Pajlug 28:5
Nqe cim:
“Cov neeg ua phem tsis paub txojkev ncaj ncees, tiamsis cov neeg uas hwm tus TSWV totaub zoo” (Pajlug 28:5)
Lus nug xav:
– Vim li cas tus neeg phem tsis totaub txoj kev ncaj ncees?
– Tus neeg nrhiav Vajtswv yuav kawm tau dabtsi thiab txais tau dabtsi?
– Hauv lub neej tamsim no, tus ntseeg Vajtswv yuav tau siv sijhawm ua ntej rau tej yam haujlwm twg?
Nqe Vajlugkub no qhia peb pom qhov txawv ntawm tus neeg uas nyob deb ntawm Vajtswv thiab tus neeg uas mob siab nrhiav Vajtswv. Tus neeg phem tsis totaub txoj kev ncaj ncees, vim nws lub siab tsis tig mus nrhiav Vajtswv txoj kev tseeb. Thaum ib tug neeg ua neej nyob hauv kev txhaum, nws lub siab yuav maj mam tawv thiab qhuav qhawv, feeb tsis meej yam twg yog thiab yam twg tsis yog. Lawv pheej txiav txim raws li lawv kev xav, kev muaj nqis rau lawv tus kheej, lossis ua raws li lub ntiajteb tus yam ntxwv heev tshaj li ua raws Vajtswv Txojlus qhia.
Txawv li ntawd, tus uas nrhiav Vajtswv yuav tau txais kev txawj ntse thiab kev to taub ntawm sab ntsujplig. “Nrhiav Vajtswv” tsis yog tsuas yog thaum peb ntsib teebmeem mam li los nrhiav Vajtswv xwb, tiamsis yog ua neej sib raug zoo nrog Vajtswv txhua hnub dhau los ntawm kev thov Vajtswv, nyeem Vajluskub, pehawm Vajtswv, thiab mloog Vajtswv lus. Thaum peb sib raug zoo nrog Vajtswv, yuav qhib peb lub qhov muag ntawm sab ntsujplig, kom peb totaub Nws lub siab nyiam thiab paub saib txhua yam raws li Vajtswv txoj kev xav.
Niaj hnub no, tibneeg muaj kev paub ntau thiab muaj ntawv povthawj kawm tiav qib siab, tiamsis tsis muaj kev txawj ntse ntawm sab ntsujplig. Muaj ntau txoj xovxwm tshaj tawm saum huab cua, muaj ntau txoj kev xav txog kev ua neej zoo sib txawv, ua rau tibneeg tsis paub yuav ua txoj twg. Tiamsis tus uas mob siab nrhiav Vajtswv tiag tiag, yuav tau txais Vaj Ntsujplig txoj kev coj dhau los ntawm Nws Txojlus kom yus paub qhov tseeb. Tswv Yexus hais tias: “Nej yuav paub qhov tseeb, thiab qhov tseeb ntawd yuav tso nej dim” (Yauhas 8:32). Vajtswv txoj lus tseeb tsis yog pab kom peb paub yam yog xwb, tiamsis tseem cawm thiab tso peb dim ntawm txoj kev txhaum, kev ntshai, thiab tej uas tsis muaj qabhau hauv lub ntiajteb no. Kx A. W. Tozer sau hais tias: “Yam tseemceeb tshaj ntawm ib tug neeg yog yam uas lawv xav txog Vajtswv”. Thaum tibneeg paub Vajtswv yog, lawv lub neej yuav tau hloov pauv. Tus neeg uas nrhiav tus Tswv yuav kawm tau txoj kev ncaj ncees , kev hlub, kev txo hwjchim thiab paub ua neej haum Vajtswv siab.
Hauv lub neej tamsim no, tus ntseeg yuav tsum siv sijhawm ua ntej rau Vajtswv hauv ib lub ntiajteb uas puv npo kev tabkaum thiab tej lus hais tsis muaj qabhau. Tsis tsuas yog nrhiav kev vammeej, nyiaj txiag, koob npe xwb tiamsis ua ntej huv tibsi yuav tsum xub nrhiav Vajtswv lub siab nyiam tso. Hauv tsevneeg, niam txiv yuav tsum qhia cov menyuam kawm Vajtswv Txojlus thaum tseem yau, kom tsim tsa lub plag kev ntseeg ruaj khov thiab yog rau menyuam, kom thaum lawv loj hlob tawm mus ua neej, yuav muaj peevxwm sawv ruaj khov tabmeeg tej kev xav fab yuam kev ntawm lub ntiajteb thiab tej phoojywg. Pawg ntseeg los kuj yuav tsum muaj tej hom phiaj uas phim kom pab cov ntseeg loj hlob hauv kev paub Vajtswv thiab Vajtswv Txojlus, kom lawv txoj kev ntseeg thiaj tsis raug ua yoj ua yees ntawm tej kev ntseeg yuam kev thiab cuamtshuam ntawm ntiajteb.
Thov Vajtswv,
Tus Tswv, thov pab kom nyuam yaus mob siab nrhiav Koj heev tshaj txhua yam. Thov qhib lub qhovmuag sab ntsujplig kom nyuam yaus totaub qhov tseeb, paub qhov yog thiab qhov tsis yog, thiab ua neej raws li Koj lub siab nyiam txhua hnub. Nyuam yaus tuav Tswv Yexus Khetos lub npe thov, Amees.
Peb tabtom nrhiav yam dabtsi ntau tshaj hauv peb lub neej niaj hnub nim no?
Nyeem Vajluskub hauv peb lub xyoos: 1 Thexalaunikes 5
Kênh Youtube BHKTHN:

































