1 Vajntxwv 12:26-33
Nqe cim:
“Kev ntshai luag ces yog lub vojhlua cuab tos koj kev, tiamsis yog koj cia siab rau tus TSWV mas koj yuav kaj siab lug” (Pajlug 29:25)
Lus nug rau sawvdaws xav:
– Tej vimchiv twg ua rau vajntxwv Yelaunpau-as txiav txim siab yuam kev? (saib ntxiv 1 Vajntxwv 11:37-39)?
– Peb cheem tsum ua dabtsi thaum uas sawv rau ntawm txoj dag ntxias thiab kev nyuaj hauv lub neej?
Vajntxwv Yelaunpau-as pib nws lub luag haujlwm nrog rau Vajtswv kev coglus hais tias “Kuv yuav tsa koj ua vajntxwv kav cov Yixalayees thiab yuav cia koj cov xeebntxwv ua vajntxwv hloov koj chaw ib yam li kuv pub rau Daviv ntag”. Tiamsis lolus cogtseg no yuav tau coj raws: “Yog koj mloog kuv tej lus txhua lo, coj koj lub neej raws li kuv tej kevcai, thiab ua raws li kuv tej lus samhwm uas kuv muab rau koj ib yam li kuv tus tubtxib Daviv tau ua los lawm, kuv yuav nrog nraim koj mus ibtxhis” (1 Vajntxwv 11:37-39). Khuvxim heev, txawm Yelaunpau-as tau txais Vajtswv kev coglus tseg tiamsis nws tseem xav txhawb nqa nws lub meejmom vajntxwv los ntawm nws kev npaj tseg. Yelaunpau-as hnov qab ib qho tseemceeb, tos nws tau ua vajntxwv los vim Lehaunpau-as kev txhaum. Thiab yam tshwjxeeb uas pab tau Yelaunpau-as sawv ruaj khov rau nws lub zwmtxwv yog tsis taug Lehaunpau-as txoj qub kev, txhais hais tias yuav tau mloog Vajtswv lus xwb. Twb tsimnyog Yelaunpau-as sau siab hlo ua raws Vajtswv kev coglus, tiamsis nws ho ruam npaj kev tawmtsam Vajtswv kevcai. Twb yog qhov vajntxwv tsis ntseeg ntawd, thiaj pib ua ntau yam yuam kev ntxiv.
Qhov uas tsis ntseeg siab tas rau Vajtswv kev coglus tseg thiaj ua rau Yelaunpau-as poob kev kaj siab thiab txhawj txog tej uas nws muaj, vim qhov ntawd thiaj txiav txim siab yuamkev (nqe 26-30). Peb yuav tsum ua tib zoo vim tej yam uas yuav cuam tshuam txog peb kev ntseeg ntawm Vajtswv txoj kev ncajncees, ntawd pheej yog txoj kev txomnyem, kev tsaus ntuj lossis cuam tshuam ntawm lwm tus los.
Vimchiv txuas ntxiv yog Yelaunpa-as tsis nrhiav Vajtswv kev coj. Nqe 28 sau: Vajntxwv “ntaus tswvyim” lub ntsiab hauv lus Henplais yog “vajntxwv cim civ rov txhawb nws”. Tej zaum nws kuj nug lwm tus lossis cim civ xav tseg thiab xaiv (nqe 33), tiamsis yeej paub tseeb lawm hais tias nws tsis thov Vajtswv thiab nrhiav raws Vajtswv siab nyiam. Thov Vajtswv pab peb nrhiav raws Nws siab nyiam thiab vamkhom Nws (Pajlug 3:5-6; 14:12).
Thiab ib qhov vimchiv ntxiv yog Yelaunpau-as muab nws thiab tej uas nws muaj saib tseemceeb dua lawm. “Yelaunpau‑as xav hauv lub siab tias, “Ntshai tsam lub tebchaws yuav tig mus zwm rau Davi caj ces” (nqe 26), qhov uas vajntxwv Yelaunpau-as xav tau yog lub zwmtxwv vajntxwv thiab tej uas nws ntshaw xwb yeej tsis yog ntshaw Vajtswv.
Timthawj Paulus nqua hu hais tias: “Yog li ntawd, nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag” (1 Kauleethaus 10:31). Hais rau lwm seem, homphiaj ntawm peb lub neej yog ua rau Vajtswv tau ntsejmuag, tsis yog ua rau yus tau ntsejmuag, thiab peb yoojyim ua txhaum rau Vajtswv thaum uas peb saib peb lub koob meej tseem ceeb heev dua.
Thov Vajtswv,
Vajtswv, thov pab nyuam yaus tsis txhob ua neej ruam cim civ npaj tseg rau nyuam yaus lub neej. Tiamsis thov pab nyuam yaus paub vamkhom Koj txoj kev txawj ntse, saib Koj loj tshaj txhua yam uas nyuam yaus yuav txiav txim siab ua hauv nyuam yaus lub neej. Nyuam yaus tuav Tswv Yexus Khetos lub npe thov, Amees.
Thaum ntsib teebmeem lossis yuav txiav txim siab ua ib yam dabtsi twg peb yuav nrhiav kev qhia kev coj qhov twg?
Nyeem Vajluskub hauv peb lub xyoos: Tes Haujlwm 28
Kênh Youtube BHKTHN:
