Klei Aê Diê Blŭ: I Bruă Mtao 12:26-33
Êlan kliăng: “Klei huĭ kơ mnuih jing kđông ƀêč, ƀiădah hlei pô knang kơ Yêhôwa mâo klei hơĭt.” (Klei Bi Hriêng 29:25)
Klei êmuh ksiêm mĭn: Ya mta phŭn knhal atăt mtao Y-Jêrôbôam truh kơ klei čuăn ngă klei soh (dlăng thiăm I Bruă Mtao 11:37-39)? Ya klei brei drei ngă tơdah dôk ti anăp klei mplư leh anăn klei dleh dlan hlăm klei hdĭp?
Mtao Y-Jêrôbôam kčưm dơ̆ng bruă ñu hŏng klei Aê Diê ƀuăn srăng brei kơ ñu “mdơ̆ng kơ ih sa boh sang kjăp, msĕ si Kâo mdơ̆ng leh kơ Y-Đawit, leh anăn Kâo srăng brei phung Israel kơ ih.”. Ƀiădah lĕ, klei ƀuăn anei mbĭt hŏng klei čoh čuăn: “Tơdah ih mđing knga kơ jih klei Kâo mtă kơ ih, leh anăn êbat hlăm êlan Kâo, leh anăn ngă ya klei jing kpă ti anăp ală Kâo êjai djă pioh klei bhiăn Kâo leh anăn klei Kâo mtă, msĕ si Y-Đawit dĭng buăl Kâo ngă leh, Kâo srăng dôk mbĭt hŏng ih” (I Bruă Mtao 11:37-39). Hơưi êdi yơh, wăt tơdah mă tŭ klei ƀuăn mơ̆ng Aê Diê ƀiădah mtao Y-Jêrôbôam ăt čiăng bi kjăp jhưng mtao ñu tui si hdră êlan ñu pô. Mtao wơr bĭt hĕ sa klei yuôm, klei ñu dưi dôk ti jhưng mtao jing kyua mơ̆ng klei soh mtao Y-Rôbôam yơh. Leh anăn knŏng hjăn kyua sa mta klei yơh ñu dưi dôk kjăp ti jhưng anăn jing weh đuĕ mơ̆ng êlan soh mtao Y-Rôbôam, mblang jing khut khat gưt asăp kơ Aê Diê. Hrô kơ uêñ mĭn ngă bi ênŭm klei Aê Diê čoh čuăn, bi mtao Y-Jêrôbôam lŏ ngă klei mluk mkra êlan hdră hjăn ñu pô leh anăn ngă klei bi kdơ̆ng hŏng klei Aê Diê mtă. Kyua mơ̆ng klei amâo đăo anăn yơh mtao kčưm dơ̆ng ngă lu mta klei soh tui tluôn.
Klei kƀah klei đăo kơ klei Aê Diê ƀuăn ngă kơ mtao Y-Jêrôbôam luč klei êđăp ênang leh anăn rŭng răng kơ klei tŭ dưn kơ ñu pô, mơ̆ng klei anăn yơh atăt truh kơ klei čuăn ngă soh čhuai (êlan 26-30). Brei drei dôk răng, kyua jih jang klei bi hmăi jhat truh kơ klei drei đăo kơ klei sĭt suôr leh anăn klei jăk Aê Diê, khăng kyua mơ̆ng klei truh jhat leh anăn mmăt, amâodah kyua klei bi hmăi mơ̆ng pô mkăn.
Phŭn knhal tui hlue anăn jing mtao Y-Jêrôbôam amâo tui duah klei Aê Diê atăt gai ôh. Êlan 28 čih: “Snăn mtao êmuh klei kčĕ”, hlăm klei blŭ phŭn mblang jing: “Snăn, mtao êmuh hjăn ñu pô”. Năng ai mtao êmuh mơh sa čô mkăn amâodah bi mĭn mă hjăn păn ñu pô leh anăn čuăn ruah ngă (êlan 33), ƀiădah sĭt nik ñu amâo wah lač čiăng tui duah si klei Aê Diê čiăng ôh. Akâo Khua Yang brei drei tui duah klei Ñu čiăng leh anăn knang kơ Ñu nanao (Klei Bi Hriêng 3:5-6; 14:12).
Leh anăn lŏ sa mâo phŭn knhal mkăn mơh, anăn jing mtao Y-Jêrôbôam mdưm ñu pô leh anăn klei tŭ dưn kơ ñu pô jing phŭn. “Y-Jêrôbôam lač hlăm ai tiê ñu, “Ară anei ƀuôn ala mtao srăng lŏ wĭt kơ sang Y-Đawit.” (êlan 26), klei mtao Y-Jêrôbôam uêñ mĭn jing jhưng mtao, jing klei tŭ dưn kơ mtao, amâo djŏ kơ Aê Diê ôh.
Khua ƀĭng kna Y-Pôl iêô mthưr: “Snăn thâodah diih ƀơ̆ng huă mnăm, amâodah ya klei diih ngă, ngă bĕ jih čiăng bi guh kơang kơ Aê Diê.” (I Kôrantô 10:31). Blŭ mdê, klei kñăm kơ klei hdĭp drei jing pioh bi guh kơang kơ Aê Diê, amâo djŏ guh kơang kơ drei pô ôh, leh anăn drei ênưih snăk ngă soh hŏng Khua Yang tơdah yap yuôm klei guh kơang kơ drei pô.
Mơ̆ng anôk drei khăng tui duah klei atăt gai tơdah tuôm hŏng klei dleh dlan, amâodah tơdah čuăn ngă ya mta klei?
Wah lač: Ơ Khua Yang, akâo Ih đru kâo amâo ngă klei mluk mgu čiăng mkra hdră klei hdĭp kâo hjăn kâo pô ƀiădah amâo knang ôh kơ klei thâo mĭn leh anăn klei jăk Khua Yang. Brei kâo dưm Khua Yang êlâo hĭn nanao kơ djăp mta klei kâo čuăn ngă hlăm klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
