Klei Aê Diê Blŭ: Klei Yap 6:24-27
Êlan kliăng: “Msĕ snăn diñu srăng dưm anăn Kâo ti dlông phung ƀuôn sang Israel, leh anăn Kâo srăng brei klei jăk jĭn kơ diñu” (Klei Yap 6:27)
Klei êmuh ksiêm mĭn: Klei Aê Diê Blŭ mtă si srăng hơêč hmưi kơ phung Israel? Hlăm akŏ thŭn bhang mrâo ya klei drei srăng bi hơêč hmưi hdơ̆ng drei? Si klei hơêč hmưi drei čiăng mă tŭ mơ̆ng phung riêng gah?
Aê Diê lač kơ Y-Môis brei phung khua ngă yang “hơêč hmưi” kơ phung Israel. Hơêč hmưi jing akâo kơ Aê Diê brei klei jăk jĭn. Phung khua ngă yang amâo dưi brei klei jăk jĭn ôh, kyuadah Aê Diê yơh jing Pô dưi brei klei jăk jĭn. Phung ama khăng hơêč hmưi kơ phung anak diñu, phung khua mduôn khăng hơêč hmưi kơ phung găp djuê diñu. Anei jing bruă ngă klei đăo kyuadah phung Yuđa đăo jih jang klei jăk jĭn kbiă hriê mơ̆ng Aê Diê sơăi.
Klei blŭ hơêč hmưi Aê Diê bi hriăm leh Y-Arôn mphŭn dô jing jar klei hơêč hmưi kơ êdei. Pŏk kŏ kơ klei hơêč hmưi anei jing klei akâo brei dưi dôk nanao hlăm klei jăk jĭn Aê Diê, “Akâo kơ Yêhôwa brei klei jăk jĭn kơ ih leh anăn kiă kriê ih” (êlan 24). Boh blŭ “brei klei jăk jĭn” čiăng lač kơ klei ngă jăk, anăn jing klei Aê Diê pô čŏng čiăng ngă, čiăng lač Aê Diê čiăng brei nanao klei jăk jĭn êbeh dlai kơ phung anak Ñu. Anei jing klei mtă brei phung ƀuôn sang Aê Diê djă pioh kjăp klei bi mguôp hŏng Aê Diê čiăng mâo klei hơêč hmưi nanao. Boh blŭ “kiă kriê” čiăng lač kơ klei răng kriê amâodah răng mgang, anei jing klei mtă brei phung ƀuôn sang Aê Diê dôk sĭt suôr hlăm klei bi mguôp hŏng Aê Diê čiăng dưi mâo klei Ñu “kiă kriê”. Klei hơêč hmưi lŏ čuê jing “Akâo kơ Yêhôwa mtrang ƀô̆ mta Ñu kơ ih, leh anăn pap kơ ih!” (êlan 25), jing klei bi mđĭ ai phung ƀuôn sang Aê Diê hdĭp bi mơak kơ Aê Diê nanao, leh anăn thâo kral nanao klei khăp, klei pap Aê Diê hlăm klei hdĭp digơ̆. Klei hơêč hmưi tal tlâo jing “Akâo kơ Yêhôwa kngưr dlăng kơ ih, leh anăn brei klei êđăp ênang kơ ih” (êlan 26), boh blŭ “kngưr dlăng” čiăng lač kơ klei wir ƀô̆ mta dlăng, anei jing klei bi mđĭ ai čiăng kơ phung ƀuôn sang Aê Diê mâo klei êđăp ênang nanao, dôk kjăp amâo mâo mgei ôh hlăm jih jang klei truh kyuadah thâo Aê Diê dlăng kơ digơ̆ nanao. Aê Diê ƀuăn kơ phung Israel tơdah digơ̆ mpŭ mni kơ Anăn Ñu, snăn klei jăk Ñu brei kơ digơ̆ amâo srăng hrŏ ôh (êlan 27).
Hruê anei jing Hruê Sa Têt, drei dôk bi hmăng ya klei arăng srăng hơêč hmưi kơ drei? Leh anăn ya klei drei srăng bi hơêč hmưi hdơ̆ng drei hlăm Phung Sang Aê Diê? Klei dhar kreh Viêt Nam drei khăng bi hơêč hmưi hlăm thŭn mrâo srăng mâo klei mbhă myun, klei mdrŏng sah, hdĭp jŏk, suaih pral leh anăn êđăp ênang. Hlăm klei đăo phung mâo Khua Yang, drei hơêč hmưi kơ phung ayŏng amai adei drei srăng mă tŭ klei jăk jĭn Aê Diê brei, mtrŭt phung ayŏng amai adei drei dôk kjăp hŏng Khua Yang nanao, dôk dơ̆ng ƀơ̆ng huă bi guh kơang kơ Anăn Ñu čiăng kơ klei jăk leh anăn klei pap Khua Yang tuh nanao êbeh dlai kơ klei hdĭp drei. Tơdah hdĭp hlăm klei Aê Diê kiă kriê kơh, drei dưi mă tŭ klei êđăp ênang sĭt Ñu brei.
Kơ hlei pô drei srăng mơĭt klei hơêč hmưi hruê anei?
Wah lač: Ơ Aê Diê Khua kơ lăn adiê, kâo lač jăk kơ Ih brei kơ kâo yan mnga. Hruê anei jing Hruê Sa Têt, akâo Khua Yang brei kâo mâo klei hơêč hmưi hŏng klei đăo hơêč hmưi kơ phung ayŏng amai adei kâo hlăm kŏ thŭn mrâo čiăng bi mđĭ ai digơ̆ hdĭp kơ Ih hŏng jih ai tiê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: I Kôrantô 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
