Klei Aê Diê Blŭ: Klei Kbiă: 34:5-9
Êlan kliăng: “Yêhôwa găn ti anăp ñu leh anăn hưn, “Yêhôwa, Yêhôwa, Aê Diê bŏ hŏng klei jăk leh anăn thâo pap, amâo djăl ăl ôh, mdrŏng hŏng klei khăp leh anăn hŏng klei sĭt suôr” (Klei Kbiă: 34:6)
Klei êmuh ksiêm mĭn: Klei hriăm hruê anei brei drei thâo ya klei kơ Yêhôwa Aê Diê? Ya klei Y‑Môis ngă ti anăp Yêhôwa trŭn hlăm knam? Ya knuih brei drei mâo leh anăn si drei ngă ti anăp Aê Diê?
Aê Diê ti dŭm tal adiê dlông snăk trŭn hlăm knam, dôk giăm Y‑Môis ƀiădah msĕ si ñu amâo thâo ôh Aê Diê dôk giăm pô snăk. Aê Diê bi sĭt klei ƀuăn hŏng Y‑Môis, Ñu srăng hưn Yêhôwa ti anăp Ñu (Klei Kbiă 33:19). Hlăm trăn Klei Aê Diê Blŭ anei, Anăn “Yêhôwa! Yêhôwa!” leh anăn Ñu lač kơ Ñu hŏng klei klă hĭn. Aê Diê amâo bi êdah kơ Y‑Môis ƀuh ôh Ñu jing sa Aê Diê bŏ hŏng klei myang leh anăn prŏng hĭn, ƀiădah “Aê Diê bŏ hŏng klei jăk leh anăn thâo pap, amâo djăl ăl ôh, mdrŏng hŏng klei khăp leh anăn hŏng klei sĭt suôr” (êlan 6).
Lu mnuih thâo Aê Diê hlăm ênuk Klei Bi Mguôp Hđăp jing sa Aê Diê djăl ngêñ, bi rai, leh anăn huĭ hyưt snăk! Ƀiădah Klei Kbiă 33:19 leh anăn 34:6-7 brei drei ƀuh Ñu jing Aê Diê amâo bi mlih ôh hlăm klei khăp leh anăn klei kpă ênô. Kyua klei khăp, Ñu amâo djăl ăl ôh leh anăn bŏ hŏng klei pap, klei jăk truh êbâo mnuih, pap brei klei wê, klei gao klei bhiăn, leh anăn klei soh (êlan 7a, Klei Kbiă 20:6). Kyua klei kpă ênô, Ñu amâo yap kpă ôh mnuih soh, bi lĕ klei bi kmhal klei wê phung ama kơ phung anak leh anăn kơ phung čô čĕ tơl kơ ênuk tal tlâo leh anăn tal pă (êlan 7b, Klei Kbiă 20:5b). Klă sĭt knuih hdĭp huĭ mpŭ amâodah bi kdơ̆ng hŏng Aê Diê mơ̆ng aduôn aê, amĭ ama srăng bi hmô jăk amâodah jhat kơ anak čô pô. Êngao anăn, boh tŭ mơ̆ng klei blŭ, bruă mă, klei mĭn hlăm klei hdĭp grăp čô mnuih amâo djŏ knŏng hmăi kơ klei hdĭp êđăp ênang leh anăn mdrŏng sah kơ pô anăn ôh ƀiădah lŏ truh kơ ênuk anak čô.
Dôk ti anăp Yêhôwa Aê Diê bŏ hŏng guh kơang, Y‑Môis kkui kŏ mtam ti lăn leh anăn kkuh mpŭ kơ Aê Diê. Ñu kwưh akâo kơ Aê Diê êbat ti krah phung ƀuôn sang, kmhal klei soh pô, klei soh phung soh phung ƀuôn sang Aê Diê, leh anăn akâo kơ Aê Diê tŭ mă phung ƀuôn sang jing ngăn dưn Ñu (êlan 8-9). Msĕ si Y‑Môis, brei drei buôn kŭp, jih ai tiê kkuh mpŭ kơ Ñu, bi mni kơ Aê Diê bŏ hŏng klei jăk brei leh klei pap kơ drei. Knuih klei khăp Aê Diê iêo jak drei nao kơ ñu čiăng myơr djăp klei mơak, klei ênguôt hlăm klei hdĭp. Boh nik sĭt drei ngă soh hŏng Aê Diê, drei jhŏng nao kơ Ñu čiăng hưn, kmhal klei soh leh anăn akâo Ñu pap brei. Knuih doh jăk leh anăn kpă ênô Aê Diê đru drei huĭ kơ klei soh, amâo čiăng bi kdơ̆ng hŏng Aê Diê čiăng ñĕ kơ boh jhat ênguôt hnĭng hlăm klei hdĭp pô leh anăn jih ênuk anak čô.
Tui hriăm Yêhôwa Aê Diê doh jăk leh anăn kpă ênô, si drei srăng hdĭp?
Wah lač: Ơ Aê Diê, kâo bi mni lač jăk kơ Ih kyua klei khăp leh anăn klei pap Ih hŏng kâo jăk jĭn leh anăn prŏng snăk! Ƀuăn jih klei hdĭp kâo knŏng mpŭ mni kơ Aê Diê. Akâo Ih đru kâo êbat hlăm klei huĭ mpŭ, gưt asăp čiăng thâo klei jăk Aê Diê leh anăn hlue ngă knuih jăk Aê Diê hlăm klei hdĭp kâo.
Dlăng Klei Aê Diê Blŭ hlăm tlâo thŭn: Y‑Yêrêmi 50:1-16
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
