Mathiơ 23:8-12
“Lăm lu iĕm bu wă pơm tih, bơngai noh athei pơm thoi lĕ đĭch đam iĕm.” (Mathiơ 23:11)
Nơ̆r jet tơchĕng pơwao:
– Kră Yang Yêsu bơtho lu bơngai pơhrăm gơh pơm tơdrong kiơ păng ưh kơ gơh pơm tơdrong kiơ?
– Yua kơ kiơ Kră Yang bơho thoi noh?
– Lu bơ̆n bơ̆jang kơ Kră Yang păng tơgŭm lu ‘nhŏng oh bơ̆n thoi yơ?
Kră Yang Yêsu bơtho lu bơngai pơhrăm păng Sư ‘nĕ kơ rok kiơ̆ lu tơdrong kơmĭl kơnê̆ đơ̆ng lu bơngai Pharisi păng lu Thây bơtho khôi juăt. Mă mônh, “’nĕ kơ wă kơ bơngai nai krao bơ̆n hăm nơ̆r thây”, wă khan bơ̆n ‘nĕ kơ chă đe ư-ang mă lei ưh kơ yua. Kră Yang Yêsu ưh kơ wă lu bơngai pơhrăm păng Sư druh kiơ̆ tơdrong ư-ang mă ưh kơ yua, na pơ-ang akâu kơdih, bơngai bơ̆jang kơ Kră Yang kăl kơ iŏk đon ala wă kơ pơhrăm “yua kơ lu iĕm đei minh ‘nu thây đĕch”, na kăl kơ ling lang jê̆ Kră Yang wă kơ rai đunh rai hlôh băt lăm tơdrong lui. Kơplah bơ̆n ling lang pơhrăm nơ̆r Kră Yang, bơngai ‘noh gô arih đei tơdrong ‘mêm păng dŏng tơgŭm lu bơngai lui, lăm tơdrong pơhrăm nơ̆r ‘Bok Kei-Dei … mă ‘bar, “nĕ kơ wă kơ bơngai lăm teh đak jô̆ bơ̆n nhen thoi ‘bă sư”. Tơdah bơ̆n ưh kơ chơ chă tơdrong arih gah bơhngol lei lu bơ̆n gô đei tơdrong pơhlŭ lăm teh đak na lu bơ̆n gô pơ-ư pơ-ang kơ kon bơngai tơplih kơ ‘Bok Kei-Dei. Mă pêng, “Nĕ kơ wă kơ đe nai krao bơ̆n khan bơngai yŏng”. bơngai bơ̆jang kơ Kră Yang gơnang păng bơ̆jang kơ minh ‘nu yŏng noh jơ̆ ‘Bok Krist. Tơdrong pơlong kơ lu bơngai bơ̆jang noh khan sư bơngai đĭch mă lei ‘maih wă pơm yŏng.
Kră Yang wă kơ lu bơngai pơhrăm păng Sư bơ̆jang đei jơhngơ̆m thoi lu bơngai đĭch, nĕ kơ pơang akâu kơdih mă lei đei jơhngơ̆m bơ̆jang yua kơ lu bơ̆n “nhen thoi ‘nhŏng oh” (trong 8), păng lu bơ̆n kư̆m đei minh ‘nu ‘Bok thây đĕch wă khan noh jơ̆ Kră Yang, lu bơ̆n đei minh ‘nu ‘Bă noh jơ̆ Kră Yang ‘Bok Kei-Dei, păng minh ‘nu yŏng noh jơ̆ ‘‘Bok Krist.
Tŏk bŏk lăm teh đak lơ bơngai chă tơdrong đei wă kơ gơh pơm yŏng, mă lei Kră Yang Yêsu bơtho bơngai kiơ̆ Sư athei pơm “đĭch”, wă khan kăl kơ đei tơdrong iŏk đon ala, tojruh akâu jăn wă pơhrăm nơ̆r ‘Bok Kei-Dei păng dŏng tơgŭm nhŏng oh bơ̆n kơdih lu bơ̆n kăl kơ blŏk “Bok Kei-Dei huai iŏk bơ̆n păng tơmam gĭt na bơ̆n jing rơngei boih, thoi noh bơ̆n ‘nĕ pă pơm tôm tơdrong thoi lĕ đĭch kon bơngai dơ̆ng”. (I Kôrintô 7:23). Kơplah bơ̆n băt kơ bơ̆n kơdih jơ̆ minh ‘nu bơngai đĭch, lu bơ̆n băt kơ Yŏng tơngla bơ̆n noh jơ̆ ‘Bok Kei-Dei, “tơdrong hlôh băt ưh kơgơh pơtŏ pơting” (Êsai 40:28), ưh kơ đei minh ‘nu đĭch đam ayơ wă pôk pơ ư-ang kơ sư kơdih khan pơm ‘Bok thây, dah pơgŏ bơngai nai krao sư hăm nơ̆r krao Thây mă lei lu bơ̆n ling lang kơ ư-ang kơ Kră Yang, kơ kuh kơ Sư, păng tơnăp lăm tơdrong bơ̆jang kơ Sư. Băt kơdih bơ̆n nhen “thoi đĭch kơ nhŏng oh bơ̆n kơdih” (II Kôrintô 4:5), lu bơ̆n gô đĭ jơhngơ̆m ‘mêm mơnat, tơiung đon lui dih băl păng dŏng tơgŭm pơlung tơiung dih băl lăm tơdrong pơhrăm nơ̆r Kră Yang păng bơ̆jang kơ Sư.
Kră Yang kŭm đei roi pơdah kơ lu bơ̆n, lu bơngai mă đĭch mă lei đei tơdrong pơang akâu kơdih “Bơngai bu pơma pơang akâu sư wă kơ đe pôk sư pơm tih, bơngai noh ning-mônh sư gô mơlâu hloh kơ đe. Bơngai bu ưh kơ hơnhŏ chă pơang akâu sư kơ đe, bơngai noh ‘Bok Kei-Dei mơnat, ăn kơ sư pơm tih”(trong12), nĕ kơ đei bơngai bu kiơ̆ tơdrong wă kơ đe ư-ang, chă lơi jên tơmam, chă pơm yŏng nhen thoi lu bơngai lăm teh đak âu mă lei kăl kơ đei đĭ jơhngơ̆m bơ̆jang kơ Kră Yang păng awih awăn dŏng tơgŭm ‘nhŏng oh bơ̆n hăm tơdrong bơ̆jang thoi bơngai đĭch mă tơpă.
Ơ Kră Yang apinh ăn kơ inh băt kơ anih inh dơ̆ng bơ̆t yơ wă khan inh nhen thoi bơngai đĭch đam Ih păng đĭch đam lu ‘nhŏng oh inh wă kơ inh ling lang iŏk đon ala bơ̆jang kơ Ih păng dŏng tơgŭm ‘nhŏng oh đĭ jơhngơ̆m. Yua anăn Kră Yang Yêsu Krist. Amen
Lu bơ̆n hăm oei bơ̆jang kơ Kră Yang păng dŏng tơgŭm nhŏng oh bơ̆n hăm tơdrong iŏk đon ala nhen thoi bơngai đĭch ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Tơdrong Pơđơ̆k 31
Kênh Youtube BHKTHN:
