Klei Aê Diê Blŭ: Klei Bi Hriêng 10:1
Êlan kliăng: “Klei Mtao Salômôn blŭ bi hriêng: Sa čô anak êkei thâo mĭn bi mơak kơ ama ñu, ƀiădah sa čô anak êkei mluk bi ênguôt amĭ ñu.” (Klei Bi Hriêng 10:1)
Klei êmuh ksiêm mĭn: Ya klei bi hmăi kơ amĭ ama mơ̆ng knhuah hdĭp phung anak? Tinei, ya klei bi mguôp drei thâo kral ti krah klei hdĭp drei pô hŏng phung riêng gah?
Aê Diê hrih mjing anak mnuih pioh hdĭp hrăm mbĭt, kyuanăn, knhuah hdĭp jăk amâodah amâo jăk ăt srăng bi hmăi kơ mnuih mkăn sơăi. Hlăm êlan Klei Bi Hriêng anei, ama amâodah amĭ wăt tơdah lač hlăm dua kdrêč mdê, ƀiădah jing rup bi ala mbĭt kơ jih dua mơh. Tơdah sa čô anak dôk hdĭp thâo mĭn, mblang jing thâo mđing hmư̆ leh anăn gưt klei mtô bi hriăm mơ̆ng Klei Aê Diê Blŭ leh anăn mơ̆ng amĭ ama, srăng ba klei mơak kơ amĭ ama, bi mklăk wĭt, jih dua amĭ ama srăng ênguôt tơdah anak hdĭp mluk mgu, bi kdơ̆ng hŏng klei mtô bi hriăm mơ̆ng Klei Aê Diê Blŭ leh anăn mơ̆ng amĭ ama. Phung jing anak brei thâo săng snei, drei amâo knŏng hdĭp hjăn pô dê ôh, wăt tơdah čiăng amâodah hơăi, ăt srăng bi hmăi kơ phung drei khăp hơiêng hĭn mơh.
Ama amâodah amĭ tinei bi ala kơ phung amĭ ama huĭ mpŭ kơ Aê Diê leh anăn thâo mĭn hlăm Klei Bi Hriêng kdrêč 4, jing phung amĭ ama hŏng klei khăp mtô bi hriăm anak pô êlan klei sĭt nik. Snăn, hlăm gŏ sang, amĭ ama mâo bruă klam brei tui hlue klei hdĭp huĭ mpŭ kơ Aê Diê leh anăn đru phung anak pô tui hlue knhuah hdĭp huĭ mpŭ anei. Kyuadah amĭ ama huĭ mpŭ leh anăn gưt asăp kơ Aê Diê snăn kơh dưi mtô phung anak êlan djŏ, leh anăn snăn kơh dưi thâo kral anak drei dôk hdĭp thâo mĭn amâodah mluk mgu. Hlăk anăn phung anak srăng dlăng kơ knuih amĭ ama, čiăng thâo kral diñu pô dôk hdĭp djŏ amâodah soh. Hruê anei, tơdah phung anak mâo klei tŭ jing hlăm bruă knuă, mdrŏng sah, leh anăn mâo anôk bruă hlăm ala ƀuôn, klei anăn jing năng mơak, ƀiădah jih jang klei tŭ jing hlăm ala ƀuôn anei brei tui tluôn sa klei hdĭp huĭ mpŭ kơ Aê Diê leh anăn dôk hdĭp thâo mĭn tui si klei mngač Klei Aê Diê Blŭ. Kyuanăn, mta yuôm amâo djŏ ôh ya mnơ̆ng ya klei phung anak dưi mâo, ƀiădah si hdră êlan diñu dưi mâo klei anăn leh anăn si knuih hdĭp diñu hŏng Khua Yang.
Mbĭt anăn, brei drei hdơr snei, knhuah hdĭp drei srăng bi hmăi nanao hlăm êpul êya leh anăn ala ƀuôn. Dôk hdĭp soh wê leh anăn ngă soh srăng ba klei bi ênguôt kơ phung riêng gah leh anăn lŏ bi mklăk wĭt. Kyuadah lač, klei hdĭp pô dê amâo bi hmăi truh kơ arăng ôh, kyuanăn yơh lu mnuih dôk hdĭp čuôt klih snăk leh anăn amâo ngă bruă klam pô ôh. Mâo lu phung đăo hbĭl čiăng kơh nao bi kƀĭn, tơdah amâo čiăng dôk ti sang yơh; leh anăn lačdah klei anăn amâo bi hmăi kơ arăng ôh, ƀiădah klei ngă anăn jing klei bi mĭn amâo ngă bruă klam pô leh anăn čuôt klih. Pô Kpă Ênô sĭt nik srăng phat kđi hlei pô dôk nanao hlăm knhuah hdĭp soh wê leh anăn ngă soh.
Si klei hriăm anei đru drei bi mlih hdră êlan mĭn kơ klei hdĭp drei pô?
Wah lač: Ơ Khua Yang, brei kâo huĭ mpŭ kơ Khua Yang leh anăn gưt Klei Aê Diê Blŭ, čiăng dưi mtô lač leh anăn ngă klei bi hmô kơ phung anak kâo, mbĭt anăn, dưi ba klei bi hmăi jăk hlăm anôk Khua Yang dưm kâo dôk tinăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Amôs 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
