Klei Aê Diê Blŭ: Y-Mathiơ 23:8-12
Êlan kliăng: “Pô prŏng hĭn hlăm phung diih srăng jing dĭng buăl diih” (Y-Mathiơ 23:11)
Klei êmuh ksiêm mĭn: Khua Yang Yêsu mtô phung ƀĭng kna Ñu ya klei brei digơ̆ ngă leh anăn ya klei amâo dưi ngă ôh? Ya ngă Ñu mtô msĕ snăn lĕ? Si drei dôk mă bruă kơ Khua Yang leh anăn mă bruă kơ phung ayŏng adei drei?
Khua Yang Yêsu mtô kơ phung ƀĭng kna Ñu đăm tui klei phung Pharisi leh anăn phung khua čih hră ngă ôh. Tal sa, “đăm brei arăng pia Nai kơ diih ôh”, čiăng lač đăm duah klei hing ang amâo sĭt ôh. Khua Yang amâo čiăng ôh phung ƀĭng kna Ñu duah klei hing ang amâo sĭt, bi mđĭ diñu pô leh anăn jing mgao. Mnuih mă bruă kơ Khua Yang srăng bi luă gŭ ñu pô čiăng hriăm “kyuadah diih mâo knŏng sa čô Nai”, kyuanăn brei digơ̆ dôk sĭt suôr hŏng Khua Yang nanao, thâo săng êlam kơ Khua Yang wăt kơ Klei Ñu Blŭ. Tơdah hriăm nanao mơ̆ng Khua Yang, phung mă bruă srăng hdĭp hŏng klei khăp leh anăn bi đru hdơ̆ng pô hlăm klei đăo, hlăm klei hriăm Klei Aê Diê Blŭ… Tal dua, “đăm pia ama kơ sa čô mnuih hlăm lăn ala anei ôh”, phung mă bruă kơ Khua Yang knŏng huĭ mpŭ leh anăn kkuh mpŭ hjăn kơ Aê Diê jing Ama. Tơdah amâo duah ôh êlâo hĭn klei thâo săng myang sĭt nik srăng lĕ hlăm klei mplư klei thâo săng lăn ala, leh anăn srăng mpŭ mni kơ mnuih hrô kơ Aê Diê. Tal tlâo, “kăn brei arăng pia kơ diih khua rei”. Mnuih mă bruă kơ Khua Yang knŏng đuôm leh anăn mă bruă kơ sa čô Khua jing Yang Krist. Klei mplư kơ sa čô pô gĭt gai jing hưn kơ ñu jing dĭng buăl ƀiădah čiăng jing sa čô khua.
Khua Yang čiăng kơ phung ƀĭng kna Ñu mă bruă hŏng klei mĭn jing sa čô dĭng buăl sĭt. Đăm bi mđĭ pô ôh ƀiădah mă bruă hŏng klei luă gŭ, kyuadah “jih jang diih jing ayŏng adei” (êlan 8), leh anăn drei mâo knŏng sa čô Nai jing Khua Yang, sa čô Ama jing Aê Diê, leh anăn sa čô Khua jing Krist.
Ti krah lăn ala arăng knŏng duah klei dưi, klei arăng mpŭ ƀiădah Khua Yang Yêsu mtô kơ phung tui hlue Ñu brei jing “dĭng buăl”, čiăng lač brei mâo klei luă gŭ, bi luă gŭ pô hlăm klei thâo kral Khua Yang leh anăn mă bruă kơ phung ayŏng adei pô. Khua Yang čiăng drei hdơr nanao “Aê Diê blei leh diih hŏng sa ênoh; đăm jing hlŭn kơ mnuih ôh” (I Kôrantô 7:23). Tơdah thâo săng kơ drei jing dĭng buăl kơ Khua Yang, drei thâo kral Khua Yang jing Aê Diê, “arăng amâo dưi ksiêm ôh jih klei Ñu thâo săng” (Y-Êsai 40:28), amâo mâo ôh sa čô dĭng buăl mđĭ ñu pô jing Nai, amâodah brei pô mkăn pia kơ ñu jing Nai, ƀiădah drei srăng huĭ mpŭ kơ Aê Diê, kkuh mpŭ kơ Ñu leh anăn hur har mă bruă kơ Ñu nanao. Tơdah thâo săng kơ drei jing “dĭng buăl kơ diih” (II Kôrantô 4:5), drei srăng khăp hŏng jih ai tiê, bi mđĭ klei đăo hdơ̆ng ayŏng adei leh anăn đru bi mđĭ ai hlăm klei hriăm Klei Aê Diê Blŭ wăt hlăm klei mă bruă kơ Khua Yang.
Khua Yang mtă brei drei răng msĕ mơh, phung jing dĭng buăl kơ Khua Yang ƀiădah bi mđĭ ñu pô prŏng hĭn kơ pô mkăn, “Hlei pô bi mđĭ ñu pô, arăng srăng bi mtrŭn ñu; leh anăn hlei pô bi luă gŭ ñu pô, arăng srăng bi mđĭ ñu” (êlan 12). Đăm duah klei hing ang, klei tŭ dưn, klei dưi msĕ si phung lăn ala ôh ƀiădah brei drei mă bruă kơ Khua Yang leh anăn mă bruă kơ ayŏng adei hŏng jih ai tiê hŏng klei mĭn sa čô dĭng buăl sĭt.
Drei dôk mă bruă kơ Khua Yang leh anăn kơ ayŏng amai adei drei hŏng klei mĭn sa čô dĭng buăl mơ̆?
Wah lač: Ơ Khua Yang, đru kâo thâo kơ kâo jing sa čô dĭng buăl kơ Ih leh anăn kơ phung ayŏng adei čiăng kơ kâo bi luă gŭ kâo pô mă kơ Ih leh anăn kơ phung ayŏng adei hŏng jih ai tiê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
