Thứ Ba 17/11/2026
Trang chủ BÀI HỌC KINH THÁNH HÀNG NGÀY Ê ĐÊ Klei Dleh Dlan Leh Anăn Klei Đăo – 18/11/2026

Klei Dleh Dlan Leh Anăn Klei Đăo – 18/11/2026

4

 

Klei Aê Diê Blŭ: Klei Mphŭn Dơ̆ng 15:1-6

Êlan kliăng: “Y-Abram đăo kơ Khua Yang, leh anăn Ñu yap klei anăn jing klei kpă ênô kơ Y-Abram” (Klei Mphŭn Dơ̆ng 15:6)

Klei êmuh ksiêm mĭn: Ya klei dleh mâo kơ Y-Abram leh anăn ya klei Khua Yang ngă leh kơ Ñu? Klei Y-Abram lŏ wĭt ngă brei ƀuh si klei đăo jing yuôm hlăm klei bi mguôp hŏng Khua Yang? Si ngă drei bi êdah klei drei đăo kơ Khua Yang hlăm klei dleh dlan drei dôk bi tlă anăp?

Hlăm klei bi ƀuh, Aê Diê hriê kơ Y-Abram leh anăn lač snei: “Đăm huĭ ôh” (êlan 1). Y-Abram bi êdah klă klei ñu huĭ kơ Khua Yang snei: “Kyuadah kâo ka mâo anak ôh, leh anăn Y-Êliêser mơ̆ng ƀuôn Damas srăng jing pô dưn ngăn hlăm sang kâo” (êlan 2). Tui si klei dhar kreh ênuk anăn, tơdah khua amâo mâo anak čuê djuê ôh, ñu srăng mă rông sa čô dĭng buăl sĭt suôr hŏng ñu jing anak rông leh anăn lui ngăn dŏ kơ gơ̆. Sui thŭn leh tui hlue Khua Yang, đăo kơ klei Khua Yang ƀuăn srăng mjing ñu jing sa găp djuê prŏng, ƀiădah Y-Abram ăt ka mâo anak čuê djuê mơh. Klei anei bi ênguôt kơ ai tiê ñu, ñu mĭn ñu srăng ngă msĕ si lu mnuih mkăn mơh, mă dĭng buăl mjing anak rông. Sĭt nik ñu amâo mơak ôh hŏng klei ngă anei kyuanăn ñu lač kơ Khua Yang hŏng klei ƀuah: “Nĕ anei, Ih amâo tuôm brei anak kơ kâo ôh, leh anăn sa čô hlŭn kkiêng hlăm sang kâo srăng jing pô dưn ngăn kâo” (êlan 3).

Khua Yang thâo leh klei Y-Abram jing êlâo kơ ñu hưn kơ Khua Yang. Khua Yang lač anak ñu pô kkiêng yơh srăng jing pô dưn ngăn ñu (êlan 4). Khua Yang lŏ mñă kơ klei Ñu ƀuăn leh hŏng klei bi hmô klă snăk tơdah brei Y-Abram kngưr ală dlăng kơ phung mtŭ hlăm adiê leh anăn lač, “Kngưr ală phă adiê leh anăn yap mtŭ tơdah ih dưi, …msĕ snăn yơh anak čô ih srăng jing” (êlan 5). Klei bi knăl anei jing yuôm snăk kơ Y-Abram kyuadah Pô mjing leh mtŭ hlăm adiê ăt jing Pô ƀuăn srăng brei anak čô kơ gơ̆ mơh. Ñu ƀuăn rơ̆ng srăng bi sĭt ya klei Ñu ƀuăn leh.

Lŏ wĭt ngă hŏng klei ƀuăn, “Y-Abram đăo kơ Khua Yang, leh anăn Ñu yap klei anăn jing klei kpă ênô kơ Y-Abram” (êlan 6). Anei jing êlan Klei Aê Diê Blŭ klah čŭn kơ jih klei hdĭp Y‑Abram. Klei hdĭp – hdĭp hŏng klei đăo leh anăn mâo klei Khua Yang yap kpă. Khua ƀĭng kna Y-Pôl yua êlan Klei Aê Blŭ anei mơh čiăng mtô kơ hdră Aê Diê yap kpă kơ sa čô mnuih kluôm dhuôm kyua klei đăo amâo djŏ kyua sa mta bruă mnuih gĭr ngă ôh (dlăng Rôm 4:3; Galati 3:6). Kpă ênô amâodah mâo klei Khua Yang tŭ amâo djŏ boh tŭ mâo mơ̆ng klei sa čô mnuih gĭr ôh. Anăn jing klei brei, mâo klei Khua Yang “yap jing”. Amâo mâo sa čô mnuih jăk kluôm ênŭm năng kơ Khua Yang tŭ ôh. Ƀiădah kyua klei pap leh anăn klei khăp, Khua Yang Yêsu ngă leh jih jang klei mnuih amâo dưi ngă ôh. Hlei pô mă tŭ hŏng klei đăo srăng mâo klei Khua Yang tŭ, mâo klei yap kpă ênô. Akâo Khua Yang đru drei đăo kjăp nanao kơ Khua Yang srăng bi leh hdră jăk Ñu hlăm klei hdĭp drei msĕ si klei Ñu ƀuăn leh.

Êlâo hĭn drei hưn jih klei dleh dlan drei dôk găn leh anăn đăo kơ Khua Yang hĕ amâodah drei mgaih mkra mă drei pô?

Wah lač: Ơ Khua Yang, kâo bi mni kơ Ih kyuadah Ih thâo klei huĭ kâo êlâo kâo hưn kơ Ih. Đru kâo đăo kơ Khua Yang Yêsu leh anăn tŭ jih jang klei Ih ƀuăn leh. Đru kâo dôk sĭt suôr hlăm klei đăo kơ Ih, leh anăn hưn klei đăo anăn kơ pô mkăn msĕ mơh. Kâo wah lač hlăm Anăn Khua Yang Yêsu Krist. Amen.

Dlăng Klei Aê Diê Blŭ hlăm tlâo thŭn: I Têsalônik 1

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Kênh Youtube BHKTHN:

https://www.youtube.com/c/bhkthn

Bài trướcTeebmeem Thiab Cia Siab – 18/11/2026
Bài tiếp theoTơdrong Anat păng Lui Gơnang – 18/11/2026