâo lŏ nao bi kƀĭn kkuh mpŭ leh anăn amâo mă bruă kơ Ñu ôh. Hlăk anăn drei amâo lŏ khăp kơ klei wah lač leh anăn dlăng Klei Aê Diê Blŭ ôh ƀiădah knŏng mĭn kơ bruă lăn ala anei. Ƀrư̆ ƀrư̆, tơdah amâo lŏ dôk sĭt suôr hŏng Khua Yang ôh, drei srăng dlăng hơăi mang kơ klei soh leh anăn ênưih snăk ngă soh. Wir ƀô̆ mơ̆ng Khua Yang srăng atăt klei hdĭp drei nao kơ klei rai tuč (êlan 7), kyuanăn yơh, tăp năng Khua Yang Pô bŏ hŏng klei thâo pap brei klei dleh dlan truh kơ drei čiăng bi mdih drei.
Si ngă drei thâo kral klei jăk, klei pap êbeh dlai Aê Diê čiăng lŏ wĭt kơ Ñu mơ̆?
Wah lač: Ơ Khua Yang, pap brei kơ kâo đa tăp năng kâo wir ƀô̆ mơ̆ng Ih čiăng dlăng phă rup yang lăn ala anei. Brei kâo kmhal hĕ kơ klei soh leh anăn lŏ wĭt kơ Ih. Akâo Ih djă ti kngan awăt kâo čiăng kâo dôk kjăp tui hlue Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Bruă Mtao 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
