Klei Aê Diê Blŭ: Klei Mphŭn Dơ̆ng 9:8-17
Êlan kliăng:“Tơdah kêñ krô dôk hlăm knam, Kâo srăng dlăng kơ ñu čiăng kơ Kâo hdơr klei bi mguôp hlŏng lar ngă leh mơ̆ng Aê Diê hŏng jih jang mnơ̆ng hdĭp ti rŏng lăn ala.” (Klei Mphŭn Dơ̆ng 9:16).
Klei êmuh ksiêm mĭn: Ya klei bi mguôp Aê Diê ngă hŏng lăn ala? Aê Diê dưm kêñ krô ya pioh ngă? Grăp blư̆ kngưr dlăng kơ kêñ krô, si klei lŏ bi hdơr kơ drei?
Kyuadah klei soh leh anăn klei măk ƀai mnuih kmưn jing prŏng ti lăn ala, Aê Diê yua leh êa lip prŏng čiăng bi rai hĕ jih jang mnơ̆ng hdĭp, ƀiădah Ñu djă pioh klei hdĭp kơ gŏ sang Y-Nôê leh anăn jih jang mnơ̆ng hdĭp gơ̆ bi mŭt leh hlăm kŭmpăn. Mmông kbiă mơ̆ng kŭmpăn jing gru bi knăl kơ sa klei mphŭn dơ̆ng mrâo kơ lăn ala. Leh anăn anei mơh jing mmông Aê Diê ngă klei Ñu bi mguôp:
“Kâo ngă klei Kâo bi mguôp hŏng diih; Kâo amâo srăng lŏ bi rai jih jang mnơ̆ng hdĭp hŏng êa lip ôh; kăn srăng lŏ mâo rei êa lip bi rai lăn ala” (êlan 11). Anei jing klei bi mguôp êđăp ênang Aê Diê hŏng lăn ala, čiăng lač Ñu jing Pô brei klei hdĭp, Pô kiă kriê leh anăn djă pioh klei hdĭp. Sĭt nik, ti lăn ala lu anôk ăt mâo klei êa lip, ƀiădah amâo tuôm mâo ôh klei êa lip bi rai jih jang lăn ala msĕ si êa lip ênuk Y-Nôê.
Čiăng kơ klei bi mguôp anei jing klă, ênưih ƀuh, leh anăn ênưih hdơr, Aê Diê dưm sa klei bi knăl: “Kâo dưm kêñ krô Kâo hlăm knam; ñu srăng jing mnơ̆ng bi knăl klei bi mguôp Kâo hŏng lăn ala” (êlan 13). Aê Diê lač tơdah dlăng kơ kêñ krô, Ñu srăng hdơr kơ klei bi mguôp êđăp ênang Ñu ngă leh (êlan 14-16). Boh sĭt gơ̆ Aê Diê amâo tuôm wơr bĭt ôh. Ñu jing Pô sĭt suôr, bi sĭt nanao klei Ñu ƀuăn leh. Bruă Aê Diê dưm kêñ krô jing čiăng kơ mnuih hdơr kơ Aê Diê hdơr nanao. Brei mnuih hdơr Aê Diê yơh jing Pô kiă kriê klei hdĭp digơ̆ pô leh anăn kơ jih lăn ala.
Grăp blư̆ leh không hjan, khăng mâo nanao kêñ krô. Tơdah klei êa lip prŏng jing mnơ̆ng pioh bi rai lăn ala, snăn kêñ krô jing mnơ̆ng bi knăl leh anăn klei rơ̆ng kjăp kơ lăn ala srăng mâo klei êđăp ênang. Wăt tơdah mnuih ăt ngă soh, leh anăn tơl klei soh ƀrư̆ hruê ƀrư̆ đĭ hriê kơ lu, ƀiădah kyua klei sĭt suôr leh anăn klei pap, Aê Diê ăt kiă kriê mnuih. Amâo djŏ Ñu knŏng mdei bi kmhal ôh, ƀiădah wăt Ñu pô čŏng čiăng tŭ hrô brei klei bi kmhal kơ mnuih mơh. Anăn jing jih jang klei Khua Yang Yêsu ngă leh ti kyâo bi kal. Tơdah kêñ krô jing klei bi knăl kơ Aê Diê lŏ hrui wĭt klei ngêñ, snăn kyâo bi kal jing klei bi knăl Khua Yang Yêsu klam hrô klei ngêñ kơ mnuih. Wăt tơdah drei dôk hdĭp ti Viêt Nam amâodah ti sa bĭt anôk mkăn ti lăn ala anei, tơdah buh kêñ krô bi êdah ti adiê, drei hdơr mtam kơ Aê Diê jing Pô sĭt suôr, bŏ hŏng klei khăp, leh anăn hdơr nanao kơ drei.
Aê Diê jing sĭt suôr leh anăn djă pioh nanao klei Ñu bi mguôp, bi drei si ngă? Drei hdơr mơ̆ kơ ya klei drei ƀuăn leh hŏng Khua Yang?
Wah lač: Ơ Khua Yang, kâo mpŭ mni kơ Ih kyua klei bi mguôp êđăp ênang Ih ngă leh hŏng lăn ala, leh anăn kyuadah Ih jing Khua Yang Pô sĭt suôr, bi sĭt nanao klei ƀuăn, wăt tơdah mnuih ngă soh, Khua Yang ăt pap. Đru kâo hdĭp năng hŏng klei pap leh anăn klei khăp yuôm bhăn Ih. Bi hdơr kơ kâo hdơr leh anăn bi sĭt jih jang klei kâo ƀuăn leh hŏng Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Mika 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
