Thứ Năm 19/11/2026
Trang chủ BÀI HỌC KINH THÁNH HÀNG NGÀY HMÔNG Kawm Cov Neeg Ua Ntej Tus Qauv – 20/11/2026

Kawm Cov Neeg Ua Ntej Tus Qauv – 20/11/2026

4

 

 

I Kauleethaus 10:1-13

Nqe cim:

“Tej ntawd qhia rau peb kom peb tsis txhob muaj lub siab ntshaw yam uas phem ib yam li lawv cov ntawd ntshaw” (I Kauleethaus 10:6)

Lus nug xav:

–       Vim li cas cov neeg Yixalayees cov yawgkoob raug tuag tas hauv tiaj suabpuam?

–       Ntawm qhov kev ntsib raug no, Timthawj Paulus muaj tsib lo lus los ceebtoom kom qaij?

–       Nimno, peb kawm tau yam dabtsi ntawm cov neeg mus ua ntej?

Timthawj Paulus hais txog qhov teebmeem uas ntseeg siab rau tus kheej lub zog tiv taus dhau sim siab. Paulus tsis hais daws nws zaj tiamsis nws siv tej zaj lus hauv keebkwm uas cov mloog paub los hais. Timthawj Paulus qhia paub tias nov yog keebkwm hais txog tiam ua ntej lawv twb yog cov neeg uas paub tus Tswv meej heev nyob hauv tiaj suabpuam: lawv nkaum hauv tauv huab, hla hiavtxwv liab, noj Manas saum ntuj los, haus tus dej txhawv hauv lub pobzeb uas Vajtswv ua (nqe 1-4). Txawm tias lawv yog cov neeg twb tau pom tus Tswv ua tej ntawd, los lawv tseem “tuag pawglug tom tiaj suabpuam” vim “ua tsis haum Vajtswv siab” (nqe 5). Nov yog qhov kev pib zoo heev tiamsis xaus rau qhov tu siab!

Qhov uas kawm tau tom tiaj suabpuam, Timthawj Paulus muab tsib lo lus los ceebtoom kom yuav tsum qaij: ua raws lub siab ntshaw yam phem, pemlom, ua txhaum kev nkauj kev nraug, sim tus Tswv siab xav rov mus ua neej nyob tebchaws Iziv, yws (nqe 6-10). Tej zaj lus no muab los ua cov lus ceebtoom qhia rau cov Yixalayees, lub homphiaj yog “ua qauv” (nqe 6) thiab “qhia” peb, yog cov uas nyob tamsim no (nqe 11). Tus neeg ntse yog tus paub kawm tej yam dhau los uas zoo thiab tsis zoo ntawm yus thiab lwm tus, rau qhov vim peb kawm tsis tau tagnrho txhua yam, qhov peb ua yuam kev peb kawm tau zoo dua. Cov neeg Yixalayees tej yawgkoob nyob tom tiaj suabpuam qhia rau peb tias, txawm yog paub tus Tswv meej los yog tsis ua tib zoo saib, yuav ua rau peb lub neej pheej ncig mus ncig los tom tiaj suabpuam xwb mus tsis tau hauv lub tebchaws uas av rog thiab zoo qoob uas tus Tswv pub li. Tus Tswv tsis yog cawm cov Yixalayees tawm tebchaws Iziv los mus ua neej nyob ntev loo tom tiaj suabpuam, tiamsis vim qhov uas lawv pemlom, ua txhaum kev nkauj kev nraug, tsis ntseeg tus Tswv, thiab yws ua rau lawv raug txomnyem.

Nimno, peb kawm tau tej uas cov neeg nyob ua ntej peb tau ua. Lub meejmom uas tau ua Vajtswv haivneeg thiab tej kev paub tus Tswv nws tsis ua tabpov rau txojkev ntseeg thiab ua haum Vajtswv siab ntev mus. Paub yuav tsum mus nraws nroos nrog qhov ua tib zoo ua. Qee lub sijhawm peb tso siab dhau yog lub sijhawm uas peb tsis ceevfaj thiab yoojyim ua yuam kev dua. Tso siab rau tus kheej, peb yuav tsis kam mloog Vajtswv lus thiab ua li Nws qhia, thaum ntawd txojkev sim siab yuav muaj chaw ntxias peb heev dua. Yog li ntawd, “leejtwg xav hais tias nws twb sawv khov kho lawm, nws yuav tsum ceevfaj nyob tsam nws ntog” (nqe 12). Cia li muab tus Tswv Txojlus los coj peb kev ua neej, kom tus Tswv txojkev kaj siab thiab kev hlub muaj puv nkaus hauv peb.

 

Thov Vajtswv,

Vajtswv, thov Koj pub kom nyuam yaus paub, ua tib zoo ua thiab txo hwjchim kawm tej uas cov neeg nyob ua ntej ua, nyuam yaus thiaj tsis raug ntxias, poob Koj txoj koob hmoov. Nyuam yaus tuav Tswv Yexus lub npe thov, Amees.

Yam dabtsi uas cov Yixalayees ua tsis tau thaud kuj yog qhov kev txhaum uas peb tabtom ua thiab?

Nyeem Vajluskub hauv peb lub xyoo: I Thexalaunikes 3a

Kênh Youtube BHKTHN: 

https://www.youtube.com/c/bhkthn

Bài trướcTP. HCM: Bế giảng Thánh Kinh Căn bản Dài hạn
Bài tiếp theoHriăm Mơ̆ng Klei Phung Nao Êlâo Bi Hmô – 20/11/2026