Jô̆ Bơngai 6:24-27
“Lu sư athei dan ‘măn anăn Inh tơ kơpal lu kon pơlei adrĕch Isơrael thoi noh, lei na Inh gô ăn tơdrong pŭn hiôk kơ lu sư.” (Jô̆ Bơngai 6:27)
Nơ̆r jet tơchĕng pơwao:
- Nơ̆r Kră Yang athei sơkat pŭn hiôk kơ kon pơlei Israel thoi yơ?
- Lăm sơnăm ‘nao âu lu bơ̆n đei sơkat băl tơdrong kiơ?
- Lu bơ̆n ‘maih iŏk dôm tơdrong sơkat pŭn hiôk đơ̆ng bơngai jih ‘ma kơ lu bơ̆n thoi yơ?
Nơ̆r Kră Yang khan Môis athei lu ‘bok soi athei “sơkat pŭn hiôk” ăn kơ lu bơngai Israel. Sơkat pŭn hiôk noh jơ̆ krao apinh pŭn hiôk đơ̆ng Kră Yang ba ăn pŭn hiôk. ‘Bok soi ưh kơ tuh pŭn hiôk yua kơ jơ̆ minh Kră Yang ‘Bok Kei-Dei đĕch gơh tuh pŭn hiôk. ‘Bă kŭm dai sơkat pŭn hiôk kơ lu kon hơ’lơ̆p, lu bơngai kră kư̆m đei sơkat pŭn hiôk kơ lu adrĕch adrŭng sư kơ dih. ‘Nâu jơ̆ tơ’bôh kơ tơdrong pơm kiơ̆ tơdrong lui lu bơngai Israel dôm lu tơdrong pŭn hiôk noh jơ̆ lĕch đơ̆ng Kră Yang ‘Bok Kei-Dei.
Nơ̆r Kră Yang bơtho kơ A-rôn đơ̆ng sơ̆ âu nhen thoi tơm ăn kơ tơdrong sơkat pŭn hiôk truh đơ̆ng rŏng. Pơih nơ̆r sơkat pŭn hiôk noh jơ̆ krao apinh ling lang kơ oei lăm tơdrong pŭn hiôk Kră Yang, “Apơi Kră Yang ăn tơdrong pŭn hiôk kơ iĕm păng tơgŭm wei-lăng iĕm.” (trong 24). Nơ̆r “Pŭn hiôk” wă khan dôm tơdrong hiôk ‘lơ̆ng đei song ăn, noh jơ̆ tơdrong đơ̆ng Kră Yang ‘Bok Kei-Dei, wă khan Kră Yang wă maih ling lang tuh ăn pŭn hiôk tih tin păng ling lang ăn kơ lu kon Sư. ‘Nâu jơ̆ tơdrong tơ’blŏk ăn kơ lu kon Kră Yang kăl kơ đei tơdrong tơ’bưh hăm Kră Yang ling lang wă kơ ling lang đei tơdrong pŭn hiôk. Nơ̆r “Kră Yang lăng ba” wă khan sư nhen thoi gak bơ̆n ling lang dah bơwei, ‘nâu tơdrong tơblŏk ăn kơ bơ̆n kăl kơđei tơdrong tơ’bưh hăm Kră Yang wă kơ đei ling lang băt mơn kơ tơdrong “Kră Yang lăng ba” đơ̆ng Sư. Nơ̆r sơkat pŭn hiôk dơ̆ng noh jơ̆ “Apinh Kră Yang pơchrang muh măt sư kơ iĕm păng mơnat kơ iĕm” (trong 26).
Nơ̆r “Kră Yang lăng hơlen” wă khan Sư tơwih muh măt Sư gah bơ̆n, ‘nâu jơ̆ nơ̆r pơchŭt kơ lu kon Kră Yang wă kơ Sư đei jơhngơ̆m chơ̆n hơđơ̆ng, ưh kơ đei ngĭl ngŭl mă dôm tơdrong truh thoi yơ yua kơ băt kơ Kră Yang oei ling lang lăng bơ̆n. Kră Yang pơkă hăm lu kon pơlei pơla sư tơdah lu sư ư-ang kơ Anăn Kră Yang lei pŭn hiôk đơ̆ng Kră Yang gô ưh kơ đei la yơ tôch lăm chăl arih bơ̆n (trong 27).
Năr ‘nâu năr mă mônh lăm sơnăm ‘nao plơ̆ng, lu bơ̆n đei chang sơmĕng đei nơ̆r sơkat kơ bơ̆n tơdrong kiơ? Păng bơ̆n đei sơkat dih băl lăm tơdrong kiơ lăm Hnam Akŭm? kiơ̆ kơ tơdrong juăt Viêt Nam lu bơ̆n đei sơkat dih băl lăm sơnăm ‘nao păng gô đei tơdrong pŭn hiôk, mơdrŏng, arih sot, pran jăng păng tơdrong hơđơ̆ng hiôk. Lăm tơdrong lui kơ lu bơngai mă đei Kră Yang, lu bơ̆n kăl kơ đei sơkat ăn kơ ‘nhŏng mŏ oh bơ̆n wă kơ ling lang kơ đei “pŭn hiôk” đơ̆ng Kră Yang, pơchŭt ăn kơ ‘nhŏng oh bơ̆n ling lang kơ dơ̆ng kơjăp lăm Kră Yang păng arih ling lang kơ pơ-ư pơ-ang anăn Kră Yang wă kơ đei pŭn hiôk păng tơdrong mơnat đơ̆ng Kră Yang gô tuh ăn ‘bĕnh blai lăm chăl arih bơ̆n. Kơplah arih lăm tơdrong “Kră Yang lăng ba” đơ̆ng Sư, lu bơ̆n đei băt mơn kơ tơdrong hơđơ̆ng hiôk tơpă đơ̆ng Kră Yang ăn.
Ơ Kră Yang kơ plĕnh teh Inh bơnê kơ Ih ăn sơnăm ‘nao ăn kơ Inh. Năr âu năr mă mônh lăm sơnăm ‘nao, inh apinh Ih ăn kơ inh đei nơ̆r sơkat lăm tơdrong lui ba ăn kơ lu ‘nhŏng mŏ oh lăm sơnăm ‘nao âu wă pơchŭt dih băl đĭ jơhngơ̆m arih yua kơ Kră Yang. Yua anăn Kră Yang Yêsu Krist. Amen
Lu bơ̆n ba ăn nơ̆r sơkat lăm sơnăm ‘nao ăn kơ bơngai bu lăm năr âu?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: I Kôrintô 6.
Kênh Youtube BHKTHN:
