Klei Aê Diê Blŭ: Y-Yôsuê 6:17-27
Êlan kliăng: “Ƀiădah Y-Yôsuê lui hdĭp H’Rahap, mniê knhông leh anăn sang ama gơ̆, leh anăn jih jang phung gơ̆; gơ̆ dôk ti krah phung Israel truh kơ hruê anei, kyuadah gơ̆ mdăp leh phung knuă Y-Yôsuê tiŏ nao duah ksiêm ƀuôn Yêrikô.” (Y-Yôsuê 6:25)
Klei êmuh ksiêm mĭn: Si Aê Diê mtă kơ phung ƀuôn sang Israel brei ngă hŏng jih jang mnơ̆ng hlăm ƀuôn Yêrikô? Mơ̆ng anăn si drei thâo kơ knuih Aê Diê? Ya klei brei drei ngă tơdah thâo hdră bi kmhal leh anăn brei klei hdĭp mơ̆ng Aê Diê?
Leh mâo mă ƀuôn Yêrikô, Aê Diê mtă kơ phung ƀuôn sang Israel brei mdjiê jih jang mnơ̆ng hlăm ƀuôn Yêrikô mơ̆ng mnuih truh kơ hlô mnơ̆ng (êlan 17). Klei jhat ƀai jih hnơ̆ng, klei soh kkuh kơ rup yang phung ƀuôn sang Kanaan brei bi mdjiê jih kyua srăng hmăi amâo jăk kơ phung ƀuôn sang Aê Diê, msĕ si klŏ klei ruă brŭ, tơdah amâo khăt lui srăng lar ti anôk mkăn. Dŭm klei soh jhat phung ƀuôn sang Kanaan mâo Aê Diê mñă mơ̆ng đưm msĕ si klei knhông, klei bi dôk êkei mniê soh jhat snăk (Bruă Lêwi 18), čuh čô anak pô myơr kơ yang Môlok (Klei Mtô Mñă Klei Bhiăn 12:29-31). Aê Diê hưn brei răng leh diñu srăng tŭ klei bi kmhal kyua klei soh diñu (Bruă Lêwi 18:27). Phung ƀuôn sang Israel ăt mâo klei hưn brei răng amâo dưi ngă ôh ya bruă čhŏ mrŏ msĕ si phung ƀuôn sang anei, tơdah amâo hmư̆ ăt srăng tŭ klei bi kmhal. Hlăk đưm, Aê Diê mtă leh hbĭl ƀuôn sang Ñu nao hlăm krĭng pô srăng tŭ mă snăn diñu srăng bi mdjiê jih phung ƀuôn sang êlâo dih dôk ti krĭng anăn. Tơdah amâo ngă snăn, phung ƀuôn sang anei srăng mplư diñu lui Aê Diê leh anăn mă bruă kơ phung yang mkăn leh anăn truh gưl diñu srăng tŭ klei Aê Diê ngêñ leh anăn pral srăng rai luč (Klei Mtô Mñă Klei Bhiăn 7:1-5). Aê Diê jing Pô amâo lui klei soh kơ hlei phung ƀuôn sang ôh, wăt phung ƀuôn sang Ñu. Brei diñu thâo pô jing sa êpul ƀuôn sang doh jăk kơ Aê Diê, sa ƀuôn sang jing dŏ hjăn Aê Diê.
Khădah snăn, hlăm ƀuôn Yêrikô mâo H’Rahap, wăt tơdah tuôm jing leh mnuih soh jhat, ƀiădah ñu hŏng jih gŏ sang ama ñu, jih jang mnơ̆ng jing dŏ ñu, amâo rai luč ôh. Ñu dưi tlaih leh anăn hdĭp êđăp ênang ti krah ƀuôn sang Israel. Kyua mâo klei đăo hlăm Khua Yang hlăm bruă jhŏng jum phung knuă Israel đru ñu amâo djiê ôh hŏng phung amâo đăo (Hêbrơ 11:31).
Klei bi kmhal kluôm brei ƀuh klei doh jăk Aê Diê, leh anăn Aê Diê čiăng kơ phung ƀuôn sang jing dŏ Ñu ăt srăng doh jăk. Leh anăn klei bi kmhal anei ăt lač kơ klei rai luč lă lar hlăm êdei anăp kơ phung soh jhat hngah kơ Aê Diê. Ñu jing Aê Diê bŏ hŏng kpă ênô, jing Pô bŏ hŏng klei khăp, Pô bi kmhal leh anăn ăt jing Pô brei klei hdĭp. Bi mni lač jăk kơ Aê Diê brei leh drei thâo hdră kčah bi rai phung hngah kơ Anak Ñu, Pô djiê hrô leh kơ klei soh anak mnuih, leh anăn brei klei hdĭp kơ hlei pô đăo kơ Krist, brei drei hdĭp mdê hŏng lăn ala, lui jih klei soh hlăm klei hdĭp, bi êdah klei đăo hlăm bruă hiu čhưn kơ lu mnuih kơ hdră kčah brei klei hdĭp kơ hlei pô kmhal klei soh, đăo kơ Aê Diê leh anăn klei bi kmhal kơ hlei pô mâo ai tiê khăng.
Drei hiu hưn leh kơ hlei pô kơ hdră kčah bi kmhal leh anăn brei klei hdĭp mơ̆ng Aê Diê leh mơ̆ ka?
Wah lač: Ơ Khua Yang, kâo bi mni kơ Ih kyua klei bi mtlaih Ih brei kơ kâo wăt tơdah kâo amâo năng ôh. Akâo kơ Ih đru kâo tui duah klei doh jăk Aê Diê čiăng amâo djŏ hlue ngă si lăn ala ôh. Akâo kơ Ih đru kâo bi êdah klei hdơr knga hlăm klei hiu hưn Klei Mrâo Mrang Jăk kơ lu mnuih.. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 7
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Aê Diê Blŭ hlăm tlâo thŭn: II Kôrantô 7
Kênh Youtube BHKTHN:
