I Lu Pơtao 12:26-33
“Tơdrong hli kơ kon bơngai thoi hơđong hơ’năk; Mă-lei bơngai bu đei gơnang kơ Kră Yang oei hơđơ̆ng” (Tơdrong Pơđơ̆k 29:25).
Nơ̆r jet tơchĕng pơwao:
– Lu tu tơm ayơ ba truh kơ pơtao Jêrôbôam pơm glăi (lăng thim I Lu pơtao 11:37-39).
– Lu bơ̆n kăl kơ pơm kiơ kơplah dơ̆ng ‘bơ̆t anăp đei tơdrong pơhlŭ pơlung păng anat anot lăm tơdrong arih?
Pơtao Jrôbôam pơtơm blŭng a lăm tơdrong jang sư hăm nơ̆r Kră Yang ‘Bok Kei-Dei pơkă ăn ‘noh “pơjing ăn kơ ih minh anih hnam kơjăp, thoi Inh đei ăn kơ Đawit, păng Inh ăn Isơrael kơ ih”. Mă khan lei ră, nơ̆r pơkă âu kăl kơ năm hơdai hăm tơdrong ăp kơ pơm hloi “Tơdah ih chu kiơ̆ nơ̆r Inh pơkă, năm lăm trong Inh, pơm ‘lơ̆ng ‘bơ̆t anăp Inh, hăm wei răk khôi juăt Inh păng nơ̆r Inh tơtă thoi Đawit đĭch đam Inh đei pơm lei Inh gô oei hơdai ih. Inh gô pơm kơ adrĕch hnam ih kơjăp thoi Inh đei pơm kơ Đawit păng Inh gô ăn Isơrael kơ ih.” (I Lu Pơtao 11:37-39). Hmach dêh tơpă, mă khan đei iŏk nơ̆r pơkă đơ̆ng Kră Yang ‘Bok Kei-Dei mă-le pơtao Jêrôbôam oei ‘maih pơjing tơdrong pơgơ̆r anih pơtao hăm dôm tơdrong chă đon kiơ̆ kơdih. Pơtao tơhiong lê̆ minh tơdrong kăl. Tu tơm sư pơm pơtao noh yua kơ tơdrong yoch Rôbôam. Păng lăp minh tdrong đĕch sư oei kơjăp lăm anih pơtao mă sư pơgơ̆r noh sư wer weh đơ̆ng tơdrong kơnê̆ mă Potao Jêrôbôam đei pơm, wă khan athei chu yom Kră Yang ‘Bok Kei-Dei mă tơpă. Tơplih kơ jơhngơ̆m đon tơchĕng pơm dôm tơdrong nơ̆r ‘Bok Kei-Dei pơkă lei na pơtao Jêrôbôam kơ hlôh nŏng chă đon kiơ̆ kơdih păng blah plơ̆ Khôi Juăt Kră Yang. Tơm sư lĕch đơ̆ng ưh kơ wă lui đơ̆ng blŭng a na oei pơm yoch glăi pơtrơp dơ̆ng tơ anăp.
Tơdrong ưh kơ đei đon lui kơ nơ̆r Kră Yang ‘Bok Kei-Dei pơkă pơm kơ pơtao Jêrôbôam hiong tơdrong hiôk hơđơ̆ng păng hiơ̆k bơngơ̆t kơ tơdrong jang sư đei pơm, đơ̆ng tơdrong ‘noh ba truh tơdrong pơ glăi (trong 26-30). Lu bơ̆n athei kơchăng yua kơ dôm tơdrong noh ‘bơm truh tơdrong đon lui lu bơ̆n tơ tơdrong tơpăt păng tơdrong ‘lơng đơ̆ng Kră Yang ‘Bok Kei-Dei ngăl đei kơplah đei tơdrong anat anot păng măng mu, dah yua đơ̆ng bơngai pơm.
Tơm sư lăm tơdrong pơtrơp dơ̆ng ‘noh pơtao Jêrôbôam ưh kơ chơchă wă kơ đơ̆ng Kră Yang ‘Bok Kei-Dei bơtho tơ’bôh kơ sư. Trong 28 chih: “pơtao pơđâu athei đe pơm” lăm nơ̆r tơm wă khan: “Thoi noh, wă kơdih bơtho kơdih”. Kư̆m đei mơ̆n pơtao đei nơ̆r jet minh ‘bar ‘nu bơngai dah sư tơchĕng kơdih păng rơih iŏk (trong 33), mă-lei tơpă sư ưh kơ đei krao khan wă kơ chơchă kiơ̆ thoi Kră Yang wă. Apinh Kră Yang tơgŭm lu bơ̆n ling-lang chơchă kiơ̆ thoi Kră Yang wă lăp đon păng lui gơnang kơ Sư (Tơdrong Pơđơ̆k 3:5-6;14:12).
Păng minh tơdrong tơm sư dơ̆ng’noh pơtao Jêrôbôam dan sư kơdih păng tơdrong chă lơi yua kơdih pơm tơm Jêrôbôam tơchĕng lăm đon sư: Dêh char pơtao âu gô brŏk hơlơ̆k tơ adrĕch Đawit (trong 26), tơdrong mă pơtao Jêrôbôam tơchĕng tơtăm ‘noh anih pơtao, ‘noh tơdrong lơi yua kơ pơtao ưh kơ trŏ kơ Kră Yang ‘Bok Kei-Dei ôh.
‘Bok Pôl sư krao pơtơm: “Mă tôm tơdrong bơ̆n sŏng sa nhă đak, mă tôm tơdrong bơ̆n jang pơm tơdrong kiơ, bơ̆n athei băt pơư pơang anăn ‘Bok Kei-Dei lăm tôm tơdrong ‘noh”. (I Kôrintô 10:31). Pơma pha ‘biơ̆, tơdrong kơnhăm lăm chăl arih lu bơ̆n wă ư-ang anăn ‘Bok Kei-Dei, ưh kơsĭ wă ư-ang kơ bơ̆n kơdih, păng lu bơ̆n ‘bônh kơ pơm yoch hăm Kră Yang bơ̆n ngăl lăng kơdih kâu ‘noh kăl.
Ơ Kră Yang, apinh tơgŭm inh wă huay kơ kơtul bơlŭk lăm tơdrong dan pơjing kiơ̆ kơdih lăm chăl arih ưh kơ băt gơnang kơ tơdrong gơh hơgei păng tơdrong ‘lơ̆ng đơ̆ng Ih. Apinh ăn kơ inh dan Ih lăm tôm tơdrong kiơ wă pơm, jang. Krao khan yua anăn Kră Yang Yêsu Krist, Amen.
Lu bơ̆n hăm ling-lang chơchă tơdrong chông anhăk đơ̆ng tơm hơyơ kơplah tơ’bơ̆p tơdrong anat not dah kơplah wă pơm tơdrongkiơ noh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 28
Kênh Youtube BHKTHN:
https://www.youtube.com/c/bhkthn
