Yausuas 6:17-27
Nqe cim:
“Vim tus niamntiav Lahaj tau zais ob tug uas Yausuas tso mus soj lub nroog Yelikaus, Yausuas thiaj tsis tua nws, nws niam nws txiv, thiab nws cov kwvtij. (Lahaj cov xeebntxwv tseem nyob hauv tebchaws Yixalayees los txog niaj hnub no.)” (Yausuas 6:25)
Lus nug xav:
– Vajtswv hais kom haivneeg Yixalayees yuav tsum ua li cas rau txhua yam uas nyob hauv lub nroog Yelikaus?
– Dhau qhov ntawd peb kawm paub dabtsi txog Vajtswv tus yamntxwv?
– Peb yuav tau ua dabtsi thaum paub txog Vajtswv kev npaj rau txim thiab pub txojsia?
Tom qab uas txeeb tau lub nroog Yelikaus, Vajtswv tau samhwm kom cov Yixalayees yuav tsum muab txhua yam hauv lub nroog Yelikaus rhuav tshem tas huv tibsi mus, txij tibneeg mus tagnrho txhua yam tsiaj txhu (nqe 17). Cov neeg Kana-as txoj kev phem uas phem kawg nkaus thiab txoj kev pe dab pe mlom yuav tsum raug muab rhuav tshem kom tu noob, vim yuav kis kev phem rau Vajtswv haivneeg, nws zoo ib yam li lub qog noj ntshav; yog tsis muab txiav tawm, ces nws yuav kis mus rau lwm qhov. Vajtswv twb tau hais txog cov neeg Kana-as tej kev txhaum uas phem kawg nkaus no ntev los lawm, xws li kev sib deev hauv tsevneeg, tej kev sib deev uas phem kawg nkaus (Levis Kevcai 18), lawv muab lawv cov menyuam tua txi rau tus vajtswv Maulej (2 Kevcai 12:29–31). Vajtswv tau ceebtoom hais tias lawv yuav raug rau txim vim lawv tej kev txhaum ntawd (Levis Kevcai 18:27).Cov neeg Yixalayees kuj tau Vajtswv ceebtoom kom tsis txhob ua tej kev phem kev qias zoo li txhua haivneeg no, yog lawv ua lawv kuj yuav raug Vajtswv rau txim thiab. Thaum ub Vajtswv twb hais tseg lawm hais tias yog thaum twg Nws haivneeg mus nyob rau hauv lub tebchaws uas Nws yuav pub rau lawv, mas lawv yuav tsum muab txhua haivneeg nyob hauv lub tebchaws ntawd tua tuag tas huv tibsi mus. Yog lawv tsis ua li ntawd, cov neeg ntawd yuav ntxias kom lawv tso Vajtswv tseg mus pehawm lwm tus vajtswv ces lawv yuav raug Vajtswv txoj kev chim thiab lawv yuav raug rhuav puastsuaj mus sai sai ( 2 Kevcai 7:1–5). Vajtswv yog tus uas tsis zais ib haiv neeg twg tej kev txhaum li, txawm yog Nws haivneeg los ib yam nkaus. Lawv yuav tsum paub hais tias lawv yog ib haivneeg dawbhuv rau Vajtswv, thiab yog Vajtswv tug.
Txawm li ntawd los hauv lub nroog Yelikaus muaj ib tug pojniam hu ua Lahaj, txawm yog nws muaj lub neej yav dhau los ua phem ua qias, tiamsis nws thiab nws tsev neeg, nrog rau txhua yam uas yog nws tug, tsis raug rhuav tshem. Nws tau txais kev cawmdim thiab nyob kaj siab lug nrog cov neeg Yixalayees. Vim nws muaj kev ntseeg rau Vajtswv thiab muaj lub siab tawv txais tos ob tug tub soj tebchaws ntawm cov Yixalayees, nws thiaj tsis tuag nrog cov neeg uas tsis ntseeg (Henplais 11:31).
Vajtswv txoj kev rau txim tuag nthi rau kev txhaum qhia pom Nws txoj kev dawbhuv, thiab Vajtswv xav kom haivneej uas yog Nws tug yuav tsum dawbhuv. Thiab txoj kev rau txim no kuj taw qhia txog Vajtswv txoj kev rau txim mus ib txhis yav tom ntej no rau cov neeg txhaum uas tsis lees txais yuav Tswv Yexus. Vajtswv yog tus ncaj ncees kawg nkaus, thiab Nws kuj yog tus muaj kev hlub kawg nkaus, yog tus txiav txim thiab tus pub txojsia. Peb ua Vajtswv tsaug uas Nws twb qhia peb paub txog Nws txoj kev npaj uas yuav rau txim rau cov neeg uas tsis lees txais yuav Nws Leej Tub, tus uas tuag theej neeg ntiajteb lub txhoj, thiab tus uas yuav pub txojsia nyob mus ib txhis rau txhua tus uas lees txais yuav Nws. Yog li ntawd, peb yuav tsum ua neej txawv neeg ntiajteb, muab tej kev txhaum hauv peb lub neej tshem tawm, thiab qhia peb txoj kev ntseeg los ntawm kev tshaj tawm Txojmoo Zoo rau tibneeg kom lawv paub txog Vajtswv kev npaj tseg yuav rau txim rau txhua tus uas tsis tso kev txhaum tseg thiab yuav pub txojsia rau cov uas tso kev txhaum tseg thiab los ntseeg txais yuav Tswv Yexus.
Thov Vajtswv,
Tus Tswv, ua Koj tsaug uas Koj cawm nyuam yaus dim. Thov pab kom nyuam yaus ua neej dawbhuv, tsis txhob xyaum lub ntiajteb. Thov pub nyuam yaus muaj siab tawv tshaj tawm Txojmoo Zoo rau coob leej kom lawv tau paub Koj thiab tau txais txoj kev cawmdim. Nyuam yaus tuav Tswv Yexus Khetos lub npe thov, Amees.
Peb puas tau tshaj tawm rau leej twg txog Vajtswv txoj kev npaj rau txim thiab pub txojsia?
Nyeem Vajluskub hauv peb lub xyoos: 2 Kauleethaus 7
Kênh Youtube BHKTHN:
