Klei Aê Diê Blŭ: I Kôrantô 7:17-24
Êlan kliăng: “Knŏng brei grăp čô dôk hdĭp tui si klei Khua Yang brei kơ ñu leh, tui si ñu jing hlăk Aê Diê iêu ñu. Snăn jing klei kâo mtă leh kơ jih jang Phung Sang Aê Diê. ” (I Kôrantô 7:17)
Klei êmuh ksiêm mĭn: Khua ƀĭng kna Y-Pôl bi hmô klei bhiăn hdĭp hlue si klei Aê Diê brei leh anăn hlue si klei Aê Diê iêô hŏng ya bruă? Si klei ñu mtă kñăm răng mgang kơ phung jing hlŭn? Si drei ba yua klei hriăm anei?
Khua ƀĭng kna Y-Pôl lač kơ sa bruă kluôm jing Phung đăo brei sĭt suôr hŏng Khua Yang hlăm boh klei ară anei pô, hrô kơ tŭ klei čuh hlăm klei êpa hmao čiăng bi mlih mnơ̆ng nah êngao. Ñu lač: “Knŏng brei grăp čô dôk hdĭp tui si klei Khua Yang brei kơ ñu leh, tui si ñu jing hlăk Aê Diê iêô ñu” (êlan 17). Ñu hưn mdah dua bruă klă klơ̆ng:
Tal sa, khăt klĭt amâodah hơăi amâo yuôm msĕ hŏng bruă djă pioh jih klei bhiăn Aê Diê ôh. Pô khăt klĭt leh êlâo kơ đăo kơ Aê Diê snăn “đăm brei ñu duah bi luč hĕ gru klei khăt klĭt”, bi mnuih ka khăt klĭt ăt “đăm brei ñu duah brei arăng khăt klĭt ñu ôh” (êlan 18-19). Tal dua jing bruă kơhưm hlăm ala ƀuôn. Hlăm êtuh thŭn tal sa, phung hlăm ala ƀuôn mâo mbha dŭm gưl mnuih, leh anăn dŭm gưl mnuih mguôp hŏng klei dưi mdê hjăn. Klei Khua ƀĭng kna Y-Pôl mtă jing “Brei grăp čô dôk msĕ si ñu jing ti hruê Aê Diê iêô ñu” (êlan 20). Klei anei năng ai ênưih hlue ngă hŏng phung khua hlŭn mdrŏng sah amâodah phung êngiê. Khădah snăn, arăng dlăng kơ phung hlŭn jing hơăi mang, ƀiă lu mâo leh klei čang hmăng tơdah đăo kơ Aê Diê, pô ăt srăng dưi bi mlih wăt hlăm kơhưm hlăm ala ƀuôn. Khua ƀĭng kna čiăng lač hŏng digơ̆ Aê Diê mâo klei kñăm mdê hjăn leh anăn yuôm bhăn kơ grăp čô mnuih.
Khua ƀĭng kna Y-Pôl amâo bi mni kơ klei bhiăn mjing hlŭn ôh, kơ ai tiê kƀah klei bi mlih hlăk êjai mtă kơ phung hlŭn “mơ̆ng ai ñu” leh anăn dôk hlăm klei jing hlŭn, kyua ñu lač leh “Ƀiădah tơdah ih dưi mâo klei êngiê, brei ih tŭ mơh” (êlan 21). Êngao anăn, hlăm sa ala ƀuôn phung hlŭn tlĕ đuĕ tuôm hŏng lu snăk klei dleh dlan, boh nik huĭ hyưt kơ klei hdĭp, tơdah thâo săng leh anăn klei mkŏ mjing ala ƀuôn ka mprăp ôh kơ klei bi mlih snăn klei ñu mtă jing kñăm răng mgang phung hlŭn. Tơdah klei găl truh, brei pai mă klei găl, ƀiădah đăm brei ôh asei mlei pô toh hroh kyua êpa mhao klei bi mlih klei hdĭp leh anăn kơhưm ala ƀuôn ti êngao.
Lu blư̆ drei amâo sa ai leh anăn êgah êmăn hŏng klei hdĭp, djuê ana amâodah kơhưm ala ƀuôn pô kyua anăn amâo mă bruă kơ Aê Diê ôh. Klei hriăm mñă kơ drei wăt tơdah jing sa čô mă bruă amâodah sa čô khua gĭt gai; wăt tơdah mâo hră bi mklă gưl dlông amâodah ti gŭ; wăt tơdah mdrŏng sah amâodah ƀun ƀin… Aê Diê dlăng drei mâo ênoh yuôm msĕ sơăi. Đăo kơ Khua Yang amâo djŏ jing drei bi mlih kơhưm ala ƀuôn ôh, bi mlih bruă ôh srăng mâo ênoh yuôm. Brei drei thâo kơhưm pô jing anak Aê Diê yuôm bhăn snăk čiăng hdĭp mơak mñai hlăm klei bi mguôp hŏng Khua Yang leh anăn gưt asăp Ñu.
Si drei dôk jih ai tiê mă bruă kơ Khua Yang hlăm anôk Khua Yang dưm?
Wah lač: Ơ Khua Yang, bi mni kơ Ih ruah leh kâo, bi mtlaih leh kâo leh anăn brei kâo mă bruă kơ Ih. Akâo kơ Ih đru kâo duah klei hơ̆k mơak hlăm bruă bi mơak kơ Ih hrô kơ duah hdră bi mlih ya klei Aê Diê brei leh kơ kâo. Kâo wah lač hlăm anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Kôrantô 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
