II Xwmtxheej Vajntxwv 30:6-9
Nqe cim:
“Tus Tswv uas yog nej tus Vajtswv, nws muaj siab dawb siab zoo thiab hlub tshua; yog nej los cuag nws, nws yuav lees yuav nej.” (II Xwmtxheej Vajntxwv 30:9b)
Lus nug rau sawvdaws xav:
– Vajntxwv Hexekiyas sau ntawv nqua hu cov pejxeem yuav tsum ua dabtsi?
– Vim qhov twg vajntxwv nqua hu kom ua li ntawd?
– Cov cim twg qhia tias peb tabtom khiav ntawm tus Tswv mus?
Hauv tsab ntawv nqua hu Vajtswv haivneeg tuaj ua Kevcai Hla Dhau, Vajntxwv Hexekiyas hais kom lawv cia li tig los cuag Anplahas, Ixaj thiab cov Yixalayees tus Vajtswv, Nws yog tus uas ua raws li Nws tej lus cogtseg ib tiam dhau ib tiam los. Tsis txhob taug cov yawgkoob thiab cov neeg tawmtsam tus Tswv txojkev. Yuav tau ntsia pom qhov nqi zog uas lawv tso tus Tswv tseg ua rau cov Yixalayees thiab cov Yudas raug ntes mus ua cev qhev. Kuj tsis txhob tawv ncauj zoo li cov yawgkoob, vim cov Yixalayees muaj keebkwm yog cov neeg tawv ncauj (Khiav dim 32:9). Cia kom dim txojkev puastsuaj, lawv yuav tsum “mloog tus Tswv lus”, qhov no hais txog tus cwjpwm ncaj ncees rau Nws (II Vajntxwv 10:15; Exekees 17:18), kom tuav Nws txhais tes uas puv npo kev hlub tshua thiab tuaj hauv Nws lub tuam tsev pehawm Nws.
Vajntxwv Hexekiyas qhia paub thaum “tig los” cuag tus Tswv ces Nws “yuav los” nrog lawv cov neeg uas seem sab qaumteb nyob, dim tus Tswv txojkev rau txim. Lawv cov kwvtij uas raug ntes mus yuav “rov qab los” (nqe 9). Cov lo lus “rov los” no, phau ntawv Xwmtxheej Vajntxwv qhia paub rov los cuag tus Tswv yog qhov uas tseemceeb ua rau tsis muaj sub tawg sub ntsha. Qhov uas yuav rov los cuag tau tus Tswv yog nyob ntawm tus Tswv lub siab zoo, thiab Nws txojkev hlub. Nws yuav tsis tso lawv tseg yog tias lawv tig los cuag Nws. Yog tsis ua li, lawv yuav ntsib kev txomnyem zoo ib yam li lawv cov yawgkoob. Vajntxwv tsab ntawv ib ke qhia paub tus Tswv yog tus uas txiav txim, ib ke qhia paub Nws yog tus uas zoo thiab hlub, txaus siab hlo zam txim yog tias lawv tig rov los cuag Nws.
Ua Vajtswv tsaug, cov ntseeg Yexus yog cov uas tig rov los cuag tus Tswv. Twb tsimnyog raug tus Tswv txojkev rau txim vim peb txojkev ua txhaum (Exekees 7:8) tiamsis Yexus Khetos los ris peb lub txim, peb thiaj tau Vajtswv tus uas siab zoo thiab muaj kev hlub zam txim. Tiamsis muaj qee zaus peb kuj cia li “tso” tus Tswv tseg mus ua raws li tej uas peb nyiam nyob hauv lub ntiajteb, nyiaj txiag lossis tej kev lomzem. Cov cim qhia tias tso tus Tswv tseg yog tsis pehawm thiab tsis ua Nws tes haujlwm. Thaum zoo li ntawd peb kuj tsis xav thov Vajtswv thiab tsis nyeem Vajtswv Txojlus, tsuas xav mus ua li neeg ntiajteb ua xwb. Thaum txav deb tus Tswv zuj zus, peb yuav tsis ntshai kev txhaum thiab yoojyim mus ua txhaum heev. Tso tus Tswv tseg yuav ua rau peb lub neej raug txim hnyav heev (nqe 7), yog li ntawd thaum tus Tswv uas muaj kev hlub pom zoo tso tej kev txomnyem los raug peb, twb yog Nws qhia kom peb paub ceevfaj.
Thov Vajtswv,
Tus Tswv, thov Koj zam txim rau qhov uas nyuam yaus tso Koj tseg mus ua li tej neeg ntiajteb ua. Thov Koj qhia kom nyuam yaus lees txhaum thiab tig rov los cuag Koj. Thov Koj tuav nyuam yaus txhais tes kom ua taus siab ntev nrog Koj mus. Tuav Tswv Yexus lub npe thov, Amees.
Peb puas zeem paub tus Tswv lub siab zoo, txojkev hlub npluamias es tig rov los cuag Nws?
Nyeem Vajluskub hauv peb lub xyoo: I Vajntxwv 9
Kênh Youtube BHKTHN:
