Klei Aê Diê Blŭ: I Kôrantô 10:14-22
Êlan kliăng: “Diih amâo dưi mnăm ôh atŏ Khua Yang leh anăn atŏ phung yang jhat. Diih amâo dưi ƀơ̆ng huă ôh ti jhưng Khua Yang leh anăn ti jhưng huă phung yang jhat.” (I Kôrantô 10:21)
Klei êmuh ksiêm mĭn: Si Khua ƀĭng kna Y-Pôl đru brei thâo săng klă kơ bruă ƀơ̆ng mnơ̆ng ngă yang? Ya ngă mnuih “nao hlăm klei huă ƀơ̆ng” hlăm dŭm mmông ngă yang jing “bi mguôp” hŏng yang jhat? Si klei hưn brei răng mơ̆ng Khua ƀĭng kna Y-Pôl hlăk êlâo ăt pioh mtă kơ drei hruê anei?
Bruă huă ƀơ̆ng mnơ̆ng ngă yang jing bruă mjêč, boh sĭt leh anăn yuôm bhăn, kyua anăn Khua ƀĭng kna Y-Pôl lŏ dơ̆ng wĭt dlăng hŏng sa kdrêč mkăn. Trăn Klei Aê Diê Blŭ anei năng ai ngă kơ drei rŭng răng kyua klei amâo djŏ hŏng ya klei Khua ƀĭng kna Y-Pôl lač leh hlăm kdrêč 8, kơ bruă rup yang jing hơăi mang, ƀơ̆ng amâodah hơăi mnơ̆ng ngă yang ăt kăn hmaĭ rei.
Khua ƀĭng kna Y-Pôl đru drei thâo săng kơ bruă anei hŏng klei klă mngač hĭn mơ̆ng rup “ƀơ̆ng huă” (êlan 21). Hŏng klei mñă wĭt boh hră “bi mguôp” amâodah “klei bi mguôp” truh pă blư̆ (êlan 16-20), leh anăn boh blŭ anei jing boh blŭ phŭn hlăm klei bi trông, ñu brei ƀuh tơdah nao hlăm Klei Ƀơ̆ng Mnăm Sĭt Suôr, drei dôk bi mguôp hŏng êrah Khua Yang. Hlue si klei yuôm bhăn, hlăk anăn drei dôk bi mguôp jing sa hŏng Krist kbiă lŏ hdĭp hlăm sa asei mlei (êlan 16-17). Hlăm êlan 18, sa blư̆ dơ̆ng ñu yua rup mnuih ƀơ̆ng kđeh čĭm ngă yang myơr ti knưl Khua Yang čiăng bi hmô kơ klei sĭt nik anei. Ƀơ̆ng kpŭng, mnăm atŏ, ƀơ̆ng kđeh čĭm ngă yang myơr leh ti knưl ngă hlăm klei kkuh mpŭ ti sang yang. Ăt snăn mơh, bruă sa čô mnuih “huă mnăm” hlăm dŭm mmông ngă yang mâo klei kkuh mpŭ ăt ngă kơ pô anăn jing “bi mguôp” leh anăn jing sa hŏng yang jhat (êlan 20). Klei mtô tinei klă mngač snăk: Phung ƀuôn sang Aê Diê dưi ruah sa hlăm dua. Mdê hŏng kdrêč 8, bi trông kơ klei êngiê ruah ƀơ̆ng amâodah amâo ƀơ̆ng mnơ̆ng čhĭ hlăm sang mnia amâodah arăng iêô, tinei, klei “ngă yang” leh anăn “jhưng huă mnăm”, bi mguôp hlăm boh klei nao hgŭm, dôk mñă kơ klei ƀơ̆ng mnơ̆ng ngă yang hlăm boh klei kkuh mpŭ snăn jing bi mguôp hŏng yang jhat.
Khua ƀĭng kna Y-Pôl lač leh klei hưn brei răng hŏng jih ai tiê: “Kyuanăn yơh, Ơ phung kâo khăp, đuĕ bĕ mơ̆ng klei kkuh rup yang” (êlan 14). Klei hưn brei răng anei amâo djŏ knŏng mtă kơ phung đăo ti Kôrantô hdĭp hlăm dhar kreh bŏ hŏng klei kkuh kơ phung yang mkăn ôh, ƀiădah lŏ jing ênai tiêng liêng bi mdih kơ drei hruê anei. Năng ai drei amâo kkuh kơ rup yang hŏng klei nao hlăm dŭm klei bhiăn kkuh mpŭ ti sang yang ôh, ƀiădah tơdah kƀah klei răng, snăn boh klei leh anăn anôk drei truh ăt srăng ngă kơ drei lĕ hlăm klei bi mguôp hŏng yang jhat ƀiădah drei amâo thâo ôh. Mđing hmư̆ leh anăn mđing kơ dŭm klei mdian, phim rup, video klei mmuñ, klei kdŏ mmuñ mni kơ klei ngă knhông, ngă jhat, bi dôk hdơ̆ng êkei, hdơ̆ng mniê… ăt jing bi mguôp hŏng yang jhat. Akâo kơ Khua Yang đru drei thâo răng jih ai tiê.
Mâo mơ̆ ya klei brei drei bi mlih leh hriăm klei hriăm anei?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo bi mguôp hŏng yang jhat ƀiădah kâo amâo thâo. Akâo kơ Ih đru kâo thâo ƀuh leh anăn thâo răng hŏng dŭm anôk, ya klei kâo nao, čiăng kơ klei hdĭp kâo knŏng kkuh kơ Khua Yang đuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Têsalônik 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:

































