Klei Aê Diê Blŭ: Klei Mphŭn Dơ̆ng 15:7-21
Êlan kliăng: “Hlăm hruê anăn Khua Yang ngă klei bi mguôp hŏng Y-Abram, lač, “Kâo srăng brei čar anei kơ phung anak čô ih, dơ̆ng mơ̆ng êa krông čar Êjip truh ti êa krông prŏng, êa krông Ơprat” (Klei Mphŭn Dơ̆ng 15:18)
Klei êmuh ksiêm mĭn: Ya klei Khua Yang ƀuăn kơ Y-Abram leh anăn hŏng ya êlan ñu ƀuăn rơ̆ng kơ klei ƀuăn anăn? Klei Khua Yang ngă klei bi mguôp hŏng Y-Abram ya anôk mdê mâo? Si drei đăo hŏng jih ai tiê leh anăn êbat hlăm klei gưt asăp kơ Khua Yang?
Leh Khua Yang ƀuăn rơ̆ng kơ Y-Abram gơ̆ srăng mâo anak čô lar êngŭm, Khua Yang lŏ mñă kơ klei ƀuăn êlâo dih, Ñu srăng brei čar Kanaan jing ngăn dưn kơ gơ̆ (êlan 7). Tơdah Y-Abram akâo klei ƀuăn rơ̆ng mơ̆ng Khua Yang, Ñu lač brei Y-Abram mă hlô mnơ̆ng ngă yang “blah krah leh anăn dưm mnơ̆ng ñu blah anăn bi tlă anăp mbĭt” (êlan 10). Anei jing hdră ngă klei bi mguôp ênuk đưm (dlăng Y-Yêrêmi 34:18) hŏng klei čiăng lač tĭng pô ngă soh pô anăn srăng tŭ boh jhat jing msĕ si hlô mnơ̆ng anăn. Aê Diê Khua Yang kơ jih lăn ala ruah leh klei kă Ñu pô hlăm klei bi mguôp hŏng anak mnuih: “Leh yang hruê lĕ mâo klei mmăt, nĕ anei mâo kpur pui ƀlĕ săp leh anăn mâo pui arôk găn ti plah wah kdrêč hlô blah anăn” (êlan 17). Khua Yang pô yơh jing pui arôk găn ti krah wah hlô blah anăn. Sa rup bi hmô jăk snăk, čiăng brei Y-Abram thâo Khua Yang ƀuăn rơ̆ng srăng bi sĭt jih jang klei Ñu ƀuăn leh.
Klei ƀuăn jing klei tĭng sa nah čŏng čiăng ƀuăn rơ̆ng srăng ngă. Bi klei bi mguôp lĕ jing klei ƀuăn rơ̆ng dua nah, mâo klei čoh čuăn leh anăn bruă klam kă jih dua nah ngă klei bi mguôp anăn. Khua Yang amâo guôn ngă klei bi mguôp ôh kyuadah Ñu pô jing Pô sĭt suôr. Ƀiădah čiăng ƀuăn rơ̆ng kơ Y-Abram, Khua Yang čŏng čiăng yua leh hdră anak mnuih čiăng ngă klei bi mguôp hŏng gơ̆. Hlăm hdră ngă klei bi mguôp, knŏng hjăn Khua Yang găn ti plah wah drêč hlô blah. Klei anei brei ƀuh klei Khua Yang bi mguôp hŏng Y-Abram kluôm dhuôm kna ti klei sĭt suôr Khua Yang amâo djŏ bi đuôm hŏng klei Y-Abram ƀuăn rơ̆ng ôh. Măng ai ya srăng truh Khua Yang ăt bi sĭt klei Ñu ƀuăn leh. “Hlăm hruê anăn Khua Yang ngă klei bi mguôp hŏng Y-Abram, lač, “Kâo srăng brei čar anei kơ phung anak čô ih, dơ̆ng mơ̆ng êa krông čar Êjip truh ti êa krông prŏng, êa krông Ơprat” (êlan 18). Khua Yang ktrâo klă kdriêl lăn leh anăn hưn êlâo mơh kơ phung anak čô Y-Abram srăng jing hlŭn hlăm čar tue, ƀiădah Ñu srăng bi mtlaih digơ̆. Măng ai ya klei truh, ti anôk dôk amâodah thŭn mlan srăng bi mlih, Khua Yang ăt srăng ngă kluôm ênŭm klei bi mguôp leh.
Hruê anei, Khua Yang iêo drei brei êbat hlăm klei bi mguôp mrâo hŏng Khua Yang Yêsu, akâo Khua Yang đru drei đăo kơ Ñu hŏng jih ai tiê leh anăn êbat hŏng klei gưt asăp, kyuadah Pô ngă klei bi mguôp hŏng drei jing Pô sĭt suôr leh anăn bŏ hŏng klei khăp.
Drei hŏng jih ai tiê dôk đăo kơ klei sĭt suôr Khua Yang hĕ amâodah dôk gai klei hdĭp drei hŏng klei mĭn drei pô?
Wah lač: Ơ Khua Yang, kâo lač jăk kơ Ih kyua klei pap leh anăn klei sĭt suôr Ih. Kâo bi mni kơ Ih kyua klei bi mguôp mrâo Ih hlăm Khua Yang Yêsu čiăng kơ kâo dưi mâo klei bi mtlaih, dưi jing doh leh anăn dưi dôk mbĭt hŏng Ih hlăm anôk jăk mơak hlŏng lar. Măng ai si klei hdĭp jing, đru kâo đăo kjăp kơ Ih leh anăn hdĭp bi mơak kơ Ih grăp hruê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Têsalônik 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
































