Mathais 23:8-12
Nqe cim:
“Nej cov leejtwg xav ua tus hlob, tus ntawd yuav tsum ua nej sawdaws qhev” (Mathais 23:11)
Lus nug rau sawvdaws xav:
– Tswv Yexus qhia cov thwjtim tsis txhob ua yam twg thiab tsimnyog ua yam twg?
– Vim li cas Nws qhia li ntawd?
– Peb tabtom tu tus Tswv thiab tu cov kwvtij ntseeg zoo li cas?
Tswv Yexus qhia cov thwjtim tsis txhob xyaum cov Falixais thiab cov xibhwb uas qhia Vajtswv txoj kevcai tus qauv tsis zoo. Tim ib, “tsis txhob cia leejtwg hu nej hais tias xibhwb”, txhais tau tias tsis txhob nrhiav lub koob npe. Tus Tswv tsis xav kom Nws cov thwjtim caum lub npe meejmom, nyob tsam khav theeb. Tus neeg ua Vajtswv haujlwm yuav tsum yog tus uas txo hwjchim kawm “rau qhov…nej tsuas muaj tib tug xibhwb xwb”, yog li yuav tsum nyob ze tus Tswv thiab kawm kom paub Nws tej lus. Thaum niaj hnub kawm ntawm tus Tswv, tus neeg tu Nws tes haujlwm yuav paub ua neej sib hlub thiab sib pab hauv kev ntseeg, hauv kev kawm Vajtswv Txojlus… Tim ob, “tsis txhob muab cov neeg ntiajteb hu ua txiv”. Tus neeg tu Vajtswv tes haujlwm yuav tsum hwm thiab pehawm Vajtswv tib leeg uas yog sawvdaws Leej Txiv. Yog tsis saib qhov uas nrhiav kev txawj ntse sab ntsujplig ces yuav raug kev txawj ntse sab ntiajteb ntxias mus uas qhuas neeg ntiajteb hloov Vajtswv. Tim peb, “tsis txhob cia leejtwg hu nej hais tias, tus tswv”. Tus neeg tu Vajtswv tes haujlwm tsuas vamkhom thiab tu tib tug Tswv uas Yexus Khetos xwb. Kev sim siab rau tus thawjcoj yog muab nws hu ua tubqhe tiamsis ho xav ua tus tswv.
Tus Tswv xav kom cov thwjtim niaj hnub muab lub siab ua haujlwm yog ib tug tubqhe. Tsis txhob khav txiv tiamsis txo hwjchim ua haujlwm, vim peb “sawvdaws puavleej yog kwvtij huv tibsi” (nqe 8), thiab peb tsuas muaj tib tug Xibhwb uas yog Tswv Yexus, muaj ib Leej Txiv uas yog Vajtswv, muaj ib tug Tswv uas yog Yexus Khetos xwb.
Nyob hauv lub ntiajteb neeg tsuas nrhiav kom tau meejmom, koob npe tiamsis Tswv Yexus qhia rau cov neeg uas nrog Nws mus yuav tsum ua “tubqhe”, txhais tau tias yuav tau txo hwjchim, txo yus qis kawm paub tus Tswv thiab tu cov kwvtij ntseeg. Tus Tswv xav kom peb nco ntsoov “Vajtswv twb txhiv nej kim kawg li los lawm; yog li ntawd nej tsis txhob cia neeg ntxias tau nej mus ua qhev” (I Kauleethaus 7:23). Thaum paub tias yus yog tubqhe rau tus Tswv, peb yuav zeem paub tias tus Tswv yog Vajtswv, “Nws txojkev txawj ntse tsis muaj leejtwg paub tas” (Yaxayas 40:28), tsis muaj ib tug tubqhe xwbtim tsa tau nws ua xibhwb, lossis yuam lwm tus muab nws hu xibhwb tiamsis peb yuav tsum hwm tus Tswv, pehawm thiab ncaj ncees tu Nws tes haujlwm. Thaum paub tias yus yog “peb yog nej cov tubtxib” (II Kauleethaus 4:5), peb yuav tas siab hlub, ib leeg txhim kho ib leeg txojkev ntseeg thiab ib leeg txhawb ib leeg los ntawm kev tu tus Tswv.
Tus Tswv kuj ceebtoom peb, Vajtswv cov tubqhe uas xwbtim tsa tus kheej loj dua lwm tus, “Tus uas tsav hwjchim, Vajtswv yuav txo tus ntawd lub hwjchim, thiab tus uas txo hwjchim, Vajtswv yuav tsav tus ntawd lub hwjchim” (nqe 12). Thov kom tsis txhob muaj cov neeg uas caum meejmom, koob npe zoo li neeg ntiajteb, tiamsis yuav tsum tas siab tu tus Tswv tes haujlwm thiab tu cov kwvtij ntseeg los ntawm lub siab ua tubqhe.
Thov Vajtswv,
Tus Tswv, thov Koj pab kom nyuam yaus zeem paub nyuam yaus lub meejmom ua tubqhe rau Koj thiab ua tubqhe rau cov ntseeg; nyuam yaus thiaj paub txo hwjchim ua Koj tes haujlwm thiab tu cov kwvtij ntseeg tas siab. Nyuam yaus tuav Tswv Yexus lub npe thov, Amees.
Peb puas tabtom tu tus Tswv thiab cov kwvtij ntseeg los ntawm lub siab txo hwjchim, nyob lub meejmom qis li tus tubqhe?
Nyeem Vajluskub hauv peb lub xyoo: Pajlug 31
Kênh Youtube BHKTHN:
