Klei Aê Diê Blŭ: I Y‑Samuel 2:12-17
Êlan kliăng: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn.” (Klei Bi Hriêng 22:6)
Klei êmuh ksiêm mĭn: Si mta klei soh jhat dua čô anak êkei Khua ngă yang Y‑Hêli ngă? Hlei jing pô tŭ bruă klam anei? Ya jing mta klei yuôm hĭn brei phung amĭ ama mtô lač kơ phung anak diñu?
Êjai Y‑Hêli jing Khua ngă yang ti Silô leh anăn dua čô anak êkei ñu ăt jing phung khua ngă yang đru bruă hlăm Sang Yang mơh (I Y‑Samuel 1:3, 9). Klei Aê Diê Blŭ hưn mthâo dua čô anak êkei Y‑Hêli jing soh jhat snăk leh anăn “diñu amâo uêñ kơ Aê Diê ôh” (êlan 12). Anei jing klei ênguôt snăk kơ bruă jing khua ngă yang ñu. Tui si klei bhiăn, mnơ̆ng yua kơ phung Lêwi mâo mơ̆ng klei phung ƀuôn sang myơr mnơ̆ng ngă yang (Y‑Yôsuê 13:14). Ƀiădah lĕ, dua čô anak Y‑Hêli mjhua kơ klei dưi diñu jing khua ngă yang kăp ngă klei soh jhat. Diñu ngă klei “ƀơ̆ng êlâo, dôk ti anăp” hŏng knuih ƀai ti anăp mnơ̆ng myơr ngă yang phung ƀuôn sang Israel myơr kơ Aê Diê. Diñu “plah mmiă čĭm” êjai dôk tŭk hlăm gŏ, leh anăn “ƀơ̆ng čĭm” êlâo kơ čuh prăi (êlan 13-16). Diñu amâo djă pioh djŏ tui si klei bhiăn Aê Diê mtrŭn ôh (Bruă Lêwi 3:3-5).
Dua čô anak êkei Y‑Hêli ngă klei soh amâo huĭ mpŭ kơ Aê Diê, wăt ngă klei soh knhông hŏng phung mniê hriê mă bruă ti Sang Yang mơh (I Y‑Samuel 2:22). Klei soh diñu “jing prŏng snăk ti anăp ală Yêhôwa” (êlan 17). Pô doh jăk amâo dưi tŭ ôh klei soh ngă klei amâo uêñ, amâo gưt asăp leh anăn dlăng hơăi mang mnơ̆ng myơr ngă yang kơ Ñu. Kyuanăn, Khua Yang tiŏ nao mnuih nao hưn êlâo brei Y‑Hêli thâo Khua Yang srăng bi kmhal gŏ sang ñu (I Y‑Samuel 2:27-36). Sa klei tuč ruê̆ ruă ênguôt leh anăn hơưi êdi kơ bruă doh jăk Y‑Hêli djă. Jing sa čô khua ngă yang ƀiădah Y‑Hêli amâo mtô lač ôh kơ anak ñu brei thâo kral Khua Yang, wăt tơdah diñu dôk hdĭp hlăm Sang Yang mă bruă kơ Khua Yang. Ñu kăn mkra mjuăt ktang mơh grăp blư̆ phung anak ñu ngă soh. Kyuanăn boh tŭ diñu amâo thâo kral Khua Yang ôh, amâo gưt hlue klei bhiăn Khua Yang leh anăn ngă klei jhat ƀai čhŏ mrŏ ti anăp Khua Yang. Y‑Hêli lĕ hlăm bruă klam ñu jing sa čô ama.
Anei jing sa klei hriăm mñă êrâo kơ lu phung amĭ ama, boh nik nak phung mă bruă kơ Aê Diê. Bruă klam êlâo hĭn leh anăn yuôm hĭn kơ phung amĭ ama amâo djŏ ôh knŏng atăt anak nao ti sang kkuh mpŭ, ƀiădah brei mtô lač kơ anak thâo kral Khua Yang bi klă leh anăn mâo klei bi mguôp hjăn pô hŏng Khua Yang dơ̆ng mơ̆ng hlăk dôk hđeh điêt (Klei Bi Hriêng 22:6). Bi mklăk hŏng dua čô anak êkei Y‑Hêli, hđeh điêt Y‑Samuel mă tŭ klei mtô lač dơ̆ng mơ̆ng hđeh điêt, kyuanăn ñu “hriê kơ prŏng hlăm asei mlei leh anăn hlăm klei pap mơ̆ng Yêhôwa leh anăn ti anăp mnuih” (I Y‑Samuel 2:26).
Lu amĭ ama kpăk gun hŏng klei mă bruă kơ Aê Diê snăn amâo lŏ pioh mmông mjĕ giăm, ktrâo atăt anak Klei Aê Diê Blŭ, amâo mkra mjuăt anak tơdah diñu ngă soh leh anăn kăn mñă diñu brei huĭ mpŭ kơ Aê Diê rei. Mtô lač phung anak drei thâo kral Khua Yang leh anăn êlan Ñu čiăng kơ tơdah diñu hriê kơ prŏng amâo srăng lui Khua Yang, anăn jing klei yuôm hĭn leh anăn dưm êlâo hĭn brei amĭ ama djă pioh.
Si ngă drei dôk yua jih mmông găl čiăng mtô lač phung anak drei thâo kral Khua Yang hjăn pô mơ̆?
Wah lač: Ơ Khua Yang, akâo Ih pap brei kơ kâo kyua ka uêñ mĭn mtô lač kơ anak brei thâo kral Khua Yang. Akâo Khua Yang brei klei pap čiăng kâo dưi čiêm rông mtô lač phung anak thâo kral Khua Yang klă mngač, čiăng đru diñu thâo huĭ mpŭ leh anăn gưt asăp Khua Yang.
Dlăng Klei Aê Diê Blŭ hlăm tlâo thŭn: Y‑Luk 12:35-59
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
