Tơdrong Pơđơ̆k 10:1
“Kon drŏ-nglo gơh hơgei đei pơhiôk kơ ‘bă sư. Mă-lei đei kon kơhlôh kơwao pơm kơ mĕ sư sơ’ngon.” (Tơdrong Pơđơ̆k 10:1)
Nơ̆r jet tơchĕng pơwao:
– Tơdrong arih kon hơ’lơ̆p đei ‘bơm kiơ gah mĕ ‘bă?
– Lăm âu, lu bơ̆n băt kơnăl tơdrong tơ’bưh ayơ đơ̆ng chăl arih bơ̆n păng bơngai cheng bơ̆n?
Kon bơngai đơ̆ng Kră Yang pơjing wă kơ gơh arih hơdai băl, đơ̆ng noh tơdrong arih ‘lơ̆ng dah ưh đei ‘bơm truh tơ bơngai nai, lăm Tơdrong pơđơ̆k ‘nâu, ‘bă dah mĕ mă khan đei pơma ‘bơm kơ ‘bar ‘nu phara băl, mălei noh rup tang măt kơ ‘bar ‘nu noh. Mưh kon bơngai arih hlôh wao ‘biơ̆, wă khan băt mơ̆ng păng chu kiơ̆ nơ̆r Kră Yang bơtho păng chu nơ̆r mĕ ‘bă, ba ăn kơ mĕ ‘bă tơdrong chơt hiôk, tơplơ̆ kơ ‘noh dơ̆ng, mĕ ‘bă gô sơ’ngon mưh kon hơ’lơ̆p arih ưh kơ chu, pơm plơ̆ nơ̆r Kră Yang bơtho păng nơ̆r mĕ ‘bă bơtho, lu bơngai kon pơlei băt hơđăl ưh kơ sĭ arih kiơ̆ kơdih wă đĕch ôh, mă ‘maih dah ưh, mălei oei ‘bơm truh tơ bơngaia jum dăr, bơngai mă ‘mêm kơ bơ̆n.
Bơngai ‘bă păng mĕ lăm âu tang măt ăn kơ lu mĕ ‘bă hli yom kơ Kră Yang păng hơgei lăm Tơdrong Pơđơ̆k chăl 4, jơ̆ lu bơngai băt ‘mêm păng bơtho kon hơ’lơ̆p nơ̆r Kră Yang. Thoi noh, lăm hnam dơnŏ, mĕ ‘bă athei hiơ̆k bơngơ̆t arih băt hli yom kơ Kră Yang păng tơgŭm lu kon hơ’lơ̆p arih kiơ̆ tơdrong hli yom ‘nâu. Yua kơ mĕ ‘bă athei hli yom kơ Kră Yang păng chu kiơ̆ nơ̆r Sư lei na gơh bơtho kon hơ’lơ̆p kiơ̆ trong trŏ noh na băt kơ kon hơ’lơ̆p bơ̆n oei arih ‘lơ̆ng dah kơnê̆. Đơ̆ng noh kon hơ’lơ̆p lăng ‘bôh jơhngơ̆m mĕ ‘bă wă kơ băt lu sư arih trŏ dah ưh. Dang ei, mưh kon hơ’lơ̆p jang sa đei ‘biơ̆, mơdrŏng đei tơdrong jan tih lăm teh đak âu trŏ kơ hiôk, mălei mơdrŏng gah ala teh âu năm đơ̆ng rŏng kơ chăl arih hli yom kơ Kră Yang păng arih hơgei kiơ̆ trong hơdah nơ̆r Kră Yang. Tơdrong noh wă khan, mĕ ‘bă hli yom kơ Kră Yang gô sơ’ngon dah kon hơ’lơ̆p lu sư mơdrŏng đei ‘bôh kiơ̆ kơdih pơm kơ Kră Yang ưh kơ lăp đon, wă khan arih ưh kơ chu, ưh kơ pơm kiơ̆ nơ̆r Kră Yang. Thoi noh, ưh kơ trŏ yua kơ kon hơ’lơ̆p bơ̆n đei ‘bôh tơdrong kiơ, mălei lu bơ̆n đei ‘bôh lu tơdrong noh thoi yơ păng jơhngơ̆m lu bơ̆n hăm Kră Yang thoi yơ? Klaih kơ noh dơng athei ‘blŏk tơdrong arih lu bơ̆n ling lang đei tơdrong truh kơ bơngai jum dăr tơ ala teh âu, arih ưh kơ trŏ păng pơm yoch gô pơm kơ bơngai jum dăr sơ’ngon păng tơplơ̆ dơ̆ng, yua kơ bơ̆n khan tơdrong arih bơ̆n ưh kơ đei ‘bơm kơ bơngai nai thoi noh lơ bơngai arih kiơ̆ kơdih păng ưh kơ bơngơ̆t. Đei lơ bơngai lu ‘maih năm tơ hnam akŭm, đei bơngai ngôi tơ hnam, wă khan tơdrong noh ưh kơ đei ‘bơm kơ bu, mălei noh bơih minh tơdrong tơchĕng ưh kơ ‘lơ̆ng păng ưh kơ trŏ. Tơ’ngla ‘lơ̆ng tơpăt sĭt gô phak lu đe bu mă nŏng kơ oei arih pơm kư kă păng pơm yoch.
Ơ Kră Yang, apinh Ih tơgŭm inh hli yom kơ Kră Yang păng arih pơm kiơ̆ nơ̆r Ih wă kơ gơh bơtho tơ’bôh kơ kon hơ’lơ̆p păng arih pơm kơmĭl ăn kơ kon hơ’lơ̆p, đơ̆ng noh đei chĕp ba tơdrong ‘lơ̆ng kơ bơngai tơ pơlei pơla mă Kră Yang đei dan inh lăm noh. Krao khan yua anăn Kră Yang Yêsu Krist, Amen.
‘Bai pơhrăm ‘nâu tơgŭm kơ lu bơ̆n tơplih tơdrong bơ̆n juăt kơ pơm gah chăl arih thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: Amôt 9
Kênh Youtube BHKTHN:
