Chủ Nhật 22/11/2026
Trang chủ BÀI HỌC KINH THÁNH HÀNG NGÀY BAHNAR Tơblah Kiơ̆ Thoi Nơ̆r Kră Yang Đei Ată – 23/11/2026 

Tơblah Kiơ̆ Thoi Nơ̆r Kră Yang Đei Ată – 23/11/2026 

2

 

 

Jôsuê 8:3-9

“Mưh lu iĕm đei iŏk boih pơlei, lu iĕm athei soh pơlei noh, athei pơm kiơ̆ thoi Kră Yang đei ată, lăng hŏ inh pơkă boih kơ lu iĕm” (Jôsuê 8:8)

 

Nơ̆r jet tơchĕng pơwao:

–               Kră Yang bơtho kơ Jôsuê athei lu linh năm răp wă blah pơlei Ahi thoi yơ?

–               Yua kơ kiơ tơdrong tơblah ‘nâu pha ‘biơ̆ kơ tơblah pơlei Jêrikô?

–               Pơm thoi yơ tơblah wă kơ kĕjei “pơlei Ahi” jing pơlei kơdih?

Đơ̆ng rŏng đei kơtơ̆ng nơ̆r Kră Yang khan “ih ‘nĕ kơ hli tơrơ” na Jôsuê “iung năm blah” ưh pă ngôi minh anih ‘noh bơih wă bơ̆l hăl hli tơrơ  Jôsuê hăm lu linh năm blah pơlei Ahi yua kơ lu sư oei tơ anih teh thŭng kơđeh. Na jôsuê chă đon wă blah pơlei Ahi “athei pơm kiơ̆ thoi nơ̆r Kră Yang đei ată” (trong 8). Sư rơih iŏk pêng jĭt rơbâu ‘nu bơngai nuih kơtang, athei lu sư yak kơmăng năm răp tơ gah rŏng kơ pơlei Ahi, wă khan tơ gah bơmơ̆t. Sư kư̆m wơh pơđăm rơbâu linh năm răp tơgah bơmơ̆t, sơlam pơlei Ahi păng Bêtel. Na Jôsuê hăm kon pơlei năm jê̆ tơ anăp pơlei Ahi păng pơm anih tơ gah yă nơ̆m kơ pơlei ‘nâu, anih đei thŭng pơgăn lu sư đơ̆ng pơlei Ahi. Kiơ̆ kơ tơdrong Kră Yang tơdă lu linh gah yă nơ̆m gô năm blah păng lu sư pơm kơdâu kơplah lu linh Ahi kơdâu druh lu sư gô pơhlŭ lu linh Ahi lĕch đơ̆ng pơlei lu sư. Jơ noh, đĭ đăng lu linh răp gah rŏng kơ pơlei, na bơmơ̆t gô iung blah pơlei yua kơ Kră Yang pơjao bơih pơlei âu lăm tơpang ti lu sư.

Kră Yang ‘Bok Kei-Dei đei pơkă gô ăn kơ Isơrael kĕjei kơplah blah iŏk pơlei Ahi (Jôsuê 8:2). Kư̆m thoi Kră Yang đei pơkă ăn kơ lu sư kĕjei blah iŏk pơlei Jêrikô (Jôsuê 6:2) Adrol ki, lu sư kăl kơ chu kiơ̆ nơ̆r Kră Yang năm tăp dăr kơ pơlei Jêrikô tơpơh năr ưh kơ tơchĕng dan lê̆ năm răp lê̆ adrol. Mălei jơ lu sư năm răp lê̆ kơplah oei măng mu, chu pơmat, krê hơmơt, adrin năm blah kiơ̆ kơ nơ̆r Kră Yang pơkă. Kră Yang yua lơ trong phara wă pơkeh tơdrong anat phara. Lăm chăl arih lu bơ̆n kư̆m lei lăi, phŏ đei Kră Yang ăn kơ bơ̆n kĕjei ‘bônh ‘bŏ đĕch. Mă khan lei ră, minh pah gah tơdrong jang dah pơmat kăl kơ pơkeh lei lu bơ̆n kăl kơ Kră Yang lăp đon, athei chang gô, athei krăng hơmet, păng adrin pơm tơ’bôh hloi. Kră Yang ưh kơ wă lu bơ̆n dơ̆ng lăng đĕch, mălei athei adrin iung blah, adrin pơjao akâu jăn lăm tơdrong tơblah, na Kră Yang gô oei  hơdai păng ăn kĕjei.

Lăm lu bơ̆n bu bu kư̆m đei “pơlei Ahi” jing pơlei kơdih, athei iung blah păng chă tơdrong Kră Yang lăp đon na pơm kiơ̆, na wă gơh kĕjei. “Pơlei Ahi” noh wă pơma kơ lu bơngai mă arăng kơ̆l ưh tam mă băt kơ Kră Yang kăl kơ hơmet ming. Noh wă khan tơdrong jang anat ayơ noh Kră Yang wă kơ bơ̆n jang, dah mă tơdrong yoch, dah tơdrong kơnê̆ bơ̆n juăt kơ pơm na Kră Yang wă kơ lu bơ̆n achăng tŭk, dah mă tơdrong arih pơmat tat wă kơ bơ̆n yak hlôi v.v….Athei adrin pơm kiơ̆ tơdrong Kră Yang pơkă wă kơ bơ̆n kĕjei. Wă kơ băt tơdrong Kră Yang dan hơmet na pơm kiơ̆ lei lu bơ̆n athei tơ’bưh hăm Kră Yang hăm tơdrong krao khan wă kơ băt tơdrong Kră Yang lăp đon kư̆m thoi tơdrong pơnam hŏk pơhrăm păng tơchĕng nơ̆r Kră Yang păng pơ’lơ̆ng pơm kiơ̆.

Ơ Kră Yang, apinh Ih ăn kơ inh đei jơhngơ̆m adrin iung blah, chăl arih đei hơmet lê̆, pơhrăm nơ̆r Ih, wă jang lu tơdrong jang pơmat mă Ih wă kơ inh jang. Krao khan yua Anăn Kră Yang Yêsu Krist, Amen.     

Lu bơ̆n pơm kiơ wă dă hơmet iung blah kiơ̆ nơ̆r Kră Yang wă kơ lu bơ̆n kĕjei?

Đŏk Sơ̆p Hla bơar ‘Bok Kei-Dei lăm pêng sơnăm: II Têsalônik 1

Kênh Youtube BHKTHN:

https://www.youtube.com/c/bhkthn

Bài trướcBi Blah Hlue Si Hdră Kčah Khua Yang – 23/11/2026
Bài tiếp theoChiến Đấu theo Kế Hoạch của Chúa – 23/11/2026