Khiavdim 34:5-9
Nqe cim:
“Tus Tswv hla Mauxes xubntiag mus thiab hu hais tias, Kuv yog tus Tswv, Vajtswv tus uas muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees” (Khiavdim 34:6).
Lus nug rau sawvdaws xav:
- Zaj kawm hnub no qhia rau paub dabtsi hais txog tus Tswv uas yog Vajtswv?
- Mauxes ua dabtsi tabmeeg tus Tswv?
- Peb cheemtsum muaj tus cwjpwm thiab ua li cas tabmeeg Vajtswv?
Vajtswv tus uas nyob saum ntuj los nyob hauv tauv huab, nrog Mauxes sawv ua ke tiamsis Mauxes tsis paub hais tias tus Tswv tabtom sawv ze nws. Tus Tswv ua raws li Nws coglus rau Mauxes hais tias kuv qhia lub npe uas yog ‘Tus Tswv’ tabmeeg koj (Khiavdim 33:19). Hauv ntu Vajluskub hnub no, tus qhia Nws lub npe hu ua “Tus Tswv! Tus Tswv!”, ces Nws mam qhia txog Nws tus kheej meej dua. Tus Tswv tsis qhia tshwm rau Mauxes pom Nws yog Vajtswv tus muaj hwjchim loj kawg nkaus, tiamsis “yog tus Tswv, Vajtswv tus uas muaj lub siab puv nkaus kev hlub thiab tshua, yog tus uas tsis chim sai thiab yog tus uas muaj kev hlub thiab ncaj ncees.” (nqe 6).
Ntau leej hais tias Vajtswv nyob tiam Vajluskub Qub yog ib tug Vajtswv chim sai, rau txim, thiab txaus ntshai heev! Tiamsis Khiavdim 33:19 thiab 34:6-7 qhia paub, Nws yog Vajtswv muaj kev hlub nyob mus ibtxhis thiab ncaj ncees. Vim hlub, Nws tsis chim sai thiab ua siab ntev, pub koob hmoov mus ibtxhis, zam tau tej kev txhaum huvsi (nqe 7a; Khiavdim 20:6). Vim ncaj ncees, Nws tsis zam tus neeg txhaum tej kev txhaum li, thiab rau txim rau tej xeebntxwv mus txog peb plaub tiam neeg (nqe 7b, Khiavdim 20:5b). Tseeb tiag, kev ua neej ntseeg zoo thiab tawmtsam tus Tswv ntawm cov ua pogyawg, niamtxiv yuav ua qauv zoo lossis tsis zoo rau tej xeebntxwv xyaum. Dua li ntawd, nqi zog ntawm tej lus hais, ua haujlwm, xav hauv lub neej ntawm txhua tus tsis yog ua zoo pub rau tus neeg ntawd xwb tiamsis tseem ntsig txog tej xeebntxwv tom qab no thiab.
Sawv tabmeeg tus Tswv uas yog Vajtswv muaj tshwjchim ci ntsa iab, Mauxes txhos caug ntua hauv av pehawm tus Tswv. Mauxes taij thov tus Tswv los cuag Nws haivneeg, nws lees nws tej kev txhaum thiab cov pejxeem tej kev txhaum thiab thov Vajtswv lees yuav Nws haivneeg ua Nws tug (nqe 8-9). Zoo ib yam li Mauxes, peb cheemtsum txhos caug, muab peb lub siab tagnrho los pehawm Nws, ua tus Tswv tsaug vim Nws foom koob hmoov rau peb. Tus Tswv tus yamntxwv uas yog kev hlub rub kom peb mus ze Nws, qhia txhua yam uas peb zoo siab, nyuaj siab hauv lub neej rau Nws. Tshwjxeeb yog thaum peb qaug zog, ua txhaum rau tus Tswv, peb cia li ua siab tawv qhawv mus cuag Nws, lees txim, tso kev txhaum tseg thiab thov Nws zam txim. Vajtswv tus yamntxwv dawbhuv thiab ncaj ncees pab rau peb paub ntshai kev txhaum, tsis ua tej yam tawmtsam Nws kom peb thiab tej xeebntxwv tsis raug txim.
Thov Vajtswv,
Tus Tswv, nyuam yaus ua Koj tsaug vim Koj hlub thiab ua siab ntev rau nyuam yaus heev. Nyuam yaus qhuas Koj, thov Koj pab kom nyuam yaus muab siab rau ntseeg, mloog Koj lus thiab qhia tawm Koj txojkev zoo hauv lub neej. Amees.
Kawm paub tus Tswv uas yog Vajtswv tus dawbhuv thiab ncaj ncees, peb yuav ua neej zoo li cas?
Nyeem Vajluskub hauv peb lub xyoos: Yelemis 50:1-16
Kênh Youtube BHKTHN:
