Thứ Bảy 21/11/2026
Trang chủ BÀI HỌC KINH THÁNH HÀNG NGÀY BAHNAR Chă Kră Yang Wă Kơ Hlôh Băt – 22/11/2026

Chă Kră Yang Wă Kơ Hlôh Băt – 22/11/2026

3

 

 

Tơdrong Pơđơ̆k 28:5

“Bơngai pơm kơnê̆ đê̆ pă băt tơdrong tơpăt; Mă-lei đei bơngai bu băt chă Kră Yang na băt hlôh đĭ-đăng.” (Tơdrong Pơđơ̆k 28:5)

 

Nơ̆r jet tơchĕng pơwao:

–               Yua kơ kiơ bơngai pơm kơnê̆ ưh kơ hlôh băt tơdrong tơpăt?

–               Bu băt chă Kră Yang gô pơhrăm iŏk tơdrong kiơ păng sơng iŏk tơdrong kiơ?

–               Lăm chăl arih ahrei âu, bơngai lui kơ KrăYang kăl kơ ‘măn jơnăr adrol hloh kơ lu tơdrong kiơ?

Chăl trong lăm sơ̆p hla bơar nơ̆r Kră Yang tơ’bôh tơdrong phara băl lu bơngai arih ataih đơ̆ng Kră Yang ‘Bok Kei-Dei păng lu bơngai đĭ jơhngơ̆m chă Kră Yang. Lu bơngai pơm kơnê̆ đĭ pă băt tơdrong tơpăt yua kơ jơhngơ̆m lu sư ưh pă tơchĕng tơdrong ‘lơ̆ng Kră Yang. Kơplah kon bơngai arih lăm tơdrong yoch, na jơhngơ̆m lu sư rai đunh rai arăng kơ̆l, rai pơm kơnê̆, pă băt kơnăl kơ tơdrong trŏ pang tơdrong glăi, lu sư chă pơma kơnê̆ kiơ̆ kơ jơhngơ̆m, đei lơi yua kơdih, dah mă kiơ̆ kơ tơdrong hơgăt tơ ala âu hloh kơ kiơ̆ nơ̆r Kră Yang bơtho tơ’bôh.

Tơplơ̆ dơ̆ng, bơngai băt chă Kră Yang ‘Bok Kei-Dei gô đei tơdrong hlôh wao păng hlôh băt gah bơhngol, “chă Kră Yang ‘Bok Kei-Dei” ưh kơ chă Kră Yang mưh tơ’bơ̆p pơmat tat đĕch ôh, mălei arih tơ’bưh hăm Kră Yang rim năr hăm tơdrong krao khan, pơhrăm nơ̆r Sư, kơkuh, păng chu kiơ̆ nơ̆r Kră Yang, kơplah chăl arih tơ’bưh hăm Kră Yang. Na Sư gô pơih măt bơhngol wă kơ lu bơ̆n băt Kră Yang lăp đon, păng lăng dôm tơdrong kiơ̆ kơ Kră Yang ‘Bok Kei-Dei.

Ahrei âu, kon bơngai đei lơ gơh hơgei, đei băng câp, mălei ưh kơ đei tơdrong hlôh wao gah bơhngol. Đei tơdrong lanh jơ̆p kơ (mang xã Hội) lơ tơdrong arih pơm ‘lơ̆ng mălei pơm tơplơ̆ pơm kơ kon ‘bônh kơ rŭng răng. Mă khan lei ră, bơngai chă Kră Yang tơpă gô đei Yang Bơhngol ‘lơ̆ng chông anhăk đơ̆ng Sư wă băt kơnăl tơdrong ‘lơ̆ng Kră Yang Yêsu khan: “Na iĕm gô băt tơdrong ‘Bok Kei-Dei tơpă, thoi noh na iĕm gô rơngei.” (Yôhan 8:32). Tơdrong ‘Bok Kei-Dei ưh kơ sĭ tơgŭm lu bơ̆n hlôh trŏ, mălei Sư gô ăn kơ bơ̆n rơngei đơ̆ng tơdrong yoch, tơdrong hli tơrơ, păng tơdrong gĭt ưh kơ trŏ tơ ala teh âu. ‘Bok bơtho A.w Tozer chih thoi âu: “Tơdrong gĭt kăl lăm minh ‘nu bơngai jơ̆ tơdrong sư tơchĕng gah ‘Bok Kei-Dei”, kơplah kon bơngai tơchĕng trŏ gah Kră Yang, chăl arih lu bơngai noh gô tơplh. Bơngai mă chă Kră Yang gô pơhrăm iŏk đơ̆ng tơdrong tơpăt, ‘mêm mơnat, tơjur akâu, păng arih pơm kơ ‘Bok Kei-Dei lăp đon.

Lăm chăl dang ei, bơngai lui kơ Kră Yang kăl kơ ‘măn jơnăr adrol hloh kơ Kră Yang tŏk bŏk lăm teh đak ‘bĕnh kơ hrăt hrot păng hrơ̆ng hreng. ‘Nĕ kơ chă lu tơdrong kĕjei đĕch, jên tơmam, dah anăn wă kơ đe ư-ang, mălei adrol hloh păng blŭng a hloh athei chă kiơ̆ Kră Yang lăp đon. Lăm hnam doenŏ, mĕ ‘bă kăl kơ bơtho kon hơ’lơ̆p pơhrăm nơ̆r Kră Yang đơ̆ng oei ‘lơ̆p wă kơ lu sư đei đon lui kơjăp păng arih pơm ‘lơ̆ng, wă kơ lu sư ‘lŏ, gô dơ̆ng kơjăp kơplah arih ‘bĕnh tơdrong kơnê̆ tơ ala teh âu păng bôl buăl. Na lăm hnam akŭm kăl kơ đei tơdrong pơhrăm wă kơ tơgŭm lu bơngai lui wơ̆ ‘lŏ lăm tơdrong hlôh băt gah Kră Yang păng nơ̆r Sư wă kơ đon lui sư huay kơ rŭng răng mưh đei tơdrong bơtho ưh kơ trŏ păng đei ‘bơm lăm teh đak âu.

Ơ Kră Yang, apinh Ih tơgŭm ịnh rơhing chă Ih hloh kơ chă tơdrong nai. Apinh pơih măt gah bơhngol wă kơ ịnh hlôh băt tơdrong Ih, băt kơnăl tơdrong trŏ tơdrong glăi, arih kiơ̆ kơ Ih lăp đon lăm rim năr. Krao khan yua Anăn Kră Yang Yêsu Krist, Amen.     

Lu bơ̆n oei chă tơdrong kiơ lơ hloh lăm chăl arih dang ei?

Đŏk Sơ̆p Hla bơar ‘Bok Kei-Dei lăm pêng sơnăm: I Têsalônik 5

Kênh Youtube BHKTHN:

https://www.youtube.com/c/bhkthn

Bài trướcTui Duah Aê Diê Čiăng Thâo Săng Klei Sĭt Nik – 22/11/2026
Bài tiếp theoTìm Kiếm Đức Chúa Trời để Hiểu Biết Lẽ Thật – 22/11/2026