Klei Aê Diê Blŭ: Y-Yôsuê 8:3-9
Êlan kliăng: “Tơdah diih mă leh ƀuôn, brei diih čuh ñu hŏng pui, ngă tui si Yêhôwa mtă leh. Anăn jing klei kâo mtă leh kơ diih.” (Y-Yôsuê 8:8)
Klei êmuh ksiêm mĭn: Si klei Aê Diê mtô Y-Yôsuê dăp êpul bi blah ƀuôn Ahi? Ya ngă hdră bi blah tal anei mdê hŏng klei bi blah ti ƀuôn Yêrikô? Si ngă čiăng dưi hĭn hlăm klei bi blah “ƀuôn Ahi” hlăm drei pô?
Leh hmư̆ klei Aê Diê mđĭ ai “đăm huĭ, đăm rŭng răng ôh”, Y-Yôsuê “kgŭ” amâo lŏ dôk sa anôk čiăng êdu ai amâodah huĭ hyưt ôh. Ñu hŏng phung lĭng kahan nao blah ƀuôn Ahi kyua diñu dôk ti anôk mâo krĭng lăn ti gŭ hĭn. Y-Yôsuê pŏk ngă hdră kčah plah mă ƀuôn Ahi “ngă tui si Yêhôwa mtă leh”(êlan 8). Ñu ruah tlâo pluh êbâo čô jhŏng ktang, hlăk adiê dôk mmăt, tiŏ digơ̆ nao kăp ti nah tluôn ƀuôn Ahi, jing nah yŭ. Ñu ăt tiŏ nao êma êbâo čô kahan kăp ti nah yŭ, ti krah ƀuôn Ahi leh anăn Bêthel. Bi Y-Yôsuê hŏng phung ƀuôn sang nao giăm ƀuôn Ahi leh anăn mdơ̆ng sang čhiăm ti nah dưr ƀuôn anei, anôk mâo sa tlung bi kgăn diñu hŏng ƀuôn Ahi. Hlue si hdră kčah Aê Diê snăn êpul kahan ti nah dưr srăng bi blah leh anăn mgưt êran đuĕ tơdah kahan Ahi tiŏ. Diñu srăng mplư kahan Ahi kbiă mơ̆ng ƀuôn. Hlăk anăn, êpul kahan dôk kăp nah tluôn, nah yŭ, srăng ksŭng nao plah mă ƀuôn kyua Aê Diê jao leh ƀuôn anăn hlăm kngan diñu.
Aê Diê ƀuăn leh srăng brei kơ Israel klei dưi tơdah nao blah ƀuôn Ahi (Y-Yôsuê 8:2), ăt msĕ mơh Ñu ƀuăn srăng brei klei dưi tơdah nao blah ƀuôn Yêrikô (Y-Yôsuê 6:2). Êlâo dih, diñu knŏng gưt asăp Klei Aê Diê Blŭ dar ƀuôn Yêrikô kjuh hruê đuč amâo guôn mâo hdră kčah kăp ti tluôn ôh. Ƀiădah ară anei, diñu gĭr kăp hlăm mlam, tŭ klei dleh dlan, huĭ hyưt, mprăp bi blah hluê si hdră Aê Diê. Aê Diê yua lu hdră mdê mdê čiăng mgaih msir klei dleh dlan mdê mdê. Hlăm klei hdĭp drei msĕ mơh, mâo tăp năng Aê Diê brei kơ drei klei tŭ jing amâodah dưi hŏng klei ênưih. Khădah snăn, lu bruă amâodah klei dleh dlan brei msir mgaih snăn brei drei tui duah klei Aê Diê čiăng, brei dôk guôn, brei mprăp leh anăn srăng ngă bruă. Aê Diê amâo čiăng ôh drei knŏng kuăl kngan dôk dlăng, ƀiădah brei mprăp bi blah, srăng nao hlăm anôk bi blah, leh anăn Ñu srăng dôk mbĭt leh anăn brei klei dưi.
Grăp čô hlăm phung drei mâo sơăi “ƀuôn Ahi” kơ hjăn pô, brei bi blah leh anăn tui duah klei Aê Diê čiăng hlue ngă, čiăng mâo klei dưi. “Ƀuôn Ahi” anăn năng ai jing dŭm ai tiê khăng phung ka thâo kral Khua Yang brei dưi bi mtlaih. Năng ai jing bruă dleh dlan Aê Diê čiăng kơ drei ngă, amâodah klei soh amâodah klei mưng amâo jăk Aê Diê čiăng drei lui. Amâodah klei dleh dlan brei dưi găn… Brei srăng ngă hlue si hdră kčah Aê Diê čiăng mâo klei dưi. Čiăng thâo kơ hdră kčah Aê Diê čiăng hlue ngă snăn brei drei bi mguôp kjăp hŏng Aê Diê hlăm klei wah lač čiăng tui duah klei Aê Diê čiăng ăt msĕ mơh kriăng hriăm leh anăn ksiêm mĭn Klei Aê Diê Blŭ leh anăn thâo răng hlue ngă.
Ya klei drei ngă čiăng mprăp kơ klei bi blah Aê Diê čiăng kơ drei dưi?
Wah lač: Ơ Khua Yang, akâo kơ Ih đru kâo mâo ai tiê srăng bi blah, mâo klei hdĭp mprăp, hriăm Klei Aê Diê Blŭ, čiăng ngă dŭm bruă dleh dlan Ih čiăng kâo ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Têsalônik 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:

































