1 Kauleethaus 8:1-13
Nqe cim:
“Tej zaub mov ntawd yeej pab tsis tau kom peb nrog Vajtswv sib raug zoo; txawm yog peb tsis tau noj los peb yeej tsis yuag, thiab yog peb noj los peb yeej tsis rog” (1 Kauleethaus 8:8)
Lus nug xav:
– Paulus qhia li cas txog qhov uas noj lossis tsis noj tej khoom fij rau dab?
– Peb kawm tau dabtsi txog txoj kev ua neej hwm Vajtswv uas yuav tsum muaj?
– Peb yuav siv zaj kawm no li cas kom peb sib pab txhim kho peb txoj kev ntseeg?
Thaum tiam Pawg Ntseeg Kauleethaus, cov nqaij uas muag hauv lwm haivneeg tej tuamtsev teev dab thiab tom tej khw mas feem ntau yog nqaij uas twb muab fij rau tej dab mlom lawm. Cov ntseeg uas muaj kev paub ntseeg hais tias tsuas muaj tib tug Vajtswv xwb, hos tej dab tej mlom yeej tsis muaj qabhau thiab yeej tsis muaj peevxwm ua kom tej zaub mov tsis huv (nqe 4). Yog li ntawd lawv yeej mus yuav tej nqaij ntawm tej tsev teev dab lossis hauv tej khw los noj, lossis tom qab uas kevcai teev dab tas yog muaj neeg caw mus koom rooj noj rooj haus los lawv yeej mus koom noj koom haus. Tiamsis cov ntseeg tshiab uas nyuam qhuav tso kev teev dab tseg, lawv xav hais tias yuav tsum txiav tu nro tej kevcai qub tseg. Yog li ntawd, thaum lawv pom lossis noj tej khoom fij rau dab, lawv rov nco txog tej qub kevcai uas lawv tau ua yav tas los. Thaum noj, lawv tus kheej yuav txuas qhov kev noj tej khoom fij rau dab mlom ntawd nrog rau lub txim pe dab pe mlom (nqe 7). Thaum lawv pom cov ntseeg uas muaj kev ntseeg ruaj khov lawm noj tej khoom fij rau dab, ua rau lawv yuam kev (nqe 9–11). Timthawj Paulus qhia meej hais tias: “Tej zaub mov ntawd yeej pab tsis tau kom peb nrog Vajtswv sib raug zoo; txawm yog peb tsis tau noj los peb yeej tsis yuag, thiab yog peb noj los peb yeej tsis rog” (nqe 8). Txawm li ntawd los, raws li kev xav “Kuv muaj cuabkav ua txhua yam …Tiamsis tsis yog txhua yam ntawd yuav muaj nqis rau koj huv tibsi” (1 Kauleethaus 6:12), txhob cia peb txoj kev paub uas hais tias tej khoom fij rau dab yeej tsis qias los ua rau peb cov kwvtij ntseeg yuam kev. Yog peb txoj kev noj haus ua rau cov ntseeg uas tsis tau muaj kev to taub yuam kev ces peb tabtom “ua txhaum Yexus Khetos ntag” (nqe 12).
Vajtswv Txojlus qhia txog qhov uas noj tej khoom fij rau dab pab rau peb khaws tau ib zaj kawm txog kev ua neej hwm Vajtswv uas yuav tsum muaj, ntawd yog ua neej muaj kev hlub ces saib lwm tus qhov kev cheem tsum muaj nqis dua yus qhov kev cheem tsum. Yog peb txaus siab rau yus txoj kev paub thiab tsis muaj kev hlub peb yuav dhau mus ua neeg khavtheeb. Vajtswv pub peb muaj kev ywjpheej, tiamsis peb yuav tsum tsis txhob siv txoj kev ywjpheej ntawd los ua neej raws li peb lub siab nyiam, ua rau peb cov kwvtij ntseeg yuam kev. Vajtswv muab peb tso ua ib tsev neeg ntseeg kom peb sib txhawb kev ntseeg. Vim li ntawd, yuav tsum hmov tshua txog lwm tus, yog cheemtsum peb yuav tsum txaus siab poob yam yus ntshaw kom tsis ua rau yus cov kwvtij ntseeg yuam kev (nqe 13).
Feem ntau peb pheej xav kom peb tshaj lwm tus, nyiam ua raws li peb lub siab nyiam, thiab pheej qhia tawm hais tias yus yog tus yog, tsis ua zoo xav tej lus uas peb hais saib puas ua rau peb cov kwvtij ntseeg yuam kev, tshwjxeeb yog cov uas nyuam qhuav los ntseeg. Peb yuav tsum ceevfaj, tsam peb ua txhaum rau Vajtswv peb tsis paub. Thaum Pawg ntseeg ua neej sib hlub, sib hmov tshua ib leeg xav txog ib leeg, ces yuav txhawb tau txhua tus kev ntseeg, Pawg ntseeg yuav loj hlob, thiab Vajtswv lub npe yuav tau koobmeej.
Thov Vajtswv,
Tus Tswv, ua Koj tsaug uas Koj tau qhia nyuam yaus los ntawm Koj Txojlus txog kev noj tej khoom fij rau dab. Thov Koj pab kom nyuam yaus totaub Koj Txojlus kom yog, thiab ua neej pab nyuam yaus cov kwvtij ntseeg txoj kev ntseeg loj hlob, tiamsis tsis txhob siv nyuam yaus txoj kev ywjpheej ua rau lwm tus yuam kev. Nyuam yaus tuav Tswv Yexus Khetos lub npe thov, Amees.
Peb tabtom siv txoj kev ywjpheej uas Vajtswv pub rau peb los ua neej thiab ua qauv rau lwm tus li cas?
Nyeem Vajluskub hauv peb lub xyoos: 2 Kauleethaus 6
Kênh Youtube BHKTHN:
