Klei Aê Diê Blŭ: Klei Bi Hriêng 28:5
Êlan kliăng: “Phung ƀai amâo thâo săng ôh klei djŏ, ƀiădah phung duah Yêhôwa thâo săng jih” (Klei Bi Hriêng 28:5)
Klei êmuh ksiêm mĭn: Ya ngă phung ƀai amâo thâo săng ôh klei kpă ênô? Ya klei phung tui duah Aê Diê srăng hriăm leh anăn mă tŭ? Hlăm klei hdĭp ară anei, brei phung đăo kơ Khua Yang pioh mmông êlâo hĭn kơ ya klei?
Êlan Klei Aê Diê Blŭ anei brei ƀuh klei mdê plah wah mnuih hdĭp kbưi hŏng Aê Diê leh anăn mnuih jih ai tiê tui duah Aê Diê. Phung ƀai amâo thâo săng ôh klei kpă ênô kyua ai tiê diñu amâo mđing kơ klei sĭt nik Aê Diê ôh. Tơdah anak mnuih hdĭp hlăm klei soh, ai tiê diñu ƀrư̆ jing khăng, amâo lŏ thâo ôh klei djŏ leh anăn klei soh. Diñu khăng phat kđi hlue si klei ƀuh, klei tŭ dưn kơ pô, amâodah hlue si hnơ̆ng čuăn lăn ala hĭn kơ tui hlue si klei mtô mơ̆ng Klei Aê Diê Blŭ.
Bi mnuih tui duah Yêhôwa srăng mă tŭ klei thâo mĭn leh anăn thâo săng kơ klei hdĭp mngăt. “Tui duah Aê Diê” amâo djŏ knŏng duah Aê Diê tơdah tuôm hŏng klei dleh dlan ôh, ƀiădah hdĭp bi mguôp hŏng Ñu grăp hruê hlăm klei wah lač, hriăm Klei Aê Diê Blŭ, kkuh mpŭ, leh anăn gưt kơ Klei Aê Diê Blŭ. Tơdah klei hdĭp bi mguôp hŏng Aê Diê, Ñu srăng pŏk ală klei hdĭp mngăt čiăng kơ drei thâo săng klei Ñu čiăng leh anăn dlăng djăp mta bruă hlue si klei mĭn Aê Diê.
Hruê anei, anak mnuih mâo lu klei thâo, hră bi mklă, ƀiădah lĕ kƀah klei thâo mĭn hlăm mngăt. Mâo lu klei hâo hưn lar hlăm hla pŏk ala ƀuôn, lu klei mĭn knuih hdĭp bi mklăk ngă kơ anak mnuih ênưih rŭng răng. Khădah snăn, mnuih klă sĭt tui duah Aê Diê srăng mâo Yang Mngăt Jăk mtrang hlăm Klei Aê Diê Blŭ čiăng thâo săng klei sĭt nik. Khua Yang Yêsu lač: “leh anăn diih srăng thâo klei sĭt nik, leh anăn klei sĭt nik srăng bi êngiê diih” (Y-Yôhan 8:32). Klei sĭt nik Aê Diê amâo djŏ knŏng đru drei thâo săng djŏ ôh, ƀiădah lŏ bi mtlaih drei mơ̆ng klei soh, klei huĭ hyưt leh anăn dŭm klei soh čhuai lăn ala. Khua pô mtô A. W. Tozer čih: “Klei yuôm bhăn hĭn kơ sa čô mnuih jing klei diñu bi mĭn kơ Aê Diê”. Tơdah anak mnuih mâo klei thâo săng djŏ kơ Aê Diê, klei hdĭp diñu srăng dưi bi mlih. Mnuih tui duah Aê Diê srăng dưi hriăm klei kpă ênô, klei khăp, luă gŭ, leh anăn thâo hdĭp bi mơak kơ Aê Diê.
Hlăm klei hdĭp ară anei, phung đăo kơ Khua Yang brei pioh hruê mmông êlâo hĭn kơ Aê Diê ti krah sa ala ƀuôn mâo lu bruă leh anăn bŏ hŏng ênai ngañ. Đăm ôh knŏng duah klei tŭ jing, prăk mah, amâodah klei hing ang, ƀiădah êlâo hĭn leh anăn tal sa brei tui duah klei Aê Diê čiăng. Hlăm gŏ sang, brei amĭ ama mtô anak hriăm Klei Aê Diê Blŭ mơ̆ng điêt čiăng mkŏ mjing tur klei đăo kjăp leh anăn djŏ kơ anak, čiăng kơ tơdah diñu hriê kơ prŏng, srăng dôk kjăp ti anăp klei mĭn hdĭp soh čhuai mơ̆ng ala ƀuôn leh anăn phung găp. Phung Sang Aê Diê ăt brei mâo hdră djŏ guôp čiăng đru kơ phung đăo hriê kơ prŏng hlăm klei thâo kral Aê Diê leh anăn Klei Aê Diê Blŭ čiăng kơ klei đăo phung anak ƀuôn sang Aê Diê amâo mgei ôh ti anăp klei mtô soh leh anăn klei hmăi mơ̆ng lăn ala.
Drei dôk tui duah ya klei lu hĭn hlăm klei hdĭp ară anei?
Wah lač: Ơ Khua Yang, akâo kơ Ih đru kâo êpa mhao tui duah Ih hĭn kơ jih jang klei mkăn. Akâo kơ Ih mblang ală mngăt čiăng kâo thâo săng klei sĭt nik, thâo kral klei djŏ klei soh, leh anăn hdĭp hlue si klei Ih čiăng grăp hruê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Têsalônik 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:

































