Mathais 17:19-20
Nqe cim:
“Vim li cas peb ntiab tsis tau dab tawm? Yexus teb hais tias, twb yog vim nej tsis muaj kev ntseeg txaus.” (Mathais 17:19-20a)
Lus nug rau sawvdaws xav:
– Tom qab uas Tswv Yexus ntiab dab tawm hauv tus metub lawd, cov thwjtim nug tus Tswv yam dab tsi?
– Tus Tswv teb cov thwjtim lo lus nug li cas?
– Tus Tswv cov lus teb qhia rau peb txog yam dab tsi?
Tom qab uas Tswv Yexus ntiab dab tawm hauv tus metub lawd, cov thwjtim los nug Tswv Yexus twjywm hais tias, “vim li cas peb ntiab tsis tau dab tawm?” Cov thwjtim xav tsis thoob txog qhov uas lawv ua tsis tau, lawv ntxhov siab thiab tsis totaub hais tias, lawv twb tau Tswv Yexus pub hwjchim lawm tiamsis ntiab tsis tau dab tawm, yav dhau los lawv twb ntiab tau dab lawm tiamsis zaum no ntiab tsis tau dab tawm hauv tus metub mus. Lawv xav paub tseeb qhov teebmeem vim li cas lawv ua tsis tau thiab xav paub yam yuav tsum ua kom ntiab tau dab.
Tswv Yexus teb rau cov thwjtim hais tias, “twb yog vim nej tsis muaj kev ntseeg txaus…” (nqe 20). Tsis muaj kev ntseeg txaus thiab qaug zog ntawm kev ntseeg lawm, ces yuav ua tsis tau ib yam dab tsi li. Thaum tau zoo cov thwjtim muaj zog heev tiamsis thaum ntsib kev txomnyem, lawv kev ntseeg yau thiab ua xyem xyav lawm. Ua xyem xyav tsuas kis txog lub neej sab ntsujplig. Tus Tswv Yexus tabtom qhia kom thwjtim ua taus siab ntev nyiaj thaum ntsib teebmeem. Peb tsis paub xyov cov thwjtim ntiab dab ntev npaum li cas, tiamsis thaum Tswv Yexus nqis saum roob los, lawv twb swb thiab tso tseg tsis ntiab dab lawm. Cov thwjtim yuav tsum paub hais tias, lub hwjchim yog Vajtswv pub, yuav tsum vamkhom Vajtswv thiaj muaj zog txaus, thiaj loj hlob sab kev ntseeg thiab lub neej thiaj tawg paj txi txiv taus.
Zaj kawm no qhia rau peb cov ntseeg tiam no hais tias, peb yuav tsum zeem paub peb txoj kev ntseeg kom meej. Peb puas tabtom nyob lub tsamthawj uas “muaj kev ntseeg tsawg?” “tsis muaj kev ntseeg txaus”… txhais hais tias peb tsuas muaj kev ntseeg txaus dim txim xwb, peb yeej tsis kam fij taus tus kheej rau Vajtswv siv, thiab yuav ua tsis tau haujlwm dab tsi li. Vajtswv xav kom peb ntseeg Nws tib leeg xwb, txawm yog yuav nyob rau lub tsamthawj twg, tsis hais tshaib nqhis, muaj mob lossis raug tsimtxom, thaum muaj thiab pluag, thaum txomnyem thiab tau zoo los peb tsuas tso siab rau tus Tswv tib leeg. Yog ntsib tej uas hais saum no peb puas muaj kev ntseeg fij tau tus kheej rau Vajtswv? Tswv Yexus xav kom peb yim hnub yim muaj zog ntawm sab ntujplig thiab loj hlob hauv sab kev ntseeg. Zoo ib yam li tus tub sib tw, yuav tsum muaj zog los ntawm qhov uas nqa taus hnyav zuj zus, lossis xyaum khiav taus ncua kev deb zuj zus, tug ntseeg Tswv Yexus yuav tsum muaj zog rau sab ntsujplig thiab loj hlob rau sab kev ntseeg los ntawm tiv dhau kev sim siab hauv lub neej ntseeg. Thaum tiv dhau qhov kev sim siab yuav qhia tawm yus kev loj hlob ntawm sab ntsujplig thiab paub vamkhom tus Tswv heev dua qub.
Thov Vajtswv,
Tus Tswv, thov Koj pab kom nyuam yaus yim hnub yim muab siab rau ntseeg Koj thiab yim loj hlob ntxiv rau txojkev ntseeg, txawm yog nyuam yaus ntsib raug tej kev sim siab, txomnyem los nyuam yaus kev ua neej yeej loj hlob ntxiv. Nyuam yaus tuav Cawmseej Tswv Yexus lub npe thov, Amees.
Ib tsoom cov mloog uas hmov thiab tshua,
Peb yuav ua li cas thiaj muaj zog rau sab ntsujplig thiab loj hlob sab kev ntseeg?
Nyeem Vajluskub hauv peb lub xyoo: II Kevcai 4
Kênh Youtube BHKTHN:
