Klei Aê Diê Blŭ: I Kôrantô 10:1-13
Êlan kliăng: “Klei anăn truh čiăng bi hmô kơ drei, đăm drei čiăng kơ klei soh jhat msĕ si diñu” (I Kôrantô 10:6)
Klei êmuh ksiêm mĭn: Ya ngă phung aê kơ phung Israel êbuh djiê hlăm kdrăn tač? Mơ̆ng klei găn anăn, Khua ƀĭng kna Y-Pôl mâo êma klei mtă brei weh đuĕ ya jing klei mtă anăn? Hruê anei, ya klei hriăm drei mâo mơ̆ng klei phung nao êlâo găn leh?
Khua ƀĭng kna Y-Pôl blŭ djŏ kơ klei đăo đei êgao hnơ̆ng kơ klei pô srăng dưi hŏng klei mplư. Ñu amâo yua knŏng klei blŭ ôh čiăng hưn bi sĭt klei ñu mĭn jing djŏ ƀiădah ñu yua lu klei yăl dliê hlăm klei hƀuê ênuk phung dlăng hră ñu mơĭt mưng hmư̆ leh. Khua ƀĭng kna Y-Pôl brei ƀuh anei jing klei yăl dliê kơ phung tuôm thâo kral leh Khua Yang hŏng klei klă hlăm kdrăn tač: dôk ti gŭ biut knam, găn leh Êa Ksĭ Hrah, ƀơ̆ng mana mơ̆ng adiê, mnăm êa kbiă mơ̆ng boh tâo Aê Diê čiêm rông leh bŏ hŏng klei yuôm bhăn (êlan 1-4). Mơ̆ng anôk jing phung tuôm thâo kral klă leh Khua Yang, ƀiădah lĕ “Aê Diê bi mdjiê diñu hlăm kdrăn tač” kyuadah “Aê Diê amâo mơak ôh hŏng lu hĭn hlăm phung diñu” (êlan 5). Mơ̆ng klei mphŭn dơ̆ng jing jăk snăk ƀiădah sa klei tuč ruê̆ bŏ hŏng klei ênguôt!
Mơ̆ng klei truh leh hlăm kdrăn tač, Khua ƀĭng kna Y-Pôl mâo êma klei mtă brei weh đuĕ: Ngă tui si klei čiăng jhat, kkuh mpŭ kơ rup yang, ngă klei knhông, lông dlăng Khua Yang hŏng klei mĭn čiăng lŏ wĭt kơ klei hdĭp ti čar Êjip, klei blŭ dŭñ dŭñ (êlan 6-10). Jih jang klei yăl dliê čiăng lač hlăm klei mtă anei jing klei mtă phung Israel khăng yăl dliê kơ phung anak čô diñu čiăng “bi hmô” (êlan 6) leh anăn “bi hriăm” drei (êlan 11). Mnuih thâo mĭn jing mnuih thâo hriăm mơ̆ng klei găn leh anăn mơ̆ng klei soh ñu pô leh anăn mnuih mkăn, kyuadah drei amâo dưi hriăm ôh jih jang klei knŏng mơ̆ng klei soh drei pô. Klei truh leh kơ phung aê phung Israel hlăm kdrăn tač bi hriăm drei snei, wăt tơdah êlâo dih jing phung thâo kral sĭt leh Khua Yang, ƀiădah kyua kƀah klei răng snăn tuč klei hdĭp diñu hiu rưng hlăm kdrăn tač hlơr hrô kơ klei mŭt dôk hlăm čar mâo mnơ̆ng ƀơ̆ng huă mnăm êbeh dlai Khua Yang ƀuăn leh. Amâo djŏ Khua Yang bi mtlaih phung Israel kbiă mơ̆ng čar Êjip čiăng atăt diñu hiu rưng hlăm kdrăn tač ôh, ƀiădah kyua klei diñu kkuh mpŭ kơ rup yang, ngă knhông, kƀah klei đăo kơ Khua Yang, leh anăn klei diñu blŭ dŭñ dŭñ yơh ngă kơ klei hdĭp diñu hrô kơ klei jăk mơak ƀiădah jing hĕ klei knap mñai.
Hruê anei, drei dưi hriăm kơ klei phung nao êlâo găn leh, klei dưi jing sa phung ƀuôn sang Aê Diê ruah amâo dưi ƀuăn rơ̆ng ôh kơ klei huĭ mpŭ leh anăn bi mơak sui kơ Aê Diê. Klei tuôm găn leh brei nao mbĭt hŏng klei thâo răng. Mmông drei ƀuh drei dôk kjăp hĭn yơh khăng jing mmông drei kƀah klei răng leh anăn ênưih ngă soh hĭn. Knang kơ drei pô, drei amâo srăng lŏ gưt kơ Khua Yang leh anăn kơ Klei Ñu Blŭ ôh, mơ̆ng anăn, klei mplư mâo mmông găl kdơ̆ng ngă kơ drei ktang hĭn. Kyuanăn, “hlei pô mĭn ñu dôk dơ̆ng, brei ñu răng huĭdah ñu srăng lĕ buh” (êlan 12). Brei bĕ Klei Khua Yang Blŭ atăt gai grăp knhuang drei êbat hlăm klei hdĭp drei. Čiăng kơ klei jăk jĭn leh anăn klei pap Khua Yang tuh brei êbeh dlai nanao kơ drei.
Ti klei jing klei phung aê kơ phung Israel lĕ leh ăt jing klei soh drei dôk ngă mơh?
Wah lač: Ơ Khua Yang, đru kâo mâo klei thâo mĭn, thâo răng, leh anăn thâo luă gŭ hriăm mơ̆ng klei truh leh kơ phung nao êlâo čiăng kâo amâo lĕ hlăm klei mplư leh anăn bi luč hĕ klei jăk jĭn Ih brei ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Têsalônik 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:

































