Klei Aê Diê Blŭ: Y-Mathiơ 17:19-20
Êlan kliăng: “Êdei tinăn phung ƀĭng kna nao kơ Yêsu hjăn leh anăn lač, “Si ngă hmei amâo dưi suôt ôh yang jhat anăn?” Yêsu lač kơ diñu, “Kyuadah klei đăo diih điêt. ” (Y-Mathiơ 17:19-20a)
Klei êmuh ksiêm mĭn: Leh Khua Yang Yêsu suôt yang jhat mơ̆ng hđeh, si klei phung ƀĭng kna êmuh hjăn Ñu? Si Khua Yang wĭt lač? Klei Khua Yang wĭt lač mtô drei si klei hriăm kơ klei đăo?
Leh Khua Yang Yêsu suôt yang jhat mơ̆ng hđeh, phung ƀĭng kna nao giăm čiăng êmuh hjăn Khua Yang, “Si ngă hmei amâo dưi suôt ôh yang jhat anăn?” Diñu dôk mtŭk mtŭl hlăm klei pô amâo tŭ dưi, diñu rŭng răng amâo thâo ôh ya ngă diñu jing phung mâo Khua Yang brei klei myang suôt yang jhat leh anăn ăt tuôm suôt leh yang jhat ƀiădah hruê anei amâo dưi suôt ôh yang jhat mơ̆ng hđeh điêt. Ară anei, diñu klă sĭt čiăng thâo mta phŭn ya ngă diñu amâo dưi ngă leh anăn ăt čiăng thâo si ngă čiăng dưi bi kdơ̆ng leh anăn dưi hŏng klei mmăt.
Khua Yang Yêsu wĭt lač kơ phung ƀĭng kna “Kyuadah klei đăo diih điêt…”(êlan 20), amâo djŏ diñu amâo mâo klei đăo ôh ƀiădah jing amâo ktang ôh hlăm klei đăo, anei jing klei bi knăl khăng ƀuh hlăm wưng phung ƀĭng kna tui hlue Khua Yang Yêsu.Tơdah găl ênưih diñu ktang snăk ƀiădah tơdah tuôm hŏng klei dleh dlan, klei đăo diñu điêt dhiêt leh anăn jang anôk kơ klei đing. Sa klei đing ăt hmăi kơ klei ai ktang mngăt myang. Khua Yang ăt dôk bi hriăm diñu klei thâo gĭr hlăm bruă msir mgaih djăp klei truh kơ pô, drei amâo thâo ôh phung ƀĭng kna gĭr suôt leh yang jhat hlăm dŭm boh sui ƀiădah tơdah Khua Yang Yêsu trŭn mơ̆ng čư̆, diñu lui leh leh anăn tŭ klei amâo dưi ngă. Phung ƀĭng kna brei thâo klei myang diñu mâo jing Khua Yang brei, brei diñu knang kluôm dhuôm hlăm Khua Yang čiăng dưi jing ktang, hriê kơ prŏng leh anăn tŭ dưn.
Klei hriăm mñă kơ grăp čô phung đăo hruê anei jing brei thâo kơ boh klei klei đăo pô. Drei dôk hlăm boh klei “ƀiă klei đăo” mơ̆? “Ƀiă klei đăo” jing drei knŏng mâo klei đăo bi mtlaih ƀiădah ka dưi truh ôh kơ klei jao jih hlăm klei đăo. Khua Yang čiăng kơ drei kluôm dhuôm đăo kơ Ñu hlăm djăp boh klei, wăt tơdah ư̆ êpa, klei ruă duam, arăng ngă jhat…, kyuadah tơdah drei knŏng knang kơ Khua Yang hlăk êjai mâo djăp ênŭm mnơ̆ng dhơ̆ng amâodah hlăm klei găl jăk snăn tơdah klei suaih pral toh hroh, prăk mah luč jih, bruă knuă mă amâo tŭ jing, leh anăn wăt gŏ sang ăt tuôm hŏng dleh dlan…, snăn hlăk anăn drei bi êdah sa klei đăo jao jih kơ Khua Yang mơ̆ amâodah hơăi ? Khua Yang Yêsu čiăng drei ƀrư̆ hruê ƀrư̆ ktang leh anăn hriê kơ prŏng hlăm klei đăo kơ Ñu. Msĕ si sa čô mjuăt asei mlei brei jing ktang hĭn hŏng hdră ƀrư̆ ƀrư̆ mđĭ hnơ̆ng ktrŏ boh poa, amâodah êran êlan kbưi hĭn, snăn sa čô mnuih đăo brei jing ktang hĭn hlăm klei đăo hŏng bruă găn klei lông dlăng ƀrư̆ đĭ hĭn. Mơ̆ng klei lông dlăng, drei srăng bi êdah klei êdu awăt pô leh anăn ƀrư̆ knang kơ Khua Yang hĭn.
Si drei ngă čiăng klei đăo ƀrư̆ hruê ƀrư̆ ktang hĭn?
Wah lač: Ơ Khua Yang, akâo kơ Ih đru kâo ƀrư̆ kjăp ktang hĭn hlăm Khua Yang leh anăn ƀrư̆ hriê kơ prŏng hĭn hlăm klei đăo čiăng kơ kâo dưi găn hŏng klei lông dlăng, dleh dlan ƀrư̆ prŏng hĭn hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
