Klei Aê Diê Blŭ: Y-Đaniel 9:1-19
Êlan kliăng: “kyuadah hmei kwưh kơ Ih amâo djŏ ôh kyua klei kpă ênô hmei pô, ƀiădah kyua klei pap prŏng Ih.” (Y-Đaniel 9:18b)
Klei êmuh ksiêm mĭn: Hŏng si ai mĭn Y-Đaniel iêô kwưh kơ Khua Yang? Ti anôk ñu kna čiăng iêô kwưh? Si ai tiê ñu hŏng phung ƀuôn sang? Ya bruă čiăng Phung Sang Aê Diê bi mđĭ ai phung anak Aê Diê ngă brei kơ phung ƀuôn sang?
Y-Đaniel arăng ba mđuĕ jing mnă dôk kbưi hŏng phung ƀuôn sang pô leh anăn lu thŭn êgao leh, ƀiădah ai tiê ñu ăt uêñ mĭn phă phung ƀuôn sang ñu. Êngao kơ anăn, ñu hur har djă pioh klei bhiăn Aê Diê, ñu amâo ư ai mbĭt leh anăn čuăn amâo bi čhŏ ñu pô ôh êjai dôk hlăm čar tue. Ñu kriăng dlăng leh anăn ksiêm Klei Aê Diê Blŭ, klei anei yơh mtrŭt ñu wah lač brei kơ phung ƀuôn sang lu hĭn (êlan 3). Ñu amâo knŏng wah lač ƀiădah wăt hŏng klei “kăm ƀơ̆ng huă, hơô klŭng ƀui hbâo” čŏk hia kơ klei soh jih jang phung ƀuôn sang (êlan 3-6).
Y-Đaniel bi ti gŭ ñu pô nao ti anăp Khua Yang čiăng kwưh akâo kơ Khua Yang pap brei kơ lăn čar ñu. Klei Y-Đaniel wah lač jing jar bi hmô kơ jih jang klei wah lač dăp pruê̆ msĕ snei: Kkuh mpŭ, Hưn klei soh, Bi mni leh anăn Kwưh akâo. Ñu kčưm dơ̆ng klei wah lač hŏng klei kkuh mpŭ leh anăn mpŭ mni kơ Aê Diê (êlan 4). Êlan 5 ñu kčưm hŏng klei hưn klei soh ñu pô leh anăn klei soh phung ƀuôn sang. Wăt tơdah Y-Đaniel dôk kjăp, sĭt suôr leh anăn hŏng jih ai tiê djă pioh klei bhiăn Aê Diê ktuê jih thŭn mlan arăng mă jing mnă, ƀiădah ñu ăt yap ñu pô mbĭt hŏng jih jang klei soh phung ƀuôn sang ngă, ñu yua boh blŭ “hmei” lu blư̆ hlăm trăn anei.
Mklăk wĭt hŏng knhuah hdĭp phung ƀuôn sang “hngah amâo čiăng gưt asăp”, Y-Đaniel kwưh akâo kơ Khua Yang “hmư̆ bĕ” klei ñu kwưh akâo, ƀiădah amâo djŏ kna ti klei kpă ênô phung ƀuôn sang ôh, ƀiădah kna ti klei khăp klei pap leh anăn klei sĭt suôr, klei doh jăk Khua Yang. Anak mnuih amâo tuôm dưi truh tơl kơ hnơ̆ng kpă ênô Khua Yang ôh, ƀiădah dưi hưn klei soh, kmhal kơ klei soh, kwưh akâo klei Aê Diê pap brei klei soh (êlan 5-14), Y-Đaniel akâo kơ Khua Yang hmư̆ leh anăn ngă bĕ. Ñu akâo kơ Aê Diê đăm lŏ krư̆i ôh kyua ƀuôn leh anăn phung ƀuôn sang anei arăng pia hŏng Anăn Aê Diê (êlan 15-19).
Y-Đaniel wah lač leh hŏng knuih đup gưt kluôm dhuôm kơ Aê Diê. Ñu thâo kral hlei Aê Diê jing leh anăn ñu thâo mơh klei soh phung ƀuôn sang. Klei ñu wah lač bi êdah ai tiê ñu uêñ mĭn leh anăn thâo săng kơ phung ƀuôn sang Israel. Aê Diê wĭt lač leh kơ klei ñu kwưh akâo hlăm trăn lŏ čuê.
Tui hlue klei Khua pô hưn êlâo Y-Đaniel bi hmô, phung anak Aê Diê hruê anei brei mđing uêñ kơ phung ƀuôn sang drei pô lu hĭn. Lăn čar drei čiăng snăk mâo lu mnuih wah lač brei kơ găp djuê ƀuôn sang. Phung Sang Aê Diê leh anăn ayŏng amai adei hlăm Phung Sang Aê Diê brei bi mđĭ ai hdơ̆ng pô pioh mmông bi mguôp sa ai wah lač brei kơ găp djuê ƀuôn sang, kơ lăn čar čiăng klei pap Aê Diê tuh ti dlông lăn čar drei, leh anăn jih jang mnuih dưi dôk hdĭp hlăm klei hnŭk ênang.
Si ngă drei uêñ mĭn leh anăn wah lač brei kơ găp djuê ƀuôn sang drei mơ̆?
Wah lač: Ơ Khua Yang, bi mni Khua Yang kơ klei Y-Đaniel bi hmô wah lač. Akâo Khua Yang pap brei kơ klei soh kâo, kyua kâo ka uêñ mĭn wah lač brei kơ găp djuê ƀuôn sang. Akâo Khua Yang mtrŭt kâo mâo klei khăp kơ lăn čar kâo, thâo uêñ mĭn leh anăn wah lač brei kơ găp djuê ƀuôn sang lu hĭn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 60-61
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
