Đaniel 9:1-19
“Ưh kơsĭ gơnang kơ tơdrong tơpăt nhôn kơdih na krao apinh Ih, mă-lei gơnang kơ đơ̆ng tơdrong Ih ‘mêm mơnat kơ đĭ-đăng”.(Đaniel 9:18b)
Nơ̆r jet tơchĕng pơwao:
– ‘Bok Đaniel đĭ jơhngơ̆m krao khan hăm Kră Yang lăm jơhngơ̆m đon thoi yơ?
– Sư lui gơnang kơ yă kiơ wă kơ krao apinh?
– Jơhngơ̆m sư hăm kon pơlei thoi yơ?
– Khul Lui kăl kơ pơdrŭt kon pơlei Kră Yang pơm kiơ ăn kơ adrĕch adrung sư?
‘Bok Đaniel đe puh sư oei ataih kơ teh đak sư đunh sơnăm mă-lei jơhngơ̆m sư oei ‘blŏk tơtăm păng tơchĕng kơ adrĕch adrŭng sư. ‘Nguaih kơ noh, sư kư̆m ling-lang đĭ jơhngơ̆m pơm kiơ̆ khôi juăt Kră Yang, ưh kơ tơmơ̆t hơdai păng ưh kơ wă ‘mê̆ ‘mach tơ anih tơmoi. Sư ling-lang đŏk păng tơchĕng hơlen Sơ̆p Hla ar ‘Bok Kei-Dei, tơdrong âu pơtrŭt sư krao khan tơgŭm adrĕch adrŭng sư lơ hloh (tr 3). Sư ưh kơsĭ krao khan đĕch mă kư̆m “ơ̆t kơ sŏng sa, hrŭk ao ‘bi, yơ̆l tơnuh” wă nhơ̆m hmoi gah tơdrong yoch kon pơlei (tr 3-6).
‘Bok Đaniel tơ jur akâu kơdih hăm Kră Yang wă kơ krao apinh Kră Yang mơnat kơ teh đak sư. Nơ̆r krao khan ‘bok Đaniel jơ̆ pơm rup kơmĭl kơ dôm nơ̆r krao khan hơrĭ hơrĭ thoi âu: Kơkuh, roi tơdrong yoch, bơnê păng Krao apinh. Sư pơih krao khan blung a ‘noh kơkuh păng ư-ang kơ ‘Bok Kei-Dei (tr 4). Trong 5 pơih blŭng a gah roi tơdrong yoch kon pơlei păng kơdih kâu sư. Mă khan ‘bok Đaniel kơjăp păng đĭ jơhngơ̆m hăm Kră Yang ‘Bok Kei-Dei păng wei răk khôi juăt Sư lăm đĭ khei ‘năr arih tơ teh đak tơmoi, sư oei dan sư kơdih lăm dôm tơdrong kon pơlei mă sư oei roi tơbral, sư yua nơ̆r “lu nhôn’’ lơ wơ̆t lăm sơ̆p hla ar âu.
Tơplơ̆ dơ̆ng hăm kon pơlei “ưh kơ wă mơ̆ng”, ‘bok Đaniel krao khan apinh Kră Yang “adrin mơ̆ng” nơ̆r sư krao apinh, ưh kơsĭ đơ̆ng tơdrong ‘lơ̆ng tơpăt kon pơlei ôh mă lei kiơ̆ kơ tơdrong ‘mêm mơnat păng tơdrong tơpăt, ‘lơ̆ng rơgoh Sư. Kon bơngai ưh kơ đei la-yơ kĕ pơm ‘blep kiơ̆ tơdrong ‘lơ̆ng tơpăt Kră Yang, mă-lei gơh roi tơdrong yoch, tơbral kiơ̆ kơ tơdrong ‘mêm mơnat Kră Yang na krao khan. Đơ̆ng rŏng kơ roi tơdrong yoch apinh Kră Yang mơnat ăn (tr 5-14). ‘Bok Đaniel apinh Kră Yang pơđêng đon păng pơm hloi. Sư krao apinh Kră Yang ‘nĕ kơ pơhiơ̆ yua kơ pơlei păng adrĕch adrŭng âu mă đei krao hăm Anăn Sư (tr 15-19).
‘Bok Đaniel đei krao khan hăm jơhngơ̆m đon chu yom ‘Bok Kei-Dei tôm tơdrong. Sư băt kơ Kră Yang noh bu păng băt kơnăl kơ tơdrong yoch kon pơlei. Nơ̆r sư krao khan tơ’bôh hơđăl đei jơhngơ̆m tơchĕng tơtăm păng hlôh băt kơ kon pơlei Isơrael. ‘Bok Kei-Dei đei tơl nơ̆r sư krao khan lăm sơ̆p hla ar pơtrơp đơ̆ng rŏng.
Rok kiơ̆ kơmĭl ‘bok Đaniel ‘bok khan lê̆ hơdrol, kon pơlei Kră Yang dang ei kăl kơ ‘blŏk tơtăm kơ adrĕch adrŭng bơ̆n kơdih mă lơ hloh. Teh đak lu bơ̆n kăl kơ đei lơ bơngai krao khan tang ăn kơ kon pơlei. Khul Lui păng ‘nhŏng oh lăm Hnam Akŭm kăl kơ pơdrŭt dih băl kăl kơ ‘măn jơ ‘năr pôm jơhngơ̆m đon krao khan ăn kơ adrĕch adrŭng, kơ teh đak wă kơ tơdrong pŭn hiôk păng tơdrong ‘mêm mơnat Kră Yang tuh ‘bĕnh blai kơ teh đak bơ̆n păng rim ‘nu arih hiôk, rơnŭk rơnua.
Ơ Kră Yang, inh bơnê kơ Ih gah kơmĭl krao khan đơ̆ng ‘bok Đaniel. Apinh mơnat ăn kơ inh yua kơ inh tam mă ‘blŏk tơtăm krao khan tang kơ adrĕch adrŭng.Apinh pơdrŭt jơhngơ̆m inh ‘mêm mơnat kơ teh đak inh,băt ‘blŏk tơtăm păng krao khan kơ adrĕch adrŭng mă lơ hloh. Yua anăn Kră Yang Yêsu Krist, Amen
Lu bơ̆n hăm ‘blŏk tơtăm krao khan adrĕch bơ̆n ưh?
Đŏk Sơ̆p Hla ar ‘Bok Kei-Dei lăm pêng sơnăm:Hơriso 60-61.
Kênh Youtube BHKTHN:
