Chủ Nhật 22/11/2026
Trang chủ BÀI HỌC KINH THÁNH HÀNG NGÀY HMÔNG Ua Rog Raws Li Vajtswv Kev Npaj – 23/11/2026

Ua Rog Raws Li Vajtswv Kev Npaj – 23/11/2026

2

 

 

Yausuas 8:3-9

Nqe cim:

“Thaum nej txeeb tau lub nroog lawm, nej cia li zes taws hlawv lub nroog raws li tus TSWV tau hais lawm. Tej no yog lus samhwm rau nej” (Yausuas 8:8)

Lus nug xav:

–       Vajtswv qhia Yausuas npaj cov tubrog mus tua thiab txeeb lub nroog A-is li cas?

–       Vim li cas txoj kev npaj txeeb zaum no txawv txoj kev npaj uas txeeb lub nroog Yelikaus?

–       Peb yuav ua li cas thiaj kovyeej tau peb tus kheej “lub nroog A-is”?

Tom qab uas hnov Vajtswv tej lus txhawb zog uas hais tias “tsis txhob ntshai lossis qaug zog,” Yausuas thiaj “sawv tsees” tsis qaug zog zaum twjzwm ib qhov chaw lossis ntshai li lawm. Nws coj cov tubrog mus tua lub nroog A-is, vim lawv nyob ntawm thaj chaw qis dua. Yausuas npaj txoj kev txeeb lub nroog A-is “raws li tus TSWV tau hais lawm” (nqe 8). Nws xaiv peb caug txhiab tus tubrog uas muaj zog thiab siab tawv, thaum ntuj tseem tsaus, txib lawv mus tuaj tom qab ntawm lub nroog A-is, sab hnub poob. Nws kuj txib tsib txhiab tus tubrog npaj txhij tos nyob sab hnub poob, nruab nrab ntawm lub nroog A-is thiab Npethees. Tshuav Yausuas nrog cov pejxeem mus ze ntawm nroog A-is thiab tsuam yeej nyob sab qaumteb, ntawd muaj ib lub hav quas lawv thiab lub nroog A-is. Raws li Vajtswv kev npaj tseg ces pab tubrog tsuam yeej sab qaumteb yuav xub mus ntaus thiab ua txuj swb khiav thaum raug cov tubrog A-is caum tua. Lawv yuav ntxias kom cov tubrog A-is tawm hauv nroog mus. Thaum ntawd pab tubrog uas nkaum tom qab lub nroog, ntawm sab hnub poob, yuav tawm mus txeeb kiag lub nroog vim tus Tswv twb muab cob rau lawv lawm.

Vajtswv tau coglus yuav pub cov Yixalayees ntaus yeej thaum mus txeeb lub nroog A-is (Yausuas 8:2), ib yam li Nws tau coglus yuav pub rau lawv ntaus yeej thaum txeeb lub nroog Yellikaus (Yausuas 6:2). Ua ntej ntawd, lawv tsuas yog mloog Vajtswv lus mus ncig puag ncig lub nroog hauv xya hnub xwb yeej tsis tsum ua dabtsi. Tiamis zaum no lawv yuav tsum mus vij hmo ntuj, tiv kev txomnyem, kev ntshai, npaj txhij ua rog raws li Vajtswv kev npaj tseg. Vajtswv siv ntau txoj haukev los daws tej yam teebmeem sib txawv. Hauv peb lub neej los kuj ib yam li ntawd, muaj tej thaum Vajtswv pub rau peb yoojyim ua tiav yam ub yam no lossis kovyeej yoojyim. Tiamsis, feem ntau tej haujlwm lossis tej kev nyuaj uas cheem tsum daws ces peb yuav tsum nriav Vajtswv kev coj, nyob tos thiab npaj txhij nqis tes. Vajtswv yeej tsis xav kom peb tsuas puag tes sawv saib, tiamsis yuav tsum npaj tawm tsam, npaj txhij txi tus kheej tom tsav rog,  ces Vajtswv yuav nrog nraim thiab pub kev kovyeej.

Peb txhua tus leejtwg los kuj muaj “lub nroog A-is” ntawm tus kheej, yuav tsum tawmtsam thiab nrhiav ua raws Vajtswv dej siab . “Lub nroog A-is” ntawd tej zaum yog lub siab tawv ntawm tus neeg tsis tau paub Vajtswv uas cheem tsum peb yuav tsum kov yeej. Tej zaum yog tej haujlwm nyuaj khwv twg uas Vajtswv xav kom peb ua, lossis yog tej kev txhaum lossis tus cwjpwm phem twg uas Vajtswv xav kom peb tso tseg. Lossis lub tsamthawj txomnyem uas peb yuav tsum hla kom dhau… Cia li npaj txhij ua raws li Vajtswv kev npaj tseg kom peb kovyeej. Xav paub Vajtswv kev npaj tseg thiab ua raws ces peb yuav tsum sib txuas ua phoojywg nrog Vajtswv dhau los ntawm kev thov Vajtswv, nquag nyeem kawm, xav thiab ua tib zoo ua raws Nws Txojlus qhia.

Thov Vajtswv,

Tus Tswv, thov pub rau nyuam yaus muaj tus cwj pwm npaj txhij tawm tsam. Muaj lub neej uas npaj txhij txhua, kawm thiab khaws Koj Txojlus, kom nyuam yaus muaj peev xwm ua tej haujlwm nyuaj uas Koj xav kom nyuam yaus ua. Nyuam yaus tuav Tswv Yexus Khetos lub npe thov, Amees.

Peb npaj dabtsi rau pluav rog uas Vajtswv xav kom peb kovyeej?

Nyeem Vajluskub hauv peb lub xyoos: 2 Thexalaunikes 1

Kênh Youtube BHKTHN: 

https://www.youtube.com/c/bhkthn

Bài trướcTìm Kiếm Đức Chúa Trời để Hiểu Biết Lẽ Thật – 22/11/2026
Bài tiếp theoBi Blah Hlue Si Hdră Kčah Khua Yang – 23/11/2026