Daniyees 9:1-19
Nqe cim:
“Peb tsa ncauj thov koj tsis yog vim peb yog neeg ncaj ncees, tiamsis vim koj yog tus uas hlub peb thiab yog tus ncaj ncees” (Daniyees 9:18b)
Lus nug rau sawvdaws xav:
– Daniyees thov Vajtswv hauv lub siab tuaj li cas?
– Nws vam qhov twg los taij thov?
– Daniyees muaj lub siab li cas rau Nws haivneeg?
– Pawg ntseeg cheem tsum txhawb cov ntseeg ua dabtsi rau yus haivneeg?
Daniyees raug poob mus ua cev qhev deb nws lub tebchaws ntau lub xyoo lawm tiamsis nws tseem muaj lub siab hmov tshua thiab tig xubntiag los rau yus haiv neeg. Dhau li ntawd, nws tseem rau siab ua raws li Vajtswv tej kevcai, tsis koom siab thiab tsis cia yus lub cev qias ntawm lwm haivneeg lub tebchaws. Nws pheej nyeem thiab xav Vajtswv Txojlus, qhov no thiaj txhawb tau nws thov Vajtswv rau nws haivneeg ntau dua(nqe 3). Nws tsis yog thov Vajtswv xwb tiamsis tseem “yoo mov, hnav ntaubtsaj thiab zaum hauv qhov tshauv” quaj txog tagnrho nws haivneeg tej kev txhaum (nqe 3-6).
Daniyees txo hwjchim thiab mus cuag Vajtswv thov kev hlub tshua rau nws haivneeg. Daniyees txoj kev thov Vajtswv yog tus qauv rau kev thov Vajtswv muaj quas raws li nram qab no: Txhawb nqa, Lees txim, Ua tsaug thiab Taij thov. Daniyees qhib thawj rau txoj kev thov Vajtswv los ntawm tej lus txhawb nqa thiab qhuas Vajtswv (nqe 4). Nqe 5 qhib thawj rau feem kev lees txim ntawm nws thiab nws haivneeg tej kev txhaum. Txawm hais tias Daniyees ncaj ncees thiab sawv ruaj khov rau kev mob siab nriav Vajtswv thiab ceev Vajtswv tej kevcai hauv ntu sijhawm caijnyoog ua cev qhev los nws tseem muab nws txawb nrog rau nws haiv neeg tej kev txhaum uas nws tabtom lees txim ntawd, Daniyees siv lo lus “peb” ntau zaug hauv ntu Vajluskub no.
Daniyees tsis ua zoo li nws haivneeg uas “tsis xav mloog”, tiamsis nws thov Vajtswv “mloog” nws tej lus taij thov, nws tsis vam kev ncaj ncees ntawm nws haivneeg tiamsis vam ntawm Vajtswv txoj kev hlub, kev ncaj ncees thiab Nws txoj kev dawbhuv. Tibneeg yeej ua tsis tau ncaj ncees raws li qhov uas Vajtswv xav tau, tiamsis muaj peevxwm lees lxim, tso kev txhaum tseg thiab vam Vajtswv txoj kev hlub tshua taij thov. Tom qab uas lees txim thiab thov Vajtswv kev zam txim lawd(nqe 5-14) Daniyees thov Vajtswv tig saib thiab ua haujlwm. Nws thov Vajtswv tsis txhob ncua sijhawm lawm vim lub nroog thiab haivneeg no raug hu raws li Vajtswv lub npe (nqe 15-19).
Daniyees thov Vajtswv los ntawm tus cwjpwm tag siab nrho mloog Vajtswv lus. Nws zeem paub Vajtswv yog leejtwg thiab zeem paub nws haivneeg tej kev txhaum. Daniyees tej lus thov Vajtswv qhia pom nws lub siab hmov tshua thiab totaub cov Yixalayees. Vajtswv thiaj teb nws tej lus thov rau ntu Vajluskub txuas ntxiv.
Xyaum raws tus Cevlus Daniyees tus qauv, Vajtswv cov menyuam niaj hnub nim no yuav tsum hmov tshua txog yus haivneeg ntau dua. Peb lub tebchaws cheem tsum muaj cov neeg sawv cev thov Vajtswv pab rau yus haivneeg. Pawg ntseeg thiab cov ntseeg txhua tus yuav tsum sib txhawb zog siv sijhawm los koom siab thov Vajtswv pab cov pejxeem, lub tebchaws kom Vajtswv txoj koob hmoov thiab kev hlub tshua muaj puv npluamias rau yus lub tebchaws thiab kom sawvdaws ua neej thajyeeb thiab kaj siab lug.
Thov Vajtswv,
Tus Tswv, nyuam yaus ua Koj tsaug rau Daniyees tus qauv ntawm kev thov Vajtswv. Thov zam txim rau nyuam yaus vim nyuam yaus tsis tau hmov tshua thiab tsis tau sawv cev thov Vajtswv Koj pab rau nyuam yaus haivneeg. Thov Koj pub kom nyuam yaus muaj lub siab hlub nyuam yaus lub tebchaws thiab thov Vajtswv ntau dua rau nyuam yaus haivneeg. Nyuam yaus tuav Tswv Yexus Khetos lub npe thov, Amees.
Peb puas hmov tshua thiab thov Vajtswv pab rau yus haivneeg?
Nyeem Vajluskub hauv peb lub xyoos: Ntawv Nkauj 60-61
Kênh Youtube BHKTHN:
