Blŭng a 9:8-17
“Thoi noh plĕnh chro gô tơ’bôh tơ hơmơ̆l Inh lăng tơ noh ‘blŏk âu boih tơdrong pơgơ̆p ling lang mă đơ̆ng Inh đei pơkă hăm dôm lu adrĕch mă đei tơdrong arih kơpal teh.” (Blŭng a 9:16)
Nơ̆r jet tơchĕng pơwao:
– Kră Yang ‘Bok Kei-Dei đei pơjing tơdrong pơgơ̆p kiơ hăm lăm teh đak?
– Kră Yang pơjing plĕnh chro wă pơm kiơ?
– Rim wơ̆t ngoi lăng plĕnh chro, đei tơ’blŏk kơ lu bơ̆n thoi yơ?
Yua kơ tơdrong kơnê̆ păng răm ‘băm dêh lăm teh đak, Kră Yang ‘Bok Kei-Dei yua đak lip wă pơrăm đĭ-đăng tôm tơdrong tơmam, mă-lei Sư bơwei tơdrong arih hnam dơnŏ ‘bok Nôê păng lu sem dơrong sư mă đei mơ̆t lăm duk. Jơ ‘năr kơplah lĕch đơ̆ng duk ‘noh wă tơdra jơngơ̆l tơm blŭng a pơih ‘nao lăm teh đak âu. Păng ‘nâu kư̆m jơ̆ Kră Yang pơjing tơdrong pơgơ̆p Sư: “Thoi noh Inh pơjing tơdrong pơgơ̆p hăm lu iĕm păng đĭ-đăng lu kon sem, ưh pă đei layơ đak wă lơ̆p pơlôch dơ̆ng păng kư̆m pă đei khan wă lơ̆p pơrăm teh.” (trong 11). ‘Nâu bơih tơdrong pơgơ̆p hiôk hian Kră Yang hăm lăm teh đak, Sư jơ̆ Kră Yang ăn tơdrong arih, wei-lăng păng bơwei tơdrong arih. Tơpă, mă khan lăm teh đak oei đei đak lơ̆p kial hơbŭt tơâu tơto, mă-lei ưh pă đei layơ khan đak lơ̆p wă pơrăm đĭ dêh char thoi đak lơ̆p chăl ‘bok Nôê.
Wă kơ tơgŭm tơdrong pơgơ̆p âu jing hơđăl rơđah, ‘bônh kơ lăng ‘bôh păng ‘bônh kơ ‘blŏk, Kră Yang ăn lê̆ minh tơdrong tơdra: “Inh ăn plĕnh chro tơ hơmơ̆l wă pơm tơdra pơgơ̆p Inh hăm teh” (trong 13 ). Kră Yang khan kơplah ngơk lăng tơ plĕnh chro, Sư gô tơ’blŏk tơdrong pơgơ̆p hiôk hian mă Sư đei pơjing (trong 14-16). Tơpă Kră Yang ‘Bok Kei-Dei ưh kơ layơ hiơt. Sư bơih ‘Bok mă tơnăp tơpăt, ling-lang pơm keh dôm tơdrong đêl đei pơkă. Tơdrong mă Kră Yang đei pơjing plĕnh chro wă ăn kơ kon bơngai ‘blŏk khan Kră Yang ‘blŏk. Kon bơngai kăl kơ ‘blŏk kơ Kră Yang đei bơwei tơdrong arih ăn kơ lu sư păng ăn kơ đĭ-đăng teh đak âu.
Đơ̆ng rŏng kơ đei hơmơ̆l ‘mi, lăng ‘bôh plĕnh chro. Kơplah đak lip tih ‘noh jơ̆ tơmam tơblah wă pơrăm lăm teh đak, na plĕnh chro ‘noh tơdrong tơdra păng ‘noh jơ̆ tơdrong pơsĭt kơ teh đak gơh jing hiôk hian. Mă khan kon bơngai oei pơm yoch păng pơm yoch rai kơnê̆ hloh, mă-lei yua tơdrong tơpăt păng tơdrong ‘mêm mơnat, Kră Yang oei bơwei kon bơngai. Ưh kơsĭ Sư ưh pă hil phak đĕch ôh, mă Sư oei wă chu pŭ iŏk phak tang yoch kon bơngai. ‘Noh bơih tơdrong mă Kră Yang Yêsu đei pơm tơ ‘long pơglang. Tơdah plĕnh chro ‘noh tơdrong tơdra kơ Kră Yang huay pă hil phak, na ‘long pơglang noh tơdra kơ Kră Yang Yêsu pŭ tang tơdrong wă phak kon bơngai. Mă khan lu bơ̆n oei lăm dêh char Viêt Nam dah mă anih tơyơ lăm teh đak âu, kơplah lăng ‘bôh plĕnh chro tơ hơmơ̆l tơplĕnh, lu bơ̆n đei ‘blŏk Kră Yang ‘Bok Kei-Dei Sư tơpăt, ‘mêm mơnat păng ling-lang ‘blŏk kơ lu bơ̆n.
Ơ Kră Yang, inh bơnê kơkuh kơ Ih yua kơ tơdrong pơgơ̆p pơkă hiôk hian đơ̆ng Ih ăn kơ lăm teh đak, păng yua Ih ling-lang jơ̆ Kră Yang tơpăt,bơwei nơ̆r Ih pơkă. Mă khan kon bơngai pơm yoch, Ih oei mơnat. Apinh Ih tơgŭm inh arih mă trŏ kơ tơdrong mơnat tih păng tơdrong ‘mêm Ih mă ưh kơbăt dang yơ. Apinh tơ’blŏk kơ inh ‘blŏk păng pơkeh dôm nơ̆r pơkă hăm Ih. Yua anăn Kră Yang Yêsu Krist, Amen.
Kră Yang ling-lang tơpăt păng bơwei tơdrong Sư pơgơ̆p pơkă, na lu bơ̆n thoi yơ? Lu bơ̆n hăm ‘blŏk dôm tơdrong kiơ mă đei pơkă hăm Kră Yang?
Đŏk Sơ̆p Hla ar ‘Bok Kei-Dei lăm pêng sơnăm: Mika 6
Kênh Youtube BHKTHN:
